અક્ષય ખન્નાની ઇક્કા મુવી ડાયરેક્ટર સિદ્ધાર્થ પી મલ્હોત્રા ઇન્ટરવ્યૂ, ધુરંધરની સફળતા બાદ અક્ષય ખન્નામાં આવ્યો બદલાવ?

મનોરંજન ન્યૂઝ | અક્ષય ખન્ના અને સની દેઓલની મુવી ઇક્કા નેટફ્લિક્સ પર રિલીઝ થવાની છે, આ લીગલ થ્રિલર ફિલ્મ છે જેમાં સની દેઓલનો સામનો અક્ષય ખન્ના સાથે થશે. જોકે આ ફિલ્મમાં એક નવો ટર્ન છે.

ઇક્કા મુવીમાં  અક્ષય ખન્ના અને સની દેઓલ બન્ને દિગ્ગજ કલાકારો સામસામે લડવાને બદલે એક જ પક્ષ તરફથી કોર્ટમાં તિલોત્તમા શોમ સામે કેસ લડતા જોવા મળશે.‘ઇક્કા’ પાસે પોતાની કેટલીક ખાસ ચાલ છે, જે આ કોર્ટરૂમ ડ્રામાને વધુ રસપ્રદ બનાવે છે.

ડિરેક્ટર સિદ્ધાર્થ પી મલ્હોત્રાએ ‘સ્ક્રીન’ સાથેની વિશેષ વાતચીતમાં કોર્ટરૂમ ડ્રામા સ્ટાઇલ પ્રત્યેના તેમના લગાવ, સની દેઓલની જૂની છાપને જાળવીને નવો લીગલ અવતાર આપવા અને ‘ધુરંધર’ પછી અક્ષય ખન્ના સાથે કામ કરવા અંગે વાત કરી હતી. 

ઇક્કા મુવી ડાયટરેક્ટ ઇન્ટરવ્યૂ 

ડાયલોગના મુખ્ય અંશો

તમને વારંવાર કોર્ટરૂમ ડ્રામા તરફ કઈ બાબત આકર્ષિત કરે છે?

હું અત્યારે ત્રીજી સ્ક્રિપ્ટ પર કામ કરી રહ્યો છું, જે આ જ સ્ટાઇલની છે. તે મારી કોર્ટરૂમ ટ્રિલોજી (ત્રણ ફિલ્મોની શ્રેણી) બની જશે. (હસે છે) મને નથી ખબર કે આ સ્ટાઇલમાં એવું શું છે. આ એક એવો વિષય છે જે મારી પ્રથમ ફિલ્મ ‘વી આર ફેમિલી’ના સમયથી મારી પાસે હતો. 

વાસ્તવમાં આ એવી પહેલી ફિલ્મ છે જે હું બનાવવા માંગતો હતો. હું ધર્મા પ્રોડક્શન્સના દિવસોથી આ વાર્તા કહેવાનો પ્રયત્ન કરી રહ્યો હતો. મેં કરણ જોહરને કહ્યું હતું કે, “મારે આ ફિલ્મ બનાવવી છે.” તેમણે કહ્યું, “હા, ચોક્કસ, આપણે તેના પર કામ કરીશું.” પરંતુ તે શક્ય ન બન્યું હતું. ત્યારબાદ હું આદિત્ય ચોપરા પાસે ગયો. હું ત્યાં આ ફિલ્મ બનાવવા માંગતો હતો. આદિત્ય ચોપરાએ મારી સાથે સ્ક્રિપ્ટ પર કામ કર્યું હતું. 

‘ઇક્કા’માં તેમને લેખનનું ક્રેડિટ પણ આપવામાં આવ્યું છે. આ રીતે આ ફિલ્મે એક લાંબી સફર ખેડી છે. અંતે જ્યારે આ ફિલ્મ બની, ત્યારે સની દેઓલ, અક્ષય ખન્ના અને નેટફ્લિક્સ સાથે શ્રેષ્ઠ રીતે શક્ય બની છે.

આ સ્ટાઇલ વિશે વાત કરું તો, ‘હિચકી’ પછી મને આ સ્ટોરી મળી, જે મને લાગ્યું કે કહેવી જરૂરી છે અને તેમાંથી ‘મહારાજ’ બની. ત્યારબાદ હું નેટફ્લિક્સ માટે સની સર સાથે બીજી એક ફિલ્મ પર કામ કરી રહ્યો હતો, આ ફિલ્મ પર નહીં. કોઈ કારણોસર તે ફિલ્મ ન બની શકી. તેમણે મને પૂછ્યું, “શું તમારી પાસે એવું કંઈક છે જે આપણે સની સર સાથે કરી શકીએ?” મેં કહ્યું, “મારી પાસે ઇક્કા છે.” 

સની સરને આ સ્ટોરી હંમેશાં ગમતી હતી. મેં તેમને આશરે દોઢ વર્ષ પહેલાં ‘બટવારા’ના સેટ પર આ સ્ટોરી સંભળાવી હતી. તેમણે પૂછ્યું, “શૌર્યમનની ભૂમિકા કોણ ભજવશે?” મેં કહ્યું, “સર, હું અક્ષય ખન્નાને લેવા માંગું છું.” તેમણે પૂછ્યું, “શું તે તૈયાર થશે?”

મેં અક્ષયને ફોન કર્યો. સ્ક્રિપ્ટ આપ્યાના બે જ દિવસમાં તેનો ફોન આવ્યો અને તેણે હા પાડી દીધી. આ ગત સપ્ટેમ્બર મહિનાની વાત છે. ઓક્ટોબરમાં કરાર સાઇન થયા. અમે લુક ટેસ્ટ કર્યો, નવેમ્બરમાં શૂટિંગ શરૂ કર્યું અને ડિસેમ્બરમાં પૂરું કર્યું હતું. 

કોઈ મને મારી રીતે આ ફિલ્મ બનાવવા દે તે માટે નવ વર્ષ કરતાં વધુ સમય લાગ્યો. હું નવ વર્ષથી આ વાર્તા સાથે જીવી રહ્યો હતો. પરંતુ જ્યારે અમે શૂટિંગ શરૂ કર્યું, ત્યારે માત્ર 30 શિફ્ટમાં કામ પૂરું કરી લીધું હતું.

‘દામિની’માં વકીલ તરીકેની સની દેઓલની ભૂમિકા આજે પણ યાદગાર છે. શું તે લોકપ્રિયતાના કારણે ‘ઇક્કા’માં તેનું પાત્ર તૈયાર કરતી વખતે કોઈ દબાણ હતું?

તમારે ચાહકોની અપેક્ષાઓનું ધ્યાન રાખવું પડે છે. જો હું તેમ ન કરું તો ચાહકો નિરાશ થશે કારણ કે તેઓ એક ચોક્કસ અપેક્ષા સાથે આવે છે. ‘દામિની’માં રાજકુમાર સંતોષીએ જે પાત્ર બનાવ્યું હતું તે સામાન્ય માણસ માટે લડે છે. જોકે, અહીં ‘ઇક્કા’માં તેઓ એક અમીર વકીલ છે જે એવા કેસ માટે લડી રહ્યા છે જેના માટે તેઓ સામાન્ય સંજોગોમાં ન લડત. 

તેથી આ ફિલ્મમાં તેમના પાત્રના ઉદ્દેશ્યો ‘દામિની’ જેવા ન હોઈ શકે. જો તેમને વિકલ્પ આપવામાં આવે તો તેઓ એ છોકરી માટે લડ્યા હોત જે પોતાના જીવનની લડાઈ લડી રહી છે.

 તેના બદલે, તેઓ અક્ષયના પાત્રનો બચાવ કરી રહ્યા છે. તેથી અહીં એક નૈતિક દ્વિધા છે. આ પાત્ર ભાવનાત્મક રીતે સાચા કારણોસર આ કામ કરી રહ્યું છે, પરંતુ તે નૈતિક રીતે સાચું છે કે ખોટું, તે જ આ ફિલ્મનો મુખ્ય રોમાંચ છે.

‘ધુરંધર’ રિલીઝ થઈ અને અક્ષય ખન્ના ફરીથી રાતોરાત ચર્ચામાં આવ્યા, ત્યારે તમે શૂટિંગ કરી રહ્યા હતા. શું તેનાથી તેના પાત્ર પ્રત્યેના તમારા અભિગમમાં કોઈ ફેરફાર થયો?

જ્યારે અમે તૈયારી કરી રહ્યા હતા ત્યારે ‘ધુરંધર’નું શૂટિંગ ચાલી રહ્યું હતું. અમે શૂટિંગ શરૂ કર્યું ત્યારે તે રિલીઝ થવાની તૈયારીમાં હતી અને અમારા શૂટિંગ દરમિયાન જ તે રિલીઝ થઈ. તેથી આ બધું એકસાથે થયું. અક્ષય એવા વ્યક્તિ છે જે સફળતાને માથે નથી ચડાવતા અને નિષ્ફળતાને દિલ પર નથી લેતા. 

તે ઈન્ટરવ્યુ નથી આપતા કે બહુ વાત નથી કરતા, તેનો અર્થ એ નથી કે તેઓ અલગ છે. તેઓ જમીન સાથે જોડાયેલા માણસ છે. હું તેમને હવે એક મિત્ર તરીકે ઓળખું છું અને તેઓ પોતાની બાબતોમાં બહુ સ્પષ્ટ છે.

કોઈપણ ડિરેક્ટર કે ફિલ્મમેકર માટે તેઓ કામ કરવા માટે સૌથી સરળ કલાકારોમાંથી એક છે, કારણ કે તેઓ જે કહે છે તેનો અર્થ એ જ હોય છે. તેમના જીવનમાં કોઈ ગૂંચવણ નથી. તેઓ એ પણ જાણતા હતા કે આ એક તબક્કો છે. તેમણે કહ્યું હતું, “મેં એક કલાકાર તરીકે મારું કામ કર્યું છે. આ ક્રેઝ એક ચોક્કસ રીતે આવ્યો છે અને આ સમય પણ પસાર થઈ જશે.” અક્ષય સફળતાના ભ્રમમાં નથી રહેતા. 

તેમણે મને કહ્યું હતું, “તું કોઈ દબાણ ન લે. તું બસ તારી ફિલ્મ બનાવ. એ ધ્યાન રાખ કે ફિલ્મ સારી બને.” તેથી મેં તેના કારણે કોઈ દબાણ લીધું ન હતું. આ સિવાય, આદિત્ય મારો સારો મિત્ર છે. હું આદિત્યને ત્યારથી ઓળખું છું જ્યારે તે એક રાઈટર તરીકે આવ્યો હતો. 

તે ધર્મા પ્રોડક્શન્સમાં ફિલ્મ બનાવવાનો પ્રયત્ન કરી રહ્યો હતો. મને તેના પ્રત્યે થોડો પક્ષપાત છે કારણ કે હું ખરેખર માનું છું કે તે ખૂબ જ સારો વ્યક્તિ છે. તેથી આદિત્ય જે પણ કરે, હું બસ એ જ ઈચ્છું છું કે તેની ફિલ્મ ખૂબ જ સફળ થાય.

‘કાલા હિરણ’ વિવાદમાં સલમાન ખાનને કોઈ રાહત નહીં! દિલ્હી હાઈકોર્ટે વધુ એક મોટું પગલું ભર્યું

કેમ ફિલ્મ થિયેટરમાં નહિ અને ડાયરેક્ટ ઓટીટી પ્લેટફોર્મ પર રિલીઝ કરવાનો નિર્ણય લીધો?

જુઓ, આ વાત મને આદિત્યએ કહી હતી કારણ કે તેઓ સાચા અર્થમાં લીડર છે. તેમણે કહ્યું હતું, “આજે થિયેટર અને ઓટીટી વચ્ચેની રેખાઓ ભૂંસાઈ ગઈ છે. તમે એક ફિલ્મમેકર છો. તમારી પાસે કહેવા માટે એક વાર્તા છે. કોઈ તમને તે સ્ટોરી કહેવાની તક આપી રહ્યું છે.” મારા માટે, મોનિકા શેરગિલ અને નેટફ્લિક્સ મને મારી વાર્તાઓ કહેવાની તક આપી રહ્યા છે. મારે તેના માટે આભારી હોવું જોઈએ. 

‘મહારાજ’ વખતે, આદિત્યએ મારી માત્ર બે ફિલ્મો જોઈને મારા પર વિશ્વાસ મૂક્યો હતો અને કહ્યું હતું કે, “તે એક સરસ ફિલ્મ બનાવશે.” નહિતર કોઈએ તે ફિલ્મ ન બનાવી હોત. તેમણે આ ફિલ્મ બનાવી કારણ કે તેમને ફિલ્મમાં વિશ્વાસ હતો. તેમણે વેચાણ કે કમર્શિયલ ગણતરીઓ નહોતી જોઈ. મોનિકાનો વિશ્વાસ પણ આવો જ છે.

તેથી મારી પાસે થિયેટર વિરુદ્ધ ઓટીટી પ્લેટફોર્મ અંગે કોઈ ચર્ચા નથી. હું સાચે જ માનું છું કે ભલે તે યુટ્યુબ ફિલ્મ હોય કે કોઈ નાટક, જ્યાં સુધી વાર્તા કહેવાઈ રહી છે ત્યાં સુધી તે કહેવી જોઈએ. જો હું એમ કહું કે મને થિયેટરનો અનુભવ પસંદ નથી, તો તે જૂઠું હશે. પરંતુ આપણે જે સમયમાં જીવી રહ્યા છીએ, હું કોઈ ભ્રમમાં નથી. 

જો મને સ્ટોરી કહેવાની તક મળી રહી છે, તો મારે તે કહેવી જોઈએ. આજની ઓડિયન્સ માફ નથી કરતી. જો તમે તેમને તેમના સમય અને પૈસાની કિંમતનું કંઈક નહીં આપો, તો તેઓ તમને બીજી તક નહીં આપે. અને હું ભલે ગમે તેટલો સારો કે પ્રતિભાશાળી હોઉં, મને બીજું કામ નહીં મળે. તમારે પરિણામ આપવું જ પડે છે.

તિલોત્તમા શોમ અને દિયા મિર્ઝા આ ફિલ્મમાં નૈતિક માર્ગદર્શકની ભૂમિકામાં દેખાય છે.

તિલોત્તમાની ભૂમિકા એક એવી વ્યક્તિની છે જેણે પોતાની આખી કરિયરમાં સની સરને પોતાના આદર્શ માન્યા છે. તેણીએ તેમના પુસ્તકોનો અભ્યાસ કર્યો છે અને ક્યારેય વિચાર્યું ન હતું કે એક દિવસ તે અર્જુન મહેરા, જેને ‘ઇક્કા’ કહેવામાં આવે છે, તેની સામે ઊભી રહેશે. તેને ‘ઇક્કા’ એટલા માટે કહેવામાં આવે છે કારણ કે તે કેસ જીતવા માટે હંમેશાં છેલ્લી ઘડીએ બ્લેક એક્કો ફેંકે છે. 

તે એક મહિલા તરીકે પોતાની સફરમાંથી પસાર થાય છે, એ સમજે છે કે બાળકનો બચાવ કરવાનો અર્થ શું થાય છે, મહિલાઓ સાથે કેવો વ્યવહાર થાય છે, તેમને કેવી રીતે જોવામાં આવે છે અને કોર્ટમાં તેઓ શેમાંથી પસાર થાય છે. તેને એક દીકરી છે, તેનું પોતાનું જીવન છે, તેથી તે પોતાની ભાવનાત્મક સફર સાથે ચાલે છે. 

સમય જતાં, તે આ વ્યક્તિને એક મેન્ટર (માર્ગદર્શક) તરીકે જોવા લાગે છે. એક તબક્કે તે મેન્ટરની પ્રતિષ્ઠા ઓછી થાય છે અને પછી તે ફરી બેઠો થાય છે. આ રીતે ફિલ્મમાં તેનું પાત્ર સંપૂર્ણ રીતે વિકસે છે.

અને દિયાની વાત કરીએ તો, તે ખૂબ જ સારી અભિનેત્રી અને અદ્ભુત માણસ છે. અમે મિત્રો છીએ, મેં તેની સાથે પહેલાં પણ કામ કર્યું છે અને હું તેને તથા તેના પતિને ઘણા સમયથી ઓળખું છું. શરૂઆતમાં આ રોલ ઘણો નાનો હતો. મેં તેને કહ્યું, “આપણે સાથે કામ કરીશું અને આ પાત્રને વધુ મજબૂત (badass) બનાવીશું.” અમે તેમ જ કર્યું. 

તે સની સરની પત્નીની ભૂમિકા ભજવી રહી છે. વાર્તાના ભૂતકાળ અને વર્તમાન બંને સાથે તેનો ઘણો સંબંધ છે. તે પોતે પણ એક વકીલ છે અને કાયદાની બારીકીઓ સમજે છે, જે તમે ફિલ્મમાં જોશો.

શું તમે અત્યારથી જ સિક્વલ વિશે વિચારી રહ્યા છો?

આ એક ફ્રેન્ચાઈઝી ફિલ્મ છે. આ એક એવી ફિલ્મ છે જે આગળ વધી શકે છે કારણ કે તે ‘ધ લિંકન લોયર’ જેવી છે. તે ‘ઇક્કા’ તરીકે જાણીતો છે કારણ કે તે કાળીના એક્કા સાથે આવે છે. દરેક સિક્વલમાં એક તદ્દન નવો કેસ હોઈ શકે છે. 

તમારે દરેક ફિલ્મમાં એક જ કેસ ચાલુ રાખવાની જરૂર નથી. વકીલ અને તેનું જીવન આગળ વધે છે. તેની ફરી કસોટી થશે, પરંતુ કેસ સંપૂર્ણપણે નવો હોઈ શકે છે. કદાચ ‘ઇક્કા 2’ માં તે સામાન્ય માણસ માટે લડતો જોવા મળે અને ત્યારે તમે ‘દામિની’વાળા સની દેઓલને જોઈ શકો છો.

તમારી આગામી ચર્ચિત ફિલ્મ ‘કમલ ઔર મીના’ વિશે તમે શું કહેશો?

હું આશા રાખું છું કે મારી આગામી ફિલ્મ તે જ હોય, પરંતુ હું એક મ્યુઝિકલ લવ સ્ટોરી પર પણ કામ કરી રહ્યો છું, જે એક સિરીઝ છે. હું શ્વાન (ડોગ) પર આધારિત એક ફિલ્મ પર પણ કામ કરી રહ્યો છું, જે પાલતુ પ્રાણીઓ વિશે છે. તેથી તે પણ એક સાવ અલગ શૈલી છે. મને લાગે છે કે આ પ્રકારની છેલ્લી ફિલ્મ આપણે ‘૭૭૭ ચાર્લી’ જોઈ હતી.

તેથી હા, હું કેટલાક આઈડિયા પર કામ કરી રહ્યો છું. જોઈએ તે ક્યાં સુધી પહોંચે છે. ‘કમલ ઔર મીના’ વિશે વાત કરું તો, મને આશા છે કે કાસ્ટિંગ નક્કી થયા પછી તે શરૂ થશે, કારણ કે તે સૌથી મોટો પડકાર છે. મીના કુમારીની ભૂમિકા કોણ ભજવશે? કમલ અમરોહીની ભૂમિકા કોણ ભજવશે? કમલ અમરોહીની પ્રથમ પત્ની મહેબૂબી જીની ભૂમિકા કોણ ભજવશે?

 આ ફિલ્મ સત્તાવાર રીતે અમરોહી પરિવાર દ્વારા પ્રોડ્યુસ કરવામાં આવી રહી છે. સ્ક્રિપ્ટ ખૂબ જ શાનદાર બની છે. આ એક ખર્ચાળ ફિલ્મ પણ છે. તેથી આજના સમયમાં, મેં કહ્યું તેમ, ફિલ્મો બનાવવી મુશ્કેલ છે. આ ફિલ્મમાં હું માત્ર ડિરેક્ટર છું. પ્રોડ્યુસર તરીકે ઘણા બધા પાસાઓ એકસાથે આવવાના બાકી છે, ત્યારપછી જ ફિલ્મ વાસ્તવિકતા બની શકશે.

જુનાઈદ ખાને તાજેતરમાં ખુલાસો કર્યો હતો કે તમે મૂળભૂત રીતે ‘એક દિન’ ડિરેક્ટ કરવાના હતા.

તે મૂળ મારી સ્ક્રિપ્ટ હતી. હું તેને ડિરેક્ટ કરવા માંગતો હતો. પરંતુ તે સમયે હું બીજી ફિલ્મ પર કામ કરી રહ્યો હતો, તેથી હું તેને ડિરેક્ટ ન કરી શક્યો. પછી આમિર સર મારી પાસે આવ્યા અને કહ્યું, “કૃપા કરીને અમને આ સ્ક્રિપ્ટ અને તેના રાઈટ્સ વેચો.” તેથી મેં સ્ક્રિપ્ટ અને તેના રાઈટ્સ વેચી દીધા હતા.

તમે આ ફિલ્મ જોઈ છે? તમને કેવી લાગી?

તે એક સ્વીટ ફિલ્મ છે. સ્વાભાવિક છે કે દરેક ડિરેક્ટરનો પોતાનો દ્રષ્ટિકોણ હોય છે. સુનીલે ઘણું સારું કામ કર્યું છે. જો હું હોત તો મેં અલગ ફિલ્મ બનાવી હોત કારણ કે મારી શૂટિંગ કરવાની સ્ટાઇલ અને સિનેમાની સમજ અલગ છે. વળી, હું જુનાઈદને ખૂબ જ સારી રીતે ઓળખું છું. તેથી મેં તેને જે રીતે હેન્ડલ કર્યો હોત તે ખૂબ જ અલગ હોત. 

મેં તેને અલગ રીતે શૂટ કર્યો હોત, તેના પર્ફોર્મન્સને અલગ રીતે ડિરેક્ટ કર્યો હોત. હું તેને લગભગ મારા પોતાના દીકરાની જેમ ઓળખું છું. કારણ કે જ્યારે તમે કોઈ નવા એક્ટરને લોન્ચ કરો છો, ત્યારે તમે તે વ્યક્તિની જવાબદારી લો છો. તમે તેમની સાથે ભાવનાત્મક રીતે જોડાઈ જાઓ છો. સૌથી મહત્વની વાત એ છે કે, હું બરાબર જાણું છું કે તેની સાથે કઈ બાબતો નથી કરવાની.