પંજાબના ફગવાડા સ્થિત લવલી પ્રોફેશનલ યુનિવર્સિટીમાં વિદ્યાર્થીઓનું વિરોધ પ્રદર્શન હિંસક બની ગયું છે. યુનિવર્સિટીની બહાર વિરોધ કરી રહેલા વિદ્યાર્થીઓ પોલીસ સાથે ઘર્ષણમાં ઉતર્યા અને વાહનોને આગ ચાંપી દીધી.
જ્યારે પોલીસે વિદ્યાર્થીઓને કાબૂમાં લેવા માટે લાઠીચાર્જ કર્યો ત્યારે સ્થિતિ વધુ વણસી ગઈ હતી. તેના જવાબમાં વિદ્યાર્થીઓએ પોલીસના બે વાહનો સળગાવી દીધા.
આ અશાંતિની શરૂઆત કેવી રીતે થઈ?
શનિવારે રાત્રે એક વિદ્યાર્થિની પર બળાત્કાર થયાના અને ત્યારબાદ તેણે આત્મહત્યા કર્યાના અહેવાલો બાદ આ હોબાળો શરૂ થયો હતો. સોશિયલ મીડિયા પર આ અંગેના સંદેશાઓ વાયરલ થતાં હજારો વિદ્યાર્થીઓ રસ્તા પર ઉતરી આવ્યા હતા.
વિદ્યાર્થીઓએ કેમ્પસમાં મોટા પાયે તોડફોડ કરી અને કેમ્પસના એક ભાગને આગ ચાપી દીધી. સવારે તેમણે દિલ્હી-અમૃતસર હાઈવે પર ધરણાં કર્યા, જેના કારણે ટ્રાફિક જામ સર્જાયો હતો. શરૂઆતમાં પોલીસે જણાવ્યું હતું કે તપાસમાં બળાત્કારનો કોઈ પુરાવો મળ્યો નથી. જોકે પરિસ્થિતિ વણસતા હવે આ મામલે FIR નોંધવામાં આવી છે.
#WATCH | Phagwara, Punjab: College students protesting exterior Pretty Skilled College clashed with police and set autos on fireplace.
As per Dean of LPU Sorabh Lakhanpal, “When the scholars introduced this matter to our consideration, we determined it wanted to be handled critically.… pic.twitter.com/S1A31nkbZk
— ANI (@ANI) September 27, 2026
LPUના ડીને દાવાઓને અફવા ગણાવીને ફગાવી દીધા
LPUના ડીન સૌરભ લખનપાલે આ મુદ્દે વાત કરતા જણાવ્યું હતું કે જ્યારે વિદ્યાર્થીઓએ આ બાબત વહીવટીતંત્રના ધ્યાન પર લાવી, ત્યારે નિર્ણય લેવામાં આવ્યો હતો કે આ પરિસ્થિતિ ગંભીર વિચારણા માંગે છે. જોકે તપાસ બાદ જણાયું કે આ બાબત સંપૂર્ણપણે અફવાઓ પર આધારિત હતી. “અમે વિદ્યાર્થીઓની તમામ માંગણીઓ પૂરી કરી. ઉદાહરણ તરીકે જ્યારે તેઓ CCTV ફૂટેજ જોવા માંગતા હતા ત્યારે થોડા દિવસો પછી તેમને તે બતાવવામાં આવ્યા હતા. તેઓ જે ચોક્કસ રૂમ વિશે વાત કરી રહ્યા હતા તેની મુલાકાત લેવા પણ તેઓ માંગતા હતા.”
ષડયંત્રની આશંકા – LPUના ડીન
LPUના ડીને વધુમાં કહ્યું, “અમને વિદ્યાર્થીના નામ કે હોસ્ટેલની વિગતો અંગે કોઈ નક્કર માહિતી મળી નથી. તેમને વારંવાર ઔપચારિક ફરિયાદ નોંધાવવા માટે કહેવા છતાં અમે તેમને તે રૂમ બતાવ્યો જે તેઓ જોવા માંગતા હતા અને યુનિવર્સિટી વહીવટીતંત્ર, પોલીસ તથા વોર્ડન તરફથી સંપૂર્ણ સહકારની ખાતરી આપી હતી, તેમજ કોઈપણ જરૂરી પગલાં લેવાની તૈયારી દર્શાવી હતી. જોકે અમને સમજાય છે કે આ સમગ્ર પરિસ્થિતિ અફવાઓને કારણે ઊભી થઈ છે. વિદ્યાર્થીઓએ ખરેખર આ વાત સમજવાની જરૂર છે.”
આ પણ વાંચો: ‘2022 માં અમારા મત કપાવાના કારણે જ સરકાર ન બની’, ચૂંટણી પંચ પર અખિલેશ યાદવનો સણસણતો આરોપ
ડીને આગળ જણાવ્યું, “મને લાગે છે કે તેમાં અસામાજિક તત્વો સામેલ છે. અમને તેમની તરફથી કોઈ ષડયંત્ર હોવાની પ્રબળ આશંકા છે. બહારના અસામાજિક તત્વોએ તોડફોડ કરી અને વિદ્યાર્થીઓ દ્વારા જાળવવામાં આવતા શાંતિપૂર્ણ શૈક્ષણિક વાતાવરણને ખોરવવાનો પ્રયાસ કર્યો.”
દરમિયાન યુનિવર્સિટીના વાઇસ-ચાન્સેલર ડૉ. જસપાલ સિંહ સંધુએ જણાવ્યું હતું કે FIR નોંધવામાં આવી છે અને આ મામલાની તપાસ કરી રહેલી સ્પેશિયલ ઇન્વેસ્ટિગેશન ટીમ (SIT)માં પાંચ વિદ્યાર્થીઓને સામેલ કરવામાં આવ્યા છે.
