સાણંદમાં પિતાએ માતાજીની દેરી સામે પુત્રનું માથું પછાડી હત્યા કરી, લાશ ખાટલામાં મૂકી બાજુમાં સૂતો રહ્યો

Father Kills Son : ગુજરાતના અમદાવાદ જિલ્લામાં એક કાળજું કંપાવે તેવી ઘટના સામે આવી છે.  જ્યાં એક પિતાએ જ કથિત રીતે તેના 10 વર્ષના પુત્રની નિર્દયતાથી હત્યા કરી હતી. આરોપીની ઓળખ 36 વર્ષીય નરેશ તરીકે થઈ છે, જે ગામમાં ભુવા તરીકે ઓળખાય છે. આ ઘટના સાણંદના વિંછિયા ગામે બની હતી.

એવું કહેવામાં આવી રહ્યું છે કે નરેશ ઇચ્છતો ન હતો કે તેનો પુત્ર મોટો થઈને તેની જેમ ભુવા બને. આ કારણોસર તેણે ઘરના આંગણામાં બનેલા મંદિરમાં માતાજીની દેરી પર પોતાના પુત્ર કરણનું માથું પછાડ્યું હતું અને ત્યારબાદ લાકડીથી મારીને તેની હત્યા કરી હતી.

નરેશ પુત્રના મૃતદેહ પાસે ઊંઘી રહ્યો

આ ઘટના ત્યારે પ્રકાશમાં આવી જ્યારે નરેશની પત્ની ભારતી રવિવારે ઘરે પહોંચી હતી. તેણે તેના 10 વર્ષના પુત્ર કરણનો મૃતદેહ ઘરના ખાટલા પર પડ્યો જોયો હતો. નવાઈની વાત એ હતી કે નરેશ દીકરાના મૃતદેહ પાસે ખાટલા પર સૂતો હતો.

ભારતીએ પોલીસને જણાવ્યું હતું કે નરેશે પોતે તેને કહ્યું હતું કે તેણે કરણને પગથી પકડીને માતાજીની દેરી પર ત્રણ વખત પટક્યો હતો. આ પછી તેના માથા પર લાકડીથી પ્રહાર કર્યો હતો, જેના કારણે તેનું મોત નીપજ્યું હતું. આરોપીએ પુત્રનો મૃતદેહ ખાટલા પર મૂક્યો હતો અને તેની બાજુમાં સૂઈ ગયો હતો.

ઝઘડા અને મારપીટને કારણે દીકરાની માતા પિયર ચાલી ગઈ હતી

પોલીસના જણાવ્યા અનુસાર ભારતી લગભગ 10 દિવસ પહેલા તેના પતિ સાથે ઝઘડા અને મારપીટ બાદ અમદાવાદના સાણંદમાં તેના માતા-પિતાના ઘરે રહેવા ગઈ હતી. જોકે કરણની પરીક્ષાઓ ચાલી રહી હતી એટલે તે પિતા સાથે જ રહ્યો હતો.

1 નવેમ્બરના રોજ ભારતીને માહિતી મળી હતી કે નરેશે તેના પુત્ર પર હુમલો કર્યો છે. આ દરમિયાન એક પાડોશીએ પણ પોલીસને જાણ કરી હતી. ફરિયાદ મળતા અમદાવાદ ગ્રામ્ય પોલીસની ટીમ ઘટના સ્થળે પહોંચી હતી. ત્યાં પોલીસે નરેશને તેના ઘરમાં પુત્રના મૃતદેહ પાસે સૂતો જોયો હતો.

સાણંદ પોલીસ સ્ટેશનના ઇન્સ્પેક્ટર જે એલ ચૌહાણે જણાવ્યું હતું કે આરોપીએ ઘરના આંગણામાં માતાજીની દેરીની કિનારી પર બાળકનું માથું પટક્યું હતું અને પછી તેના પર લાકડીથી હુમલો કરી હત્યા કરી હતી. માતાજીની દેરી પણ બાળકના લોહીના નિશાન પણ મળી આવ્યા છે.

એકતા દિવસ પર પીએમ મોદીએ કહ્યું – સરદાર પટેલ વગર આજના ભારતની કલ્પના પણ મુશ્કેલ

પિતા પોતાના દીકરાને ભુવો બનાવવા માંગતા ન હતો

પોલીસમાં નોંધાયેલી એફઆઈઆર અનુસાર જ્યારે ભારતીએ નરેશને પૂછ્યું કે તેણે પોતાના પુત્રની હત્યા કેમ કરી, ત્યારે તેણે જવાબ આપ્યો કે તેના પિતા પણ ભુવા હતા અને તેના પછી તેણે જવાબદારી સંભાળી હતી. તે ઇચ્છતો ન હતો કે પરિવારમાં બીજું કોઈ ભુવો બને. આ વિચારને કારણે તેણે પોતાના પુત્ર કરણની હત્યા કરી હતી, જેથી પરિવારમાં કોઈ આ રોલ આગળ ન અપનાવે.

આરોપીની માનસિક સ્થિતિની તપાસ કરવામાં આવશે

પોલીસે નરેશ વિરુદ્ધ હત્યાનો ગુનો નોંધી તેની ધરપકડ કરી છે. ઇન્સ્પેક્ટર ચૌહાણના જણાવ્યા મુજબ આરોપીની માનસિક સ્થિતિ સામાન્ય લાગતી નથી. આવી સ્થિતિમાં તેની મનોવૈજ્ઞાનિક તપાસ કરવામાં આવશે. પોલીસને એ પણ જાણવા મળ્યું છે કે આસપાસના લોકો સાથે નરેશના સંબંધો સારા નથી. હાલ પોલીસ આ કેસની તપાસ કરી રહી છે અને આરોપીઓની માનસિક સ્થિતિની તપાસ કરવામાં આવશે.