M3M Hurun India Wealthy Listing 2026 : ગૌતમ અદાણી અને તેમના પરિવારે ફરી એકવાર મુકેશ અંબાણી અને તેમના પરિવારને પાછળ છોડીને M3M હુરુન ઈન્ડિયા રિચ લિસ્ટ 2026માં પ્રથમ સ્થાન મેળવ્યું છે. અદાણી પરિવારની કુલ સંપત્તિ 13 ટકા વધીને 9.23 લાખ કરોડ રૂપિયા (96 અબજ ડોલર) થઈ ગઈ છે. જ્યારે મુકેશ અંબાણી અને તેમના પરિવારની સંપત્તિ 10 ટકા ઘટીને 8.63 લાખ કરોડ રૂપિયા (90 અબજ ડોલર) રહી ગઈ છે.
બંને પરિવારોની સંપત્તિમાં આ ફેરફાર બાદ અદાણી પરિવાર હવે અંબાણી પરિવારથી લગભગ 59,400 કરોડ રૂપિયાથી આગળ નીકળી ગયા છે. એટલે કે અમીર પરિવારોની આ યાદીમાં અદાણી પરિવાર અને અંબાણી પરિવાર વચ્ચે લગભગ 59,000 કરોડ રૂપિયાનો તફાવત છે.
1810 લોકોની સંપત્તિ 1000 કરોડ રૂપિયાથી વધારે
હુરુનની નવી યાદીમાં ઓછામાં ઓછી 1,000 કરોડ રૂપિયાની સંપત્તિ ધરાવતા 1,810 લોકોનો સમાવેશ થાય છે. તેમની કુલ સંપત્તિ ગયા વર્ષની તુલનામાં 12.8 ટકા વધીને 187.5 લાખ કરોડ રૂપિયા (1.96 ટ્રિલિયન ડોલર) થઈ ગઈ છે.
ભારતમાં હવે રેકોર્ડ 391 ડોલર અબજોપતિ છે, પાંચ વર્ષ પહેલા આ સંખ્યા 237 હતી. છેલ્લા એક વર્ષમાં દેશમાં 27 નવા ડોલર અબજોપતિઓ ઉમેરાયા છે.
ટોપ 10માં નવા ચહેરા સામેલ
આર્સેલર-મિત્તલના એલએન મિત્તલ અને તેમનો પરિવાર આઠ સ્થાનના ફાયદા સાથે ત્રીજા સ્થાને પહોંચી ગયો છે. તેમની સંપત્તિ 93 ટકા વધીને 3.39 લાખ કરોડ રૂપિયા થઈ ગઇ છે. યુરોપમાં સ્ટીલના વેપાર સાથે જોડાયેલા સુરક્ષા ઉપાયો અને પ્રાદેશિક સ્તરે સ્ટીલના ભાવમાં મજબૂતાઈ વચ્ચે કંપનીની સંપત્તિમાં વધારો થયો છે.
વેદાંતા રિસોર્સિસના અનિલ અગ્રવાલ અને તેમના પરિવારની સંપત્તિ 87 ટકા વધીને 2.08 લાખ કરોડ રૂપિયા થઈ ગઇ છે. જેના કારણે તે સાત સ્થાન આગળ આવીને નવમાં સ્થાને આવી ગઇ છે.
ટોરેન્ટ ફાર્માસ્યુટિકલ્સના સમીર મહેતા અને તેમનો પરિવાર 10મા ક્રમ સાથે ટોપ 10માં સ્થાન મેળવ્યું છે. જેબી કેમિકલ્સ સાથે મર્જર પૂર્ણ થયા બાદ તેમની સંપત્તિ 52 ટકા વધીને 1.89 લાખ કરોડ રૂપિયા થઈ ગઈ છે.
ક્વોન્ટમ કમ્પ્યુટિંગની એન્ટ્રી
બેંગલુરુ સ્થિત કંપની ક્યુપીઆઈઆઈના નાગેન્દ્ર નાગરાજા હુરુનની યાદીમાં સામેલ થનારા પ્રથમ ક્વોન્ટમ કમ્પ્યુટિંગ ઉદ્યોગસાહસિક બન્યા છે. તેમણે 1,700 કરોડ રૂપિયાની સંપત્તિ સાથે આ યાદીમાં સ્થાન મેળવ્યું છે. ક્વોન્ટમ હાર્ડવેર અને સોફ્ટવેર આધારિત કંપની ‘ફોર્ચ્યુન’ આ યાદીમાં સામેલ થનારી પ્રથમ કંપની છે.
હોન્ડાએ 145km રેન્જ વાળું QC3 ઇલેક્ટ્રિક સ્કૂટર લોન્ચ કર્યું, જાણો કિંમત અને ફિચર્સ
આર્ટિફિશિયલ ઇન્ટેલિજન્સ (એઆઈ) પણ એક અલગ સેક્ટર તરીકે હુરુનની યાદીમાં સામેલ થયું છે. જેમાં 19 લોકોનો સમાવેશ થાય છે, જેમની કુલ સંપત્તિ 3.07 લાખ કરોડ રૂપિયા છે. જેમાંથી 15 લોકો પહેલીવાર આ યાદીમાં આવ્યા છે. એરોસ્પેસ અને ડિફેન્સ સેક્ટરના 23 જેટલા લોકો આ યાદીમાં જોડાયા છે, જેમની કુલ સંપત્તિ 85,200 કરોડ રૂપિયા છે.
28 વર્ષીય તનાય કોઠારી અને સહજ ગર્ગ તેમની આર્ટિફિશિયલ ઇન્ટેલિજન્સ કંપની ‘વિસ્પર ફ્લો’ સાથે આ યાદીમાં જોડાયા છે. બંનેની પાસે 4,200 કરોડ રૂપિયાની સંપત્તિ છે.
