અભિનેતા ઈમરાન ખાનને બોમ્બે હાઈકોર્ટમાંથી રાહત મળી છે. કોર્ટે તેને ભારત છોડવા માટે મળેલી નોટિસના સંદર્ભમાં 2 નવેમ્બર સુધી વચગાળાનું રક્ષણ આપ્યું છે. આ નોટિસ મુંબઈ સ્થિત ‘ફોરેનર્સ રિજનલ રજિસ્ટ્રેશન ઓફિસ’ (FRRO) દ્વારા આપવામાં આવી હતી, જેમાં ઈમરાન ખાનને 28 ઓક્ટોબર, 2026 સુધીમાં ભારત છોડી દેવાનો આદેશ અપાયો હતો.
આગામી સુનાવણી 2 નવેમ્બરના રોજ થશે
બોમ્બે હાઈકોર્ટમાં ઈમરાન ખાનની અરજી પર હવે સોમવાર, 2 નવેમ્બરના રોજ બપોરે 3:00 વાગ્યે સુનાવણી હાથ ધરવામાં આવશે. આ વચગાળાની રાહત બાદ હવે આ મામલે આગળની કાર્યવાહી થશે.
વિરોધ પ્રદર્શનમાં ભાગ લીધા બાદ નોટિસ આપવામાં આવી
ઈમરાન ખાને 10 ઓક્ટોબરે મુંબઈમાં એક વિરોધ પ્રદર્શનમાં ભાગ લીધો હતો, જેમાં મુખ્ય ચૂંટણી કમિશનર જ્ઞાનેશ કુમારના રાજીનામાની માંગ કરવામાં આવી હતી. આ પ્રદર્શન દરમિયાન પોલીસે તેમની અટકાયત કરી હતી. ઈમરાન અમેરિકાના નાગરિક છે અને તેમની પાસે ‘ઓવરસીઝ સિટિઝન ઓફ ઈન્ડિયા’ (OCI) કાર્ડ છે. વિરોધ પ્રદર્શનમાં ભાગ લીધા બાદ તેમની સામે કાર્યવાહી કરવામાં આવી અને FRRO દ્વારા તેમને 28 ઓક્ટોબર, 2026 સુધીમાં ભારત છોડવા માટેની નોટિસ આપવામાં આવી હતી.
આ કાર્યવાહીને ખોટી અને ગેરકાયદેસર ગણાવતા ઈમરાન ખાને બોમ્બે હાઈકોર્ટમાં અરજી દાખલ કરી છે. તેમણે કોર્ટને વિનંતી કરી છે કે આ નોટિસ રદ કરવામાં આવે અને તેમને દેશનિકાલ કરવા જેવી કોઈપણ કાર્યવાહી સામે રક્ષણ આપવામાં આવે.
ઈમરાન ખાને નોટિસને પડકારી
પોતાની અરજીમાં ઈમરાન ખાને માંગ કરી છે કે અધિકારીઓને તેમને દેશનિકાલ કરતા, તેમની વિરુદ્ધ ‘લુક આઉટ સર્ક્યુલર’ (LOC) જારી કરતા, તેમને બ્લેકલિસ્ટ કરતા અથવા તેમના OCI દરજ્જા અંગે કોઈ પ્રતિકૂળ પગલાં લેતા રોકવામાં આવે.
ઈમરાનનું કહેવું છે કે નોટિસમાં એ સ્પષ્ટ કરવામાં આવ્યું નથી કે તેમણે કયા કાયદાનું ઉલ્લંઘન કર્યું છે. તેમણે એવો પણ સવાલ ઉઠાવ્યો છે કે નોટિસ જારી કરતા પહેલા તેમને પોતાનો પક્ષ રજૂ કરવાની તક કેમ આપવામાં આવી નહીં અને કોઈ તપાસ કેમ કરવામાં આવી નહીં.
તેમણે વધુમાં ધ્યાન દોર્યું કે નોટિસમાં તેમને માત્ર અમેરિકાના નાગરિક તરીકે દર્શાવવામાં આવ્યા છે પરંતુ તેમના OCI કાર્ડનો કોઈ ઉલ્લેખ કે વિચાર કરવામાં આવ્યો નથી. ઈમરાનના જણાવ્યા અનુસાર, તેણે તેના OCI કાર્ડ સાથે જોડાયેલી કોઈપણ શરતનું ઉલ્લંઘન કર્યું નથી.
વિરોધ પ્રદર્શન અંગે ઈમરાને શું કહ્યું?
પોતાની અરજીમાં ઈમરાન ખાને જણાવ્યું છે કે, 10 ઓક્ટોબરે થયેલા વિરોધ પ્રદર્શન દરમિયાન તેમણે પોલીસના બેરિકેડ્સ ઓળંગવાનો કોઈ પ્રયાસ કર્યો ન હતો. તેમના કહેવા મુજબ પોલીસે તેમને ત્યાંથી જતા રહેવા માટે કહ્યું ત્યારે તેઓ પોતાની કાર તરફ પાછા ફરી રહ્યા હતા તે જ સમયે તેમને કસ્ટડીમાં લઈ લેવામાં આવ્યા હતા. તે જ સાંજે તેમને મુક્ત કરી દેવામાં આવ્યા હતા.
તેમણે વધુમાં દલીલ કરી હતી કે, માત્ર વિરોધ પ્રદર્શનમાં ભાગ લેવો એ વિદેશી નાગરિકો અથવા OCI (ઓવરસીઝ સિટિઝન ઓફ ઈન્ડિયા) કાર્ડધારકોને લાગુ પડતા નિયમોનું ઉલ્લંઘન ગણી શકાય નહીં. તેમણે એવો પ્રશ્ન પણ ઉઠાવ્યો હતો કે, જે FIR હજુ તપાસ હેઠળ છે તેના આધારે તેમને ભારત છોડી દેવાની નોટિસ કેવી રીતે આપી શકાય?
કિરીટ સોમૈયાની ફરિયાદ બાદ નોટિસ જારી કરવામાં આવી
ભાજપના નેતા કિરીટ સોમૈયાએ ઈમરાન ખાન વિરુદ્ધ ફરિયાદ નોંધાવી હતી. તેમણે આરોપ લગાવ્યો હતો કે, 10 ઓક્ટોબરે મુંબઈમાં ઓગસ્ટ ક્રાંતિ મેદાન નજીક યોજાયેલા વિરોધ પ્રદર્શનમાં ભાગ લઈને ઈમરાન ખાને કાયદાનું ઉલ્લંઘન કર્યું છે.
આ વિરોધ પ્રદર્શનમાં મુખ્ય ચૂંટણી કમિશનર જ્ઞાનેશ કુમારના રાજીનામાની માંગ કરવામાં આવી હતી. સોમૈયાની ફરિયાદ બાદ પોલીસે આ મામલો FRRO (ફોરેનર્સ રિજનલ રજિસ્ટ્રેશન ઓફિસ)ને સોંપ્યો હતો, જેણે ત્યારબાદ ઈમરાનને 28 ઓક્ટોબર સુધીમાં ભારત છોડી દેવા માટેની નોટિસ જારી કરી હતી. ઈમરાને હવે બોમ્બે હાઈકોર્ટમાં આ નોટિસને પડકારી છે.
