ડીજે અને ખર્ચાળ જમણવાર અંગે બનાસકાંઠાના ભુવાએ ગેનીબેન ઠાકોરને ફેંક્યો ખુલ્લો પડકાર, “ડીજે તો વાગશે”

વાયરલ વીડિયોમાં ભુવો ગેનીબેન ઠાકોર પર સીધા પ્રહાર કરતા દેખાય છે. તે ધૂણતાં ધૂણતાં કહે છે કે, “જો ડીજે વાળાનું ડીજે બંધ રખાવું તો હું માતા ન કહેવાઉં. ભલે ગેનીબેને લગ્નમાં ડીજે બંધ રાખવાનું કીધું હોય પણ આગળ ચૈત્ર અને વૈશાખ મહિનામાં જો હું પરવાનગી ન આપું તો માતા નહીં કહેવાઉં.”

ભોજન અંગે પણ ભુવાએ કહ્યું છે કે, સારું ભોજન ગેનીબેન ઠાકોર જમી આવે અને ઠાકોરનો છોકરો લુખ્ખું ભાણું જમે તે ન ચાલે. આ સાથે ભુવો ખુલ્લો પડકાર ફેંકતા કહે છે કે, જો કોઈને આ બાબતે વાંધો હોય તો ગેનીબેનને સીધો ફોન કરીને જાણ કરી દેવી, જવાબ આપવાની મારી તાકાત છે. બધાની બોલતી હું બંધ ના કરું તો હું જોગણી ન કહેવાવ.

થોડા મહિનાઓ પહેલા પણ અરવિંદ ભૂવાજીએ નામ લીધા વિના જ ગેનીબેન ઠાકોરને ખુલ્લો પડકાર ફેંકીને ચેતવણી આપી હતી. ભૂવાએ કહ્યું હતું કે, હું કાળું હીરાની બત્રીસીની મેલડી ધૂણું છું. ધૂણનારા બધા ખોટા નથી હોતા. અરવિંદ ભૂવાજીએ ત્યાં સુધી કહ્યું કે, રાધનપુર, ભાભર, દીયોદર તથા સૂઈગામ પંથકમાં તેની 5 હજાર બાધાઓ છે. સાથે જ પડકાર ફેંક્યો કે તમારા ડોક્ટર અને નેતાઓને લાવીને પાંચ મિનિટ માટે કોઈ દુઃખ દૂર કરી આપો. વાત જાણે એમ છે કે થોડા દિવસ પહેલાં થરાદમાં ઠાકોર સમાજના નવા બંધારણની જાહેરાત અને સ્નેહમિલન કાર્યક્રમમાં ગેનીબેન ઠાકોરે ભૂવાઓને લઈને નિવેદન આપ્યું હતું. ગેનીબેન ઠાકોરે સમાજને અપીલ કરી હતી કે ખોટા ભૂવાઓની જાળમાં ફસાઈને પરિવાર બરબાદ ન કરશો. આ જ વાતથી ભૂવાજીને લાગી આવ્યું અને ચીમકી આપી કે હવે પછી આવી વાત કરશે તો નામજોગ બોલીશ.