ચૂંટણી પંચે એવા વ્યક્તિઓને ફરી એક તક આપી છે જેમનાં નામ ‘સ્પેશિયલ ઇન્ટેન્સિવ રિવિઝન’ (SIR) પ્રક્રિયા દરમિયાન મતદાર યાદીમાંથી હટાવી દેવામાં આવ્યા હતા. ખાસ કરીને એવા લોકો કે જેમને અગાઉ ગેરહાજર, મૃત અથવા બેવડી નોંધણી ધરાવતા હોવાનું દર્શાવીને યાદીમાંથી દૂર કરાયા હતા. આ નિર્દેશ 7 રાજ્યો માટે લાગુ પાડવામાં આવ્યો છે.
આ રાજ્યોમાં દિલ્હી, મહારાષ્ટ્ર, હરિયાણા, આંધ્રપ્રદેશ, ઝારખંડ, તેલંગાણા અને નાગાલેન્ડનો સમાવેશ થાય છે.
ચૂંટણી પંચે અધિકારીઓને એક એવી નિયંત્રણ વ્યવસ્થા ઊભી કરવાનો નિર્દેશ આપ્યો છે, જેથી કોઈ પણ પાત્ર મતદાર અંતિમ મતદાર યાદીમાં સામેલ થવાની તકથી વંચિત ન રહી જાય અને સાથે સાથે બેવડી નોંધણી થતી અટકાવી શકાય.
અગાઉ ચૂંટણી પંચે દિલ્હીમાં ચાલી રહેલી SIR પ્રક્રિયા હેઠળ મતદાર નોંધણી અને નામ કમી કરવાના ફોર્મ જમા કરાવવાની અંતિમ તારીખ લંબાવી હતી. મહારાષ્ટ્રમાં પણ આવી જ તક આપવામાં આવી હતી. આ ઉપરાંત નાગાલેન્ડ, તેલંગાણા, આંધ્રપ્રદેશ અને હરિયાણા માટે પણ આ ફોર્મની પ્રક્રિયા પૂર્ણ કરવાની સમયમર્યાદા લંબાવવામાં આવી હતી.
આ પણ વાંચો: ‘છેલ્લા શ્વાસ સુધી જેલ…’, ભાવનગર બસ સ્ટેન્ડ કાજલ બારૈયા હત્યા કેસમાં આરોપી ફેઝલને આજીવન કેદ
સંબંધિત મુખ્ય ચૂંટણી અધિકારીઓને (CEOs) મોકલેલા અલગ-અલગ પત્રોમાં, ચૂંટણી પંચે અંતિમ મતદાર યાદીના પ્રકાશન માટેની તારીખ નક્કી કરી છે. નાગાલેન્ડ, આંધ્રપ્રદેશ, તેલંગાણા, મહારાષ્ટ્ર અને હરિયાણા માટે 30 નવેમ્બર, જ્યારે દિલ્હી માટે 22 ડિસેમ્બર નક્કી કરવામાં આવી છે.
