રાત્રે પાણીમાં મીઠું નાખી પગ બોળવાના ફાયદા અને સાવચેતી

લાંબા અને વ્યસ્ત દિવસ પછી જેમાં તમે કલાકો સુધી ઊભા રહ્યા હોવ અથવા સતત હલનચલન કરતા રહ્યા હોવ, સાંજ સુધીમાં તમારા પગ સંપૂર્ણપણે થાકી જાય છે. ઘણીવાર તેના કારણે થતો દુખાવો, ભારેપણું અને સ્નાયુઓનો ખેંચાવ એટલો વધી જાય છે કે તે તમારી રાતની સારી ઊંઘમાં પણ ખલેલ પહોંચાડે છે. જો તમને નિયમિતપણે આ સમસ્યાનો સામનો કરવો પડતો હોય તો સૂતા પહેલા એક સરળ ઘરેલું ઉપાય અજમાવી જુઓ. “ફૂટ સોકિંગ” (પગને પાણીમાં પલાળવા) એટલે કે તમારા પગને 10-15 મિનિટ માટે થોડા સાદા મીઠાવાળા હુંફાળા પાણીમાં ડુબાડી રાખવા. આ હુંફાળું પાણી સ્નાયુઓને આરામ આપવામાં અને પગનો થાક દૂર કરવામાં મદદ કરે છે.

કાયરોપ્રેક્ટર અને શરીરની મુદ્રા તથા કરોડરજ્જુના સંતુલનના નિષ્ણાત ડૉ. હરીશ ગ્રોવર સૂચવે છે કે, ગરમ મીઠાવાળા પાણીમાં પગ ડુબાડી રાખવાની સાથે જો ગરદન પર ‘કોલ્ડ પેક’ મૂકવામાં આવે, તો તેનાથી બેવડો ફાયદો થાય છે. તે ગરદનના દુખાવા અને પગની અસ્વસ્થતા બંનેમાંથી રાહત આપે છે. વધુમાં જો તમે આ ગરમ પાણીમાં ‘એપ્સમ સોલ્ટ’ ઉમેરો છો તો તે તમારા પિંડીઓના સ્નાયુઓને શાંત કરી શકે છે, સાયટિકાના દુખાવામાં રાહત આપી શકે છે અને રાત્રે સારી ઊંઘ લાવવામાં મદદરૂપ થઈ શકે છે.

એપ્સમ સોલ્ટ એ એક ખનિજ સંયોજન છે જે દેખાવમાં સામાન્ય સફેદ મીઠા જેવું જ લાગે છે પરંતુ તેની રચના સંપૂર્ણપણે અલગ હોય છે. આ દ્રાવણમાં 15 મિનિટ સુધી પગ ડુબાડી રાખવાથી પગનો થાક દૂર થાય છે, તણાવ ઘટે છે, કબજિયાતમાં રાહત મળી શકે છે અને સ્નાયુઓને આરામ મળે છે. ચાલો જાણીએ કે દરરોજ હુંફાળા પાણીમાં પગ ડુબાડી રાખવાથી તમારા શરીરને કયા વિવિધ ફાયદા થઈ શકે છે.

તમારા પગને હુંફાળા પાણીમાં ડુબાડો છો ત્યારે શું થાય છે?

‘યોગા જર્ની’ ના મધુ ચૌધરી એક વીડિયોમાં સમજાવે છે કે, હુંફાળા પાણીમાં પગ ડુબાડવા એ દિવસભર જમા થયેલા થાક, પગના દુખાવા અને સ્નાયુઓની જકડન દૂર કરવા માટેનો એક સરળ અને અસરકારક ઘરેલું ઉપાય છે. ત્રણ ચોક્કસ સામગ્રીઓ મિશ્રિત પાણીમાં માત્ર 10 મિનિટ સુધી પગ ડુબાડી રાખવાથી અને ત્યારબાદ તળિયાની માલિશ કરવાથી શરીરને આરામ મળે છે. આ પ્રક્રિયા શરીરને ડિટોક્સિફાય (ઝેરી તત્વો મુક્ત) કરવામાં મદદ કરે છે અને વિવિધ બીમારીઓને દૂર રાખવામાં પણ સહાયક બની શકે છે. લાંબા સમય સુધી ચાલવાથી કે ઊભા રહેવાથી પગના સ્નાયુઓ પર દબાણ આવે છે હુંફાળા પાણીની ગરમી આ સ્નાયુઓને હળવાશ આપે છે, જેનાથી સામાન્ય દુખાવા, જકડન અને થાકમાંથી કામચલાઉ રાહત મળે છે.

આ પણ વાંચો: અજમો અને કાળું મીઠું ખાવાના ફાયદા, માત્ર 15 મિનિટમાં દેખાશે આ મોટા બદલાવ

તમારા પગને હુંફાળા પાણીમાં ડુબાડી રાખવાથી પગની ઉપરની રક્તવાહિનીઓ વિસ્તરે છે, જેનાથી તે ભાગમાં રક્તપ્રવાહ કામચલાઉ ધોરણે વધે છે. આ રીતે પગને પાણીમાં ડુબાડીને આરામથી બેસવાથી સમગ્ર શરીરને રાહત મળે છે, જે દિવસભર જમા થયેલા તણાવ અને માનસિક થાકને ઘટાડવામાં મદદરૂપ થઈ શકે છે. સૂતા પહેલાં પગને હુંફાળા પાણીમાં રાખવાથી ઊંઘની ગુણવત્તામાં પણ સુધારો થઈ શકે છે. કેટલાક નાના પાયાના અભ્યાસો સૂચવે છે કે હુંફાળા પાણીમાં પગ રાખવાથી સારી ઊંઘ આવે છે.

હુંફાળા પાણીમાં ઉમેરવા માટેની ત્રણ સામગ્રીઓ

મધુ ચૌધરીના જણાવ્યા અનુસાર, એક ડોલ અડધી ભરાય તેટલું હુંફાળા પાણી લો. ધ્યાન રાખો કે પાણીનું તાપમાન એટલું હોય કે તમે તેમાં સરળતાથી પગ રાખી શકો. પાણીમાં બે મોટી ચમચી સિંધવ મીઠું  ઉમેરો. હુંફાળું પાણી સ્નાયુઓને આરામ આપવામાં મદદ કરે છે, જ્યારે મીઠું સ્નાયુઓની જકડન દૂર કરવામાં મદદરૂપ થાય છે. ત્યારબાદ તેમાં બે મોટી ચમચી વિનેગર (સરકો) ઉમેરો, જે શરીરના pH સ્તરને સંતુલિત કરવામાં, એસિડિટી ઘટાડવામાં અને પાચન સુધારવામાં મદદ કરે છે. આ ઉપરાંત એક ઇંચ આદુને છીણીને પાણીમાં ઉમેરો. તમારા પગને દસ મિનિટ સુધી પાણીમાં ડુબાડી રાખો. જોકે આ પ્રક્રિયા દિવસમાં ગમે ત્યારે કરી શકાય છે પરંતુ રાત્રે સૂતા પહેલાં તે સૌથી વધુ અસરકારક રહે છે. પગને બહાર કાઢીને કોરા કર્યા પછી પગના તળિયા, આંગળીઓ અને આંગળીઓની વચ્ચેની જગ્યા પર હળવા હાથે માલિશ કરો. આનાથી તમારા પગને વધુ આરામ મળશે.

આ પણ વાંચો: દિવાળી પર બજેટમાં કરો હોમ ડેકોરેશન, ફુગ્ગાની મદદથી ઘરે જ બનાવો આકર્ષક ડિઝાઇનર હેંગિંગ બોલ્સ

કોણે સાવચેતી રાખવી જોઈએ? 

ડાયાબિટીસ (મધુપ્રમેહ)ને કારણે પગમાં સંવેદના ઓછી થઈ શકે છે તેથી જેમને ડાયાબિટીસ હોય તેમણે ડૉક્ટરની સલાહ લીધા વિના આ ઉપાય ન કરવો જોઈએ. જો તમને પગમાં ઘા હોય, ત્વચાનો ચેપ હોય અથવા રક્ત પરિભ્રમણને લગતી ગંભીર સમસ્યાઓ હોય તો તબીબી સલાહ વિના પગને પાણીમાં ડુબાડવાનું ટાળવું જોઈએ. ખાતરી કરો કે પાણી બહુ ગરમ ન હોય અને પગને પાણીમાંથી બહાર કાઢ્યા પછી આંગળીઓની વચ્ચેની ત્વચાને બરાબર કોરી કરી લો.

Disclaimer: આ માહિતી ‘યોગા જર્ની’ (Yoga Journey) વીડિયોમાં દર્શાવવામાં આવેલા એક ઘરેલું ઉપાય પર આધારિત છે. વીડિયોમાં શરીરમાંથી ઝેરી તત્વો દૂર કરવા (detoxing) અને રોગો મટાડવા અંગે કરવામાં આવેલા દાવા વૈજ્ઞાનિક રીતે સાબિત થયેલા નથી. જો તમને સતત દુખાવો, સોજો કે સુન્નતાનો અનુભવ થાય તો કૃપા કરીને ડૉક્ટરની સલાહ લો.