જીવનશૈલી | રેસીપી | ઉનાળો | ઉનાળા (summer time) ની કાળઝાળ ગરમીમાં જ્યારે કંઈક ઠંડું અને સુગંધિત ખાવાનું મન થાય, ત્યારે ગુલાબ ગુલકંદ આઈસ્ક્રીમ બેસ્ટ ઓપ્શન છે. આ આઈસ્ક્રીમ માત્ર સ્વાદમાં જ લાજવાબ નથી, પણ ગુલકંદના ગુણોને કારણે સ્વાસ્થ્ય માટે પણ ઠંડક આપનારો છે.
બજારમાં મળતા આર્ટિફિશિયલ આઈસ્ક્રીમ કરતા ઘરે બનાવેલો આ મલાઈદાર અને સુગંધિત ગુલાબ ગુલકંદ આઈસ્ક્રીમ મહેમાનો અને બાળકોનો ફેવરિટ બની જશે. અહીં જાણો શાહી આઈસ્ક્રીમ બનાવવાની સરળ રેસીપી
ગુલાબ ગુલકંદ આઈસ્ક્રીમ રેસીપી
સામગ્રી
200 મિલી તાજું ક્રીમ
50 મિલી કન્ડેન્સ્ડ મિલ્ક
1/2 કપ દૂધ
1/2 કપ દૂધ પાવડર
3 ચમચી ગુલાબ શરબત
2 ચમચી ગુલકંદ
ગુલાબની પાંખડીઓ
પિસ્તા સજાવટ માટે
ગુલાબ ગુલકંદ આઈસ્ક્રીમ બનાવવાની રીત
સૌ પ્રથમ એક મોટા બાઉલમાં 200 મિલી તાજું ક્રીમ લો. તેને ઇલેક્ટ્રિક બીટર અથવા વ્હિસ્કની મદદથી ત્યાં સુધી ફેંટો જ્યાં સુધી તે થોડું ઘટ્ટ અને ફ્લફી ન થઈ જાય.
હવે તેમાં 50 મિલી કન્ડેન્સ્ડ મિલ્ક, 1/2 કપ દૂધ અને 1/2 કપ દૂધ પાવડર ઉમેરો. બધું બરાબર મિક્સ કરો જેથી કોઈ ગઠ્ઠા ન રહે. આ મિશ્રણમાં 3 ચમચી ગુલાબ શરબત અને 2 ચમચી ગુલકંદ ઉમેરો. ગુલાબ શરબતથી આઈસ્ક્રીમને સુંદર ગુલાબી રંગ અને મીઠાશ મળશે, જ્યારે ગુલકંદ તેમાં અસલી શાહી સ્વાદ ઉમેરશે.
સમર સ્પેશિયલ વરિયાળી શરબત, શરીરને આપશે ઠંડક
હવે તેમાં થોડી તાજી અથવા સૂકી ગુલાબની પાંખડીઓ અને ઝીણા સમારેલા પિસ્તા ઉમેરી હળવા હાથે મિક્સ કરો. તૈયાર થયેલા મિશ્રણને એક એર-ટાઈટ કન્ટેનરમાં ભરો. ઉપરથી વધારાના પિસ્તા અને ગુલાબની પાંખડીઓ છાંટો. આઈસ્ક્રીમને 7 થી 8 કલાક અથવા આખી રાત માટે ફ્રીઝરમાં સેટ થવા માટે મૂકી દો. ઠંડો-ઠંડો ગુલાબ ગુલકંદ આઈસ્ક્રીમ પછી સર્વ કરો.
