ગ્રામ્ય વિસ્તારો માટે આશીર્વાદ બન્યું નિ:શુલ્ક ફરતું દવાખાનું, મહુવાના 89 ગામના લોકોને લાભ

ભાવનગર જિલ્લાના મહુવા તાલુકામાં આરોગ્ય ક્ષેત્રે એક મહત્ત્વપૂર્ણ પહેલ હાથ ધરવામાં આવી છે. બીએપીએસ સ્વામિનારાયણ સંસ્થા દ્વારા મહુવા પંથકના 89 ગામોમાં આરોગ્ય સેવાઓ સ્થળ પર પહોંચે તે હેતુથી ફરતું દવાખાનું શરૂ કરવામાં આવ્યું છે. આ સેવા ખાસ કરીને ગ્રામ્ય વિસ્તારના લોકો માટે આશીર્વાદરૂપ સાબિત થઈ રહી છે. ગ્રામ્ય વિસ્તારોમાં વસતા લોકોને સામાન્ય રોગોની તપાસ, સમયસર સારવાર અને માર્ગદર્શન માટે શહેર કે તાલુકા મથકે જવું પડતું હતું, જેમાં સમય અને ખર્ચ બંને વધતા. ખાસ કરીને વૃદ્ધો, મહિલાઓ અને ગરીબ પરિવારો માટે આ પ્રક્રિયા કઠિન બની જતી. આ સમસ્યાઓને ધ્યાનમાં રાખીને બીએપીએસ સ્વામિનારાયણ સંસ્થાએ શરૂ કરેલ આ ફરતું દવાખાનું લોકહિતમાં આશીર્વાદસમાન સાબિત થઈ રહ્યું છે.

રમણા કાર્તિકભાઈએ જણાવ્યું કે સ્વામિનારાયણ મંદિર મહુવા દ્વારા જુદા જુદા વિસ્તારોમાં ફરતું દવાખાનું શરૂ કરવામાં આવ્યું છે. બી.એ.પી.એસ. સંસ્થા દ્વારા છેલ્લા ચાર મહિનાથી મહુવાના કુલ 89 ગામોમાં આ ફરતું દવાખાનું ચાલી રહ્યું છે. ખાસ કરીને શરદી, ઉધરસ, તાવ, સાંધાના દુખાવા, ચામડીના રોગો, ઝાડા-ઊલટી અને પાચનના રોગોની પ્રાથમિક સારવાર લોકોને તેમના પોતાના ગામમાં જ મળી રહે તે માટે આ સેવા શરૂ કરવામાં આવી છે. જરૂરિયાતમંદ લોકોને સ્થળ પર જ તપાસ અને સારવાર મળી રહે તે માટે બીએપીએસ સ્વામિનારાયણ સંસ્થા મહુવા દ્વારા આ ફરતું દવાખાનું શરૂ કરવામાં આવ્યું છે.