80 અને 90ના દાયકામાં બોલિવૂડમાં નીલમ કોઠારી અને ગોવિંદાની જોડીએ ભારે ચર્ચા જગાવી હતી. આ જોડીએ સાથે મળીને 14 ફિલ્મોમાં કામ કર્યું હતું. તેમની પ્રથમ ફિલ્મ ‘લવ 86’ (Love 86) 1986માં રિલીઝ થઈ હતી. પ્રેક્ષકોને તેમની ઓન-સ્ક્રીન કેમિસ્ટ્રી ખૂબ પસંદ આવી હતી. આ દરમિયાન બંને વચ્ચે રોમાન્સની અફવાઓ પણ ફેલાવા લાગી હતી. એવું પણ કહેવામાં આવતું હતું કે ગોવિંદા નીલમના પ્રેમમાં પડ્યા હતા અને તેમની સાથે લગ્ન કરવા માંગતા હતા.
જોકે તે સમયે નીલમ ઘણી નાની હતી. હવે 56 વર્ષની ઉંમરે અભિનેત્રીએ તે અહેવાલો વિશે પહેલીવાર ખુલીને વાત કરી છે. ‘ટાઇમ્સ નાઉ’ સાથેની તાજેતરની મુલાકાતમાં નીલમે ખુલાસો કર્યો કે તે સમયે તેમને એ વાતની જાણ પણ નહોતી કે ગોવિંદા પરિણીત છે.
ઇન્ટરવ્યુ દરમિયાન, જ્યારે તેમને પૂછવામાં આવ્યું કે શું ગોવિંદા તેમને ઓફ-સ્ક્રીન પણ પ્રેમ કરતા હતા ત્યારે તેમણે કહ્યું, “હું ત્યારે ખૂબ નાની હતી. મને ખબર નહોતી કે તેઓ પરિણીત છે. મને તે વિશે પછીથી ખબર પડી.”
નીલમે સમજાવ્યું કે તે સમયે તેમનું સંપૂર્ણ ધ્યાન ફિલ્મોમાં કામ કરવા અને હિન્દી શીખવા પર હતું. તેમના માતા-પિતા પણ ખૂબ કડક હતા, તેથી સંબંધ બાંધવાનો વિચાર તેમના માટે શક્ય જ નહોતો.
આ પણ વાંચો: “મને મારી જિંદગીમાં આ એક વાતનો મોટો અફસોસ છે”, KBC ના મંચ પર બિગ બીએ વ્યક્ત કરી દિલની વેદના
જ્યારે નીલમે ફિલ્મ ઉદ્યોગમાં પ્રવેશ કર્યો ત્યારે તેઓ માત્ર 15 વર્ષની હતી. હોંગકોંગમાં જન્મેલાં નીલમ રજાઓ ગાળવા મુંબઈ આવી હતી, ત્યારે દિગ્દર્શક રમેશ બેહલે તેમને જોઈ અને ‘જવાની’ (Jawaani) ફિલ્મની ઓફર કરી. તેણે આ ફિલ્મથી બોલિવૂડમાં ડેબ્યૂ કર્યું, જે 1984માં રિલીઝ થઈ હતી.
સેટ પર પરિવારના સભ્ય સાથે રહેતા હતા
નીલમે જણાવ્યું કે તેમની નાની ઉંમરને કારણે તેમનો પરિવાર તેમના વિશે ખૂબ ચિંતિત રહેતો હતો. જ્યારે પણ તે શૂટિંગ માટે જતી ત્યારે પરિવારના કોઈ સભ્ય હંમેશા તેની સાથે સેટ પર જતો હતો. જોકે તેણે સ્પષ્ટ કર્યું કે આવું ફિલ્મ ઉદ્યોગ પ્રત્યેના કોઈ ડરને કારણે નહોતું પરંતુ પરિવાર માત્ર વધુ સાવચેતી રાખી રહ્યો હતો કારણ કે તે ખૂબ નાની હતી.
તેણે એ પણ ઉલ્લેખ કર્યો કે સેટ પર તેના સહ-કલાકારો તેનું ખૂબ ધ્યાન રાખતા હતા અને તેની સાથે એક બાળકની જેમ વર્તતા હતા. તેના પતિ સમીર સોનીએ જણાવ્યું હતું કે જેકી શ્રોફ અને સંજય દત્ત પણ નીલમનું ખાસ ધ્યાન રાખતા હતા.
