FIFA World Cup: પોતાની શરૂઆતની મેચમાં મોરોક્કો સામે નિરાશાજનક ડ્રો બાદ બ્રાઝિલે ફિલાડેલ્ફિયામાં હૈતીને 3-0થી હરાવીને FIFA વર્લ્ડ કપ 2026માં પોતાનો પહેલો વિજય નોંધાવ્યો છે. સેલેસાઓ (બ્રાઝિલની ટીમ) શરૂઆતથી જ મેચ પર પ્રભુત્વ જમાવ્યું અને રાફિન્હા દ્વારા શરૂઆતમાં લીડ મેળવી લીધી હોય તેવું લાગતું હતું, પરંતુ ઓફસાઇડને કારણે ગોલ રદ કરવામાં આવ્યો. બોક્સની અંદર હંગામા પછી મેથ્યુસ કુન્હાએ ગોલ કર્યો ત્યારે તેમનું દબાણ આખરે ફળ્યું હતું.
બ્રાઝિલે મેચ 3-0થી જીતી લીધી
કુન્હાએ 36મી મિનિટે વિનિસિયસ જુનિયરના ઝડપી કાઉન્ટર-એટેકિંગ પાસથી ગોલ કરીને બ્રાઝિલની લીડ બમણી કરી હતી. ત્યારબાદ રીઅલ મેડ્રિડ સ્ટારે પહેલા હાફના સ્ટોપેજ ટાઇમમાં ગોલ કર્યો હતો. તેણે લુકાસ પેક્વેટાના પાસ પર દોડીને શાંતિથી બોલ જોની પ્લેસિડને પાછળ છોડી દીધો હતો.
બ્રેક પછી હૈતી વધુ આક્રમક રમત રમી અને રિકાર્ડો એડે દ્વારા ગોલ કરવાની નજીક પહોંચી ગઈ હતી, જેના શક્તિશાળી હેડરને એલિસને શાનદાર રીતે બચાવ્યો હતો. જોકે, બ્રાઝિલે રમત પર સંપૂર્ણ નિયંત્રણ જાળવી રાખ્યું અને પોતાની પહેલી જીત મેળવી ગ્રુપ સીમાં પોતાનું સ્થાન મજબૂત બનાવ્યું હતું. બ્રાઝિલના હવે ત્રણ મેચમાંથી ચાર પોઈન્ટ છે.
યુએસએ આગામી રાઉન્ડમાં આગળ વધ્યું
યજમાન ટીમ યુએસએએ ફિફા વર્લ્ડ કપ 2026 માં પોતાનો પ્રભાવશાળી રન ચાલુ રાખ્યો હતો, ગ્રુપ ડીમાં ઓસ્ટ્રેલિયાને 2-0 થી હરાવીને આગામી રાઉન્ડ, રાઉન્ડ ઓફ 32 માં સ્થાન મેળવ્યું હતું. સિએટલ સ્ટેડિયમ ખાતે રમાયેલી આ રોમાંચક મેચમાં, અમેરિકન ખેલાડીઓએ શરૂઆતથી જ ઓસ્ટ્રેલિયા પર હુમલો કર્યો હતો. તેઓએ પહેલા હાફમાં બે ગોલ કર્યા, જેનાથી ઓસ્ટ્રેલિયા સંપૂર્ણપણે પાછળ રહી ગયું હતું.
રમતની 11મી મિનિટે યુએસએએ પોતાનો પહેલો ગોલ કર્યો હતો, 1-0 ની લીડ મેળવી ત્યારથી ઓસ્ટ્રેલિયન ટીમ વધુ દબાણમાં આવી ગઈ હતી. પહેલા હાફના અંત પહેલા, યુએસએએ પોતાની લીડ 2-0 સુધી લંબાવી હતી. મેચની 43મી મિનિટે સેર્ગીનો ડેસ્ટે ગોલ કરવાનો શાનદાર પ્રયાસ કર્યો હતો.
આ પણ વાંચોઃ- બસ ડ્રાઈવર, ઇલેક્ટ્રિશિયન અને હવે 40 વર્ષની ઉંમરે ફિફા વર્લ્ડ કપમાં ડેબ્યૂ, પોતાની શાનદાર રમતથી રાતો-રાત બન્યો હીરો
તકનો લાભ લેતા એલેક્સ ફ્રીમેને ડી-બોક્સની અંદરથી શાનદાર હેડર બનાવ્યો અને બોલ સીધો ગોલ પોસ્ટમાં મોકલી દીધો હતો. આમ યુએસએ હાફ ટાઇમ સુધી 2-0 થી આગળ હતું. આગામી હાફમાં કોઈપણ ટીમ ગોલ કરી શકી નહીં અને યુએસએ જીતી ગયું હતું.
