વર્ષ 2002ના ગુજરાત રમખાણો દરમિયાન બિલકિસ બાનો પર સામૂહિક બળાત્કાર અને તેના પરિવારના સાત સભ્યોની હત્યાના કેસમાં આજીવન કેદની સજા ભોગવી રહેલા બે દોષિતોને સુપ્રીમ કોર્ટમાંથી રાહત મળી છે. કોર્ટે બિપિનચંદ જોશી અને પ્રદીપ મોઢિયાને જામીન આપ્યા છે અને સાથે જ તેમની આજીવન કેદની સજા પર પણ રોક (સ્ટે) લગાવી દીધી છે.
આ બંને દોષિતો જેલમાં 17 વર્ષથી વધુ સમય વિતાવી ચૂક્યા છે. સુપ્રીમ કોર્ટે નોંધ્યું હતું કે તેમની અપીલોમાં હકીકત અને કાયદા સાથે જોડાયેલા એવા મુદ્દાઓ છે જેના પર વિસ્તૃત વિચારણાની જરૂર છે. સુપ્રીમ કોર્ટે 28 ઓક્ટોબરે જારી કરેલા આદેશમાં આ રાહત આપી છે.
હાઈકોર્ટના ચુકાદાને પડકાર્યો
મે 2017 માં બિપિનચંદ જોશી અને પ્રદીપ મોઢિયાએ બોમ્બે હાઈકોર્ટના એ ચુકાદાને પડકાર્યો હતો, જેમાં તેમની દોષિત ઠેરવવાની પ્રક્રિયા અને આજીવન કેદની સજાને યથાવત રાખવામાં આવી હતી. જામીન આપતી વખતે કોર્ટે એ હકીકત પર પણ ધ્યાન આપ્યું કે અપીલકર્તાઓમાંથી એક, બિપિનચંદ જોશી, ગંભીર શારીરિક અક્ષમતા (દિવ્યાંગતા) ધરાવે છે.
સરકારી પક્ષે જામીનનો વિરોધ કર્યો
સુનાવણી દરમિયાન રાજ્યના વકીલે ગુનાની ગંભીરતા અને ટ્રાયલ કોર્ટ તેમજ બોમ્બે હાઈકોર્ટ દ્વારા દોષિત ઠેરવવાના નિર્ણયને યથાવત રાખવામાં આવ્યો હોવાનો હવાલો આપીને જામીન અરજીનો વિરોધ કર્યો હતો. બીજી તરફ દોષિતોના વકીલે દલીલ કરી હતી કે અપીલકર્તાઓમાંથી એકનું નામ શરૂઆતની એફઆઈઆર (FIR)માં નહોતું અને કથિત ઘટનાના લગભગ ત્રણ વર્ષ પછી તેને આ કેસમાં આરોપી બનાવવામાં આવ્યો હતો.
