KPSC jobs rip-off : કર્ણાટક પબ્લિક સર્વિસ કમિશન (KPSC)ના ધરપકડ કરાયેલા ચેરમેન શિવશંકરપ્પા સાહુકર 35 કરોડ રૂપિયાના ખર્ચે પોતાના વતનમાં એક મોટું કોમ્પ્લેક્સ બનાવી રહ્યા હતા. આ કોમ્પ્લેક્સમાં શાળા, હોસ્ટેલ, રમતનું મેદાન, મોલ અને કન્વેન્શન હોલ બનાવવાની યોજના હતી. એન્ફોર્સમેન્ટ ડિરેક્ટોરેટ (ઇડી) એ વિશેષ અદાલતમાં જામીન અરજી પર સુનાવણી દરમિયાન આ દાવો કર્યો હતો.
એજન્સીના જણાવ્યા અનુસાર આ ડ્રીમ પ્રોજેક્ટ માટે આર્કિટેક્ચરલ ડિઝાઇન પણ તૈયાર કરવામાં આવી હતી. કર્ણાટકના યાદગીર જિલ્લાના શાહપુરમાં શાહુકારની પત્નીના નામે રહેલી જમીન પર આ કોમ્પ્લેક્સ બનાવવામાં આવનાર હતું. ઇડીએ એ પણ જણાવ્યું કે જાન્યુઆરીમાં યોજાયેલી પશુચિકિત્સા અધિકારીઓની ભરતી પરીક્ષામાં કથિત રીતે લીક થયેલી આન્સર કીના બદલામાં લાંચ આપનાર એક ઉમેદવારના પિતાને પ્રસ્તાવિત સ્કૂલના કેયરટેકર બનાવવાની યોજના હતી.
9 ઉમેદવારો પર આન્સર કી લીક કરવાનો આરોપ
શિવશંકરપ્પા સાહુકર અને કેપીએસસીના સભ્ય બીવી ગીતા પર આરોપ છે કે તેમણે 9 જાન્યુઆરીએ યોજાયેલી વેટરનરી ઓફિસર્સની પરીક્ષા માટે 9 ઉમેદવારોને આન્સર કી ઉપલબ્ધ કરાવી હતી અને બદલામાં 10 લાખ રૂપિયાથી 40 લાખ રૂપિયા સુધીની લાંચ લીધી હતી. ઇડીના જણાવ્યા અનુસાર શાહુકારે ત્રીજો રેન્ક મેળવનાર ઉમેદવારના પિતા પાસેથી 20 લાખ રૂપિયાની કથિત ડીલમાંથી 10 લાખ રૂપિયા લીધા હતા, જ્યારે ગીતાએ પ્રથમ ક્રમ મેળવનાર ઉમેદવાર પાસેથી 40 લાખ રુપિયાની ડીલ અંતર્ગત 20 લાખ રૂપિયા મેળવ્યા હતા.
10 કરોડ રૂપિયાથી વધુની રોકડ લેવડદેવડના આરોપ
તપાસ એજન્સીએ દાવો કર્યો હતો કે શાહુકાર અને રિયલ એસ્ટેટ ઉદ્યોગપતિ એસપી દયાનંદ વચ્ચે 10 કરોડ રૂપિયાથી વધુની રોકડ લેવડદેવડ થઈ હતી. જેમાં ઓગસ્ટ 2025 થી ડિસેમ્બર 2025 વચ્ચે 4.99 કરોડ રૂપિયાની લેણદેણનો સમાવેશ થાય છે. ઇડીના જણાવ્યા અનુસાર 18 થી 24 ઓગસ્ટ દરમિયાન શાહુકારના ઘરે કરવામાં આવેલી તલાશીમાં એક નોટબુક અને કેટલાક કાગળો મળી આવ્યા હતા, જેમાં પરીક્ષાના ઉમેદવારો અને પૈસાની લેવડદેવડ નોંધવામાં આવી હતી.
બચાવ પક્ષે જામીન માટે આવી દલીલ કરી
શાહુકારના વકીલ સીએચ હનુમંતરાયે જામીનની તરફેણમાં દલીલ કરતા કહ્યું હતું કે તેમના અસીલને પ્રિવેન્શન ઓફ મની લોન્ડરિંગ એક્ટ (પીએમએલએ) હેઠળ રાહત આપવી જોઈએ, કારણ કે તેમના પર એક કરોડ રૂપિયાથી વધુની ગુના દ્વારા હસ્તગત કરેલી સંપત્તિ મેળવવાનો વ્યક્તિગત આરોપ નથી. જોકે ઇડીના વકીલ માહેશ્વરી ડીએમએ તેનો વિરોધ કર્યો હતો. તેમણે કહ્યું કે ફરિયાદી ફરિયાદ દાખલ થયા પછી જ એક કરોડ રૂપિયાની વૈધાનિક મર્યાદા નક્કી કરી શકાય છે.
ઉપરાંત કથિત ગુનાને ફક્ત એક ઉમેદવાર સાથે સંકળાયેલા વ્યવહારો સુધી મર્યાદિત તરીકે જોઈ શકાતું નથી, પરંતુ કેપીએસસી ભરતી પ્રક્રિયામાં થયેલા ભ્રષ્ટાચારના સમગ્ર કેસને ધ્યાનમાં લેવો પડશે. એજન્સીએ એવો પણ આરોપ લગાવ્યો છે કે શાહુકાર રિયલ એસ્ટેટ ઉદ્યોગપતિ દયાનંદ સાથે બેંકિંગ ચેનલોની બહાર મોટા પાયે રોકડ વ્યવહારો કરી રહ્યા છે.
મહિલા હોવાના આધારે રાહત માંગવામાં આવી
બીજી તરફ બીવી ગીતાના વકીલે દલીલ કરી હતી કે મહિલા હોવાના આધારે તેને પીએમએલએ હેઠળ જામીન આપવામાં વિશેષ છૂટ મળવી જોઈએ. આ અંગે ઇડીએ કહ્યું કે આ કેસમાં ગીતાને બલિનો બકરો બનાવવામાં આવ્યો નથી.
એજન્સીના જણાવ્યા અનુસાર ગીતા વ્યવસાયે વકીલ છે અને રાજ્યની ભ્રષ્ટાચાર વિરોધી સંસ્થા લોકાયુક્તમાં પ્રોસિક્યુટર તરીકે પણ કામ કરી ચૂક્યા છે. તેથી તે તેમના કથિત કૃત્યોથી સંપૂર્ણ વાકેફ હતા. બંને આરોપીઓની જામીન અરજીઓ પર સુનાવણી દરમિયાન સોમવારે બંને પક્ષોની દલીલો પૂર્ણ થઈ હતી, ત્યારબાદ વિશેષ અદાલતે પોતાનો ચુકાદો સુરક્ષિત રાખ્યો હતો.
અમિત શાહે SIR ના મુદ્દે રાહુલ ગાંધી પર કર્યો પ્રહાર, 13 કરોડ વોટ કાપવાનું કારણ પણ સમજાવ્યું
કર્ણાટક સીઆઈડી અને ઈડીની તપાસમાં શાહુકાર, ગીતા અને પરીક્ષા નિયંત્રક અને આઈએએસ અધિકારી જ્ઞાનેન્દ્ર કુમાર ગંગવારના નામ સામે આવ્યા છે. આ બધા પર લગભગ 20 ઉમેદવારોને પરીક્ષાના પ્રશ્નો અને જવાબો આપવાનો આરોપ છે.
આ દરમિયાન સોમવારે કર્ણાટક હાઈકોર્ટે કેપીએસસી ભરતી કૌભાંડની તપાસ માટે એડીજીપી આર હિતેન્દ્રની અધ્યક્ષતામાં નવી એસઆઈટીની રચના કરવાનો આદેશ આપ્યો હતો. કોર્ટે નિર્દેશ આપ્યો હતો કે ઇડી અને એસઆઈટીની તપાસ એકબીજાના પૂરક હોવી જોઈએ. જ્યારે કર્ણાટક સીઆઈડીએ આ કેસમાં 26 નવેમ્બર સુધીમાં ચાર્જશીટ દાખલ કરવાની છે.
