‘સરકારને બે હાથ જોડું છું મારા દીકરાને પરત લાવી આપો,’ યુક્રેનમાં ફસાયેલા યુવકને પરત લાવવા તેની માતાએ સરકારને અપીલ કરી 

સાહિલ  ડ્રગ્સના કેસમાં સજા પર હતો ત્યારે રશિયા અને યુક્રેન યુદ્ધ ચાલતું હતું. જેમાં  સાહિલને અનેક પ્રલોભનો આપીને યુક્રેન યુદ્ધ લડવા તૈયાર કર્યો હતો. ત્યાર બાદ તેને 15 દિવસની આર્મીની રશિયામાં ટ્રેનિંગ આપવામાં આવી હતી અને ત્યાંથી તેને યુક્રેન સામે યુદ્ધ કરવા માટે યુક્રેનની બોર્ડરે લઈ ગયા હતા.

જોકે, સાહિલે યુક્રેન સામે યુદ્ધ લડવાના બદલે યુક્રેનની બોર્ડર ઉપર જઈને યુક્રેનમાં સરેન્ડર કર્યું હતું અને ત્યારબાદ છેલ્લા સાડા ત્રણ મહિનાથી સાહિલ માંજોઠી હાલમાં યુક્રેનમાં છે. ત્યારે તેને હેમખેમ પરત લાવવા માટે થઈને તેની માતા હસીનાબેન માજોઠી દ્વારા રાજ્ય સરકાર, કેન્દ્ર સરકાર અને દિલ્હી હાઈકોર્ટ સુધીના પ્રયત્નો કરવામાં આવી રહ્યા છે. સાહિલની માતા છેલ્લા 22 મહિનાથી સંઘર્ષ કરી રહી છે.

સાહિલ સાથે થયેલી છેલ્લી વાત મુજબ જો સરકાર યુક્રેન સાથે વાત કરે તો સાહિલ હેમખેમ પરત ફરી શકે તેમ છે. સાહિલની માતાએ હવે તેનો પુત્ર હેમખેમ સ્વદેશ આવે તે માંગ સાથે મીડિયા સામે આવીને સરકાર સમક્ષ પોતાની આપવીતી સાથે રજૂઆત કરી છે. જો સરકાર છોડાવશે નહીં તો મારા પુત્રને મારી નાખશે તેવો ડર તેની માતાને સતાવી રહ્યો છે. હવે જોવાનું એ રહ્યું છે, એક માતાની સરકાર સામે આજીજી વિનંતીનો ક્યારે અંત આવે છે.