યુવાનોમાં વધતો શોલ્ડર અને કમરનો દુઃખાવો, ફિઝિયોથેરાપી સેન્ટરોમાં ભીડ

વિશેષ કરીને શિયાળાની ઋતુ દરમિયાન તો આ સમસ્યાઓમાં વધુ વધારો થતો જોવા મળે છે. ઠંડીના કારણે શરીરના સ્નાયુઓ અને સાંધાઓ જકડાઈ જતાં અનેક લોકો દુખાવા અને હલનચલનમાં તકલીફ સાથે ફિઝિયોથેરાપી સેન્ટર સુધી પહોંચે છે. નવસારીની ફિઝિયોથેરાપિસ્ટ ડો. હેતવી શુક્લા સાથે વાતચીત દરમિયાન તેમણે જણાવ્યું હતું કે હાલ શિયાળાની ઋતુમાં ખાસ કરીને સાંધાના જકડાઈ જવાના કેસો વધારે સામે આવી રહ્યા છે. જેમાં સૌથી વધુ ફરિયાદ શોલ્ડરના દુખાવાની છે. સાથે સાથે કમરમાં ખેંચ આવી જવાના કેસોમાં પણ નોંધપાત્ર વધારો થયો છે.

ડો. હેતવી શુક્લાના જણાવ્યા મુજબ ઘણા દર્દીઓ જ્યારે સારવાર માટે આવે છે ત્યારે તેઓ કહે છે કે શોલ્ડરમાં એવો તીવ્ર દુ:ખાવો થાય છે કે જાણે એટેક આવી રહ્યો હોય તેવી લાગણી થાય. ગરદન અને શોલ્ડર બંને સાથે સંકળાયેલા હોવાથી દુ:ખાવો વધીને હાથ સુધી ફેલાય છે. જ્યારે કમરમાં ખેંચ આવવાની સમસ્યા થાય ત્યારે તો આખા શરીરની હલનચલન ક્ષમતા જ મર્યાદિત થઈ જાય છે. ચોંકાવનારી વાત એ છે કે આવી સમસ્યાઓ હવે માત્ર વૃદ્ધોમાં નહીં, પરંતુ 20થી 25 વર્ષની ઉંમરના યુવાનોમાં પણ મોટા પ્રમાણમાં જોવા મળી રહી છે.

આવી પરિસ્થિતિમાં શું ધ્યાન રાખવું જોઈએ તે અંગે ડો. હેતવી શુક્લાએ મહત્વપૂર્ણ સલાહ આપી છે. તેમણે જણાવ્યું કે રોજબરોજની શારીરિક કસરત અને એક્ટિવિટી સતત ચાલુ રાખવી અત્યંત જરૂરી છે. જો લાંબા સમય સુધી શારીરિક પ્રવૃત્તિમાં બ્રેક પડે તો આવી તકલીફો ઉદ્ભવે છે. આજકાલ ઘણી વ્યક્તિઓની લાઈફસ્ટાઈલ એવી બની ગઈ છે કે આખો દિવસ બેસીને કામ કરવાનું હોય છે, જેના કારણે શરીરની ગતિશીલતા ઘટે છે અને સ્નાયુઓ કમજોર બને છે.