દ્વારકામાં બુલડોઝર કાર્યવાહી બીજા દિવસે પણ યથાવત, રૂ. 3.15 કરોડની સરકારી જમીન દબાણમુક્ત કરાઈ

આ કાર્યવાહી પ્રાંત અધિકારી અમોલ આવટેના નેતૃત્વમાં દ્વારકા પોલીસ અને નગરપાલિકાની સંયુક્ત ટીમ દ્વારા કરવામાં આવી રહી છે. કાયદો-વ્યવસ્થા જળવાઈ રહે તે માટે પોલીસના ચુસ્ત બંદોબસ્ત વચ્ચે બુલડોઝરો ફરી વળ્યા છે. તંત્રે સ્પષ્ટ કર્યું છે કે, અગાઉથી જ દબાણકર્તાઓને નોટિસ આપવામાં આવી હતી અને મુદત પૂરી થયા પછી પણ દબાણ ન હટાવવાથી આ કાર્યવાહી કરવી પડી છે. જો ભવિષ્યમાં પણ ગેરકાયદેસર રીતે ધમધમતા અન્ય ભવનો પર કાર્યવાહી કરવામાં આવશે.

આ ડિમોલિશન ડ્રાઈવના કારણે યાત્રાધામ દ્વારકાના વિસ્તારોમાં વ્યાપક અસર પડી છે. કારણ કે આ કાર્યવાહીમાં પાંચ અનધિકૃત બાંધકામોને તોડી પાડવામાં આવ્યા છે, જેમાં હોમસ્ટે અને અન્ય વ્યાપારી બાંધકામોનો સમાવેશ થાય છે. આ કાર્યવાહીથી મુખ્ય રસ્તા પરની સરકારી જમીનને ખુલ્લી કરાવીને યાત્રીઓ અને સ્થાનિક વ્યવહારને વધુ સરળ બનાવવાનો ઉદ્દેશ છે.  આ કાર્યવાહી ‘દેવભૂમિ દ્વારકા કોરિડોર’ વિકાસ યોજનાના ભાગરૂપે કરી હોવાનું મનાઈ રહ્યું છે.

નોંધનીય છે કે, આ અગાઉ પણ દ્વારકા જિલ્લામાં આવી જ મેગા ડિમોલિશન ડ્રાઈવ ચલાવવામાં આવી હતી, જેમાં બેટ દ્વારકામાં અનેક ગેરકાયદેસર મકાનો તોડી પડાયા હતા અને હજારો ચોરસ મીટર જમીનને દબાણમુક્ત કરવામાં આવી હતી, જેની કિંમત કરોડોમાં હતી. ગત ફેબ્રુઆરીમાં પણ ધાર્મિક બાંધકામોને જમીનદોસ્ત કરી ઘણી બધી જમીનને મુક્ત કરાઈ હતી.