ખાંડમાં યૂરિયાની ભેળસેળ છે કે નહીં? જાણો FSSAI ની ટેસ્ટ રીત

આજે બજારમાં મળતી ઘણી ખાદ્ય સામગ્રીમાં ભેળસેળ સામાન્ય વાત બની ગઈ છે. તેલ, ઘી અને મધથી લઈને અન્ય વિવિધ ઉત્પાદનોમાં ભેળસેળના અહેવાલો વારંવાર સામે આવતા રહે છે. ખાંડ પણ આ વસ્તુઓમાં સામેલ છે. ખાંડનો વપરાશ લગભગ દરેક ઘરમાં થાય છે. મોટાભાગના ભારતીયો સવારે ઘરમાં બનતી ચામાં તેનો ઉપયોગ કરે છે. આ ઉપરાંત ભારતમાં મીઠાઈઓ અને વિવિધ પ્રકારની વાનગીઓ બનાવવા માટે પણ ખાંડનો ઉપયોગ થાય છે.

ઘણીવાર લોકોને ખબર પણ નથી હોતી કે તેમની ખાંડમાં ભેળસેળ થયેલી છે. બજારમાં વેચાતી ખાંડમાં યુરિયા ભેળવવામાં આવતું હોવાના અહેવાલો પણ સામે આવ્યા છે. ખાંડમાં યુરિયાની ભેળસેળ છે કે નહીં તે તમે ઘરે બેઠા સરળતાથી ચેક કરી શકો છો. ચાલો જાણીએ કેવી રીતે:

પાણીનો ઉપયોગ કરીને તપાસો

ફૂડ સેફ્ટી એન્ડ સ્ટાન્ડર્ડ્સ ઓથોરિટી ઓફ ઈન્ડિયા (FSSAI) એ ખાંડમાં યુરિયાની ભેળસેળની તપાસ અંગે YouTube પર એક વીડિયો શેર કર્યો છે. તેમાં પાણીનો ઉપયોગ કરીને યુરિયાની ભેળસેળ માટે પ્રાથમિક તપાસ કેવી રીતે કરવી તે સમજાવવામાં આવ્યું છે. આ કરવા માટે અડધા ગ્લાસ પાણીમાં એક ચમચી ખાંડ નાખો. તેને ચમચી વડે સારી રીતે હલાવો અને ખાંડ સંપૂર્ણપણે ઓગળી ન જાય ત્યાં સુધી તેને રહેવા દો.

ગંધ દ્વારા તપાસો

એકવાર ખાંડ સંપૂર્ણપણે ઓગળી જાય પછી ગ્લાસને નજીક લાવો અને સૂંઘીને જુઓ કે કોઈ અસામાન્ય ગંધ આવે છે કે નહીં. FSSAI મુજબ જો ખાંડમાં યુરિયાની ભેળસેળ હોય તો તેમાંથી એમોનિયા જેવી ગંધ આવી શકે છે. આવું એટલા માટે થાય છે કારણ કે યુરિયા બનાવવાની પ્રક્રિયામાં એમોનિયાનો ઉપયોગ થાય છે. જો તમને એમોનિયા જેવી ગંધ આવે તો તમે માની શકો છો કે ખાંડમાં ભેળસેળ થયેલી છે. જોકે ધ્યાન રાખો કે આ માત્ર એક પ્રાથમિક તપાસ છે.

આ પણ વાંચો: ચાની ગળણીના ખૂણે-ખૂણામાં જામેલી ગંદકી ઘસ્યા વગર મિનિટોમાં કરો સાફ, જાણો સરળ અને અચૂક દેશી જુગાડ

એમોનિયાની ગંધ કેવી હોય છે?

એમોનિયાની ગંધ ખૂબ જ તીવ્ર અને ઉગ્ર હોય છે અને તેનાથી નાકમાં બળતરા થઈ શકે છે. આ ગંધ જાહેર શૌચાલયોની ગંધ જેવી હોઈ શકે છે. જો ખાંડવાળા પાણીમાંથી આવી કોઈ પણ પ્રકારની હળવી ગંધ પણ આવે તો તેનો અર્થ એ છે કે તેમાં યુરિયા ભેળવવામાં આવ્યું છે. આવા કિસ્સામાં તમારે તે ખાંડનો ઉપયોગ કરવાનું ટાળવું જોઈએ. તેનાથી વિપરીત જો ગ્લાસમાંથી કોઈ ગંધ ન આવતી હોય તો તેનો અર્થ એ છે કે ખાંડ યુરિયાની ભેળસેળથી મુક્ત છે. તમને જણાવી દઈએ કે આ પદ્ધતિ ખાસ કરીને યુરિયાની ભેળસેળ શોધવા માટે છે. અન્ય પ્રકારની ભેળસેળની તપાસ કરવા માટે અન્ય પદ્ધતિઓની જરૂર પડી શકે છે.