અભિનેતા ઈમરાન ખાને બોમ્બે હાઇકોર્ટમાં બિનશરતી માફી માંગી, હવે પછી વિરોધ પ્રદર્શનમાં ભાગ લેશે નહીં

Actor Imran Khan apologises : બોલિવૂડ અભિનેતા ઇમરાન ખાને મુંબઈમાં મુખ્ય ચૂંટણી કમિશનર જ્ઞાનેશ કુમાર વિરુદ્ધ થયેલા વિરોધ પ્રદર્શનમાં સામેલ થવા બદલ બોમ્બે હાઇકોર્ટમાં બિનશરતી માફી માંગી છે. બોમ્બે હાઈકોર્ટની ફટકાર પછી અભિનેતાએ આ પગલું ભર્યું હતું. કોર્ટે કહ્યું હતું કે ઓવરસીઝ સિટિઝન ઓફ ઈન્ડિયા (OCI) કાર્ડ હોલ્ડર હોવાને કારણે તેમને દેશની ટીકા કરવાનો અધિકાર નથી.

કોર્ટે ઇમરાન ખાનને કહ્યું કે તે સોગંદનામું આપીને બિનશરતી માફી માંગે અથવા તેના કામ માટે દિલગીરી વ્યક્ત કરે. સાથે તેણે એ પણ ખાતરી આપવી પડશે કે તે ભવિષ્યમાં એસઆઈઆર સામેના પ્રદર્શનમાં ભાગ નહીં લે.

ઇમરાન ખાને કોર્ટમાં માફી માંગતા સોગંદનામું આપ્યું

આ પછી ઇમરાન ખાને કોર્ટમાં માફી માંગતા સોગંદનામું આપ્યું હતું અને આવા પ્રદર્શનમાં ફરી ભાગ નહીં લેવાની ખાતરી આપી હતી. આ પછી કોર્ટે તેની વિરુદ્ધ જાહેર કરાયેલી ‘લીવ ઈન્ડિયા નોટિસ’ પર 7 ડિસેમ્બર સુધી રોક લગાવી દીધી હતી.

ઇમરાન ખાને ફોરેનર્સ રિજનલ રજિસ્ટ્રેશન ઓફિસ (એફઆરઆરઓ) દ્વારા જારી કરવામાં આવેલી નોટિસને બોમ્બે હાઈકોર્ટમાં પડકારી હતી. જેમાં તેમને 28 ઓક્ટોબર સુધીમાં ભારત છોડવાનું કહેવામાં આવ્યું હતું. આ પહેલા કોર્ટે આ નોટિસ પર 2 નવેમ્બર સુધી રોક લગાવી દીધી હતી. હવે આ પ્રતિબંધ 7 ડિસેમ્બર સુધી લંબાવવામાં આવ્યો છે.

કોર્ટે એફઆરઆરઓ ને પણ સવાલ કર્યા હતા. કોર્ટે મૌખિક રીતે કહ્યું કે ઇમરાન ખાન છેલ્લા 40 વર્ષથી ભારતમાં રહે છે અને તેનો કોઈ ગુનાહિત રેકોર્ડ નથી. આવી સ્થિતિમાં ભારત છોડવાની નોટિસ જારી કરતા પહેલા તેને ઓછામાં ઓછું પોતાનો કેસ રજૂ કરવાની તક આપવી જોઈતી હતી.

ઇમરાન ખાન અમેરિકન નાગરિક છે

ઇમરાન ખાન અમેરિકન નાગરિક છે અને તેની પાસે ઓસીઆઈ કાર્ડ છે. તેમને 14 ઓક્ટોબરે ‘લીવ ઇન્ડિયા નોટિસ’ જાહેર કરવામાં આવી હતી. થોડા દિવસો પહેલા 10 ઓક્ટોબરે મુંબઈમાં મુખ્ય ચૂંટણી કમિશનર જ્ઞાનેશ કુમાર વિરુદ્ધ વિરોધ પ્રદર્શન દરમિયાન પોલીસે તેમની અટકાયત કરી હતી.

આશુતોષ રાંકા અને સૌરવ દાસનો ઉલ્લેખ કરીને સુપ્રીમ કોર્ટના પૂર્વ જજે કહ્યું – આ લોકો જેલમાં જવાથી ડરે છે, CJP ખતમ થઇ ગઇ

ઇમરાન ખાનની અટકાયત બાદ ભાજપના નેતા કિરીટ સોમૈયાએ પોલીસમાં ફરિયાદ નોંધાવી હતી. તેમણે આરોપ લગાવ્યો હતો કે અભિનેતાએ ઓસીઆઈના નિયમો અને વિઝાની શરતોનું ઉલ્લંઘન કર્યું છે. આ પછી મુંબઈ પોલીસે એફઆરઆરઓને એફઆઈઆર મોકલી હતી, જેના આક્ષેપો હજુ સુધી સાબિત થયા નથી. જેના આધારે એફઆરઆરઓએ ઇમરાન ખાનને ભારત છોડવાની નોટિસ ફટકારી હતી.