Chalo Dilli Ramlila March : લોકસભામાં વિપક્ષના નેતા રાહુલ ગાંધીએ ગુરુવારે દેશભરના વિદ્યાર્થીઓને ઇન્ડિયા ગઠબંધનના વિરોધ પ્રદર્શનમાં જોડાવાની અપીલ કરી હતી. મુખ્ય ચૂંટણી કમિશનર જ્ઞાનેશ કુમારને પદ પરથી હટાવવાની માંગ સાથે આ પ્રદર્શન કરવામાં આવશે. રાહુલ ગાંધીએ વિદ્યાર્થીઓને કહ્યું કે તે પોલીસ અને લાઠીઓથી ડરે નહીં. તેમણે દાવો કર્યો હતો કે ભાજપમાં આવી કાર્યવાહી કરવાની હિંમત નહીં હોય.
સાંસદ રાહુલ ગાંધીએ સોશિયલ મીડિયા પ્લેટફોર્મ એક્સ પર એક વીડિયો મેસેજ શેર કરીને લખ્યું છે કે પોલીસની ચિંતા ના કરો, લાઠીઓથી ડરશો નહીં. ભાજપમાં આ પ્રકારની હરકત કરવાની હિંમત નહીં હોય. માર્ચમાં અમારી સાથે આવો. આપણે બંધારણ અને દેશની રક્ષા માટે સાથે મળીને ચાલીશું.
રાહુલ ગાંધી 1 નવેમ્બરે દિલ્હીના રામલીલા મેદાનમાં યોજાનારી ‘ચલો દિલ્હી રામલીલા માર્ચ’નું નેતૃત્વ કરશે. તેમણે કહ્યું કે આ કોઈ એક રાજકીય પક્ષનું પ્રદર્શન નહીં હોય, પરંતુ તે તમામ લોકોનો સંયુક્ત વિરોધ હશે જે વડા પ્રધાન નરેન્દ્ર મોદી, કેન્દ્રીય ગૃહ મંત્રી અમિત શાહ અને મુખ્ય ચૂંટણી કમિશનર જ્ઞાનેશ કુમારથી પરેશાન છે.
રાહુલ ગાંધીએ કહ્યું કે ડરવાની કોઈ જરૂર નથી. હું તમામ વિદ્યાર્થી સંગઠનોને અપીલ કરું છું કે તેઓ કોઈ પણ રાજકીય જોડાણને ધ્યાનમાં લીધા વિના અમારી સાથે જોડાએ. જો તમને લાગે કે ભારત પર હુમલો થઈ રહ્યો છે, જો તમને લાગે કે તમારા પર, તમારી અભિવ્યક્તિ, તમારા વિચારો અને તમારી વિચારસરણી પર હુમલો થઇ રહ્યો છે તો અમારી સાથે જોડાઓ. તે એક શાનદાર કૂચ હશે અને દેશની આત્મા માટે હશે. હું ત્યાં તમને બધાને મળવાની રાહ જોઉં છું.
‘જનતાની અદાલતમાં મહાભિયોગ’ ની તૈયારી
કોંગ્રેસની આગેવાની હેઠળનું ઇન્ડિયા ગઠબંધન ચૂંટણી પંચ અને કેન્દ્ર સરકાર વિરુદ્ધ વોટચોરી અભિયાનને વધુ તીવ્ર બનાવવાની તૈયારી કરી રહ્યું છે. આ અંતર્ગત શનિવારે મુખ્ય ચૂંટણી કમિશનર જ્ઞાનેશ કુમાર વિરુદ્ધ પ્રતીકાત્મક ‘જનતાની અદાલતમાં મહાભિયોગ’ કરવામાં આવશે.
વહીવટીતંત્રે રામલીલા મેદાનમાં આ કાર્યક્રમની મંજૂરી આપી ન હતી. આ પછી વિપક્ષી નેતાઓએ કોંગ્રેસ અધ્યક્ષ મલ્લિકાર્જુન ખડગેના નિવાસસ્થાને કાર્યક્રમની તૈયારી શરૂ કરી દીધી હતી. ગઠબંધનના તમામ ભાગીદારોને રવિવારની રેલીમાં મોટી સંખ્યામાં લોકોને લાવવા કહેવામાં આવ્યું છે.
વિપક્ષ છેલ્લા કેટલાક સમયથી સ્પેશિયલ ઇન્ટેન્સિવ રિવિઝન (એસઆઈઆર) હેઠળ મતદાર યાદીમાં ફેરફારનો વિરોધ કરી રહ્યો છે અને જ્ઞાનેશ કુમારના રાજીનામાની માંગ કરી રહી છે. લગભગ બે સપ્તાહ સુધી ધીમી ગતિ બાદ હવે વિપક્ષ ફરીથી પોતાની ગતિવિધિઓ તીવ્ર બનાવવાની તૈયારી કરી રહ્યું છે.
મલ્લિકાર્જુન ખડગેના નિવાસસ્થાને પ્રતીકાત્મક સુનાવણી
કોંગ્રેસના એક વરિષ્ઠ સાંસદે જણાવ્યું હતું કે વિપક્ષે જ્ઞાનેશ કુમારને પદ પરથી હટાવવા માટે સંસદના બંને ગૃહોમાં ઘણા ઠરાવો રજૂ કર્યા હતા. જરૂરી સમર્થન હોવા છતાં, આ દરખાસ્તો સ્વીકારવામાં આવી ન હતી. હવે ગઠબંધન જનતા સમક્ષ પોતાનો પક્ષ રજૂ કરશે. આ વર્ષે એપ્રિલમાં સંસદના બંને ગૃહોના પ્રિસાઇડીંગ ઓફિસરોએ વિપક્ષના પ્રસ્તાવોને ફગાવી દીધા હતા.
કોંગ્રેસના વરિષ્ઠ નેતાઓ પ્રિયંકા ગાંધી વાડ્રા અને કેસી વેણુગોપાલ તૈયારીઓની સમીક્ષા કરવા માટે ખડગેના નિવાસસ્થાને ગયા હતા. બંગલાની લોનમાં એક સ્ટેજ બનાવવામાં આવ્યું છે. અહીં સંસદમાં થતી ચર્ચાઓ અને કોર્ટમાં થતી સુનાવણીની તર્જ પર કાર્યવાહી થશે.
સૂત્રોએ જણાવ્યું હતું કે ઇન્ડિયા ગઠબંધનના સાંસદો, ન્યાયાધીશો, વકીલો અને સામાન્ય લોકોને તેમાં ભાગ લેવાની તક મળશે. એસઆઈઆરથી અસરગ્રસ્ત લોકો પણ તેમની વાત કરી શકશે. એક સૂત્રએ તેને એક નાના નાટક જેવો કાર્યક્રમ ગણાવ્યો હતો જેમાં જુદા જુદા લોકોને રોલ આપવામાં આવશે.
હરદીપ સિંહ પુરી મધ્ય પ્રદેશથી રાજ્યસભામાં જશે, એલ મુરુગનના રાજીનામા બાદ થઇ રહી છે પેટા ચૂંટણી
ગુરુવારે બપોરે મલ્લિકાર્જુન ખડગેના નિવાસસ્થાને ગઠબંધનના વરિષ્ઠ નેતાઓની બેઠક યોજાઈ હતી. બેઠક સાથે સંકળાયેલા સૂત્રોના જણાવ્યા અનુસાર પૂર્વ લોકસભા સ્પીકર મીરા કુમાર આ કાર્યક્રમની અધ્યક્ષતા કરશે.
વિપક્ષના નેતા ખડગે રાજ્યસભામાં પ્રસ્તાવ રજૂ કરશે. તેમને સંસદમાં પક્ષોની સંખ્યા અનુસાર બોલવાનો સમય આપવામાં આવશે. સિવિલ સોસાયટીના પ્રતિનિધિઓ ઉપરાંત, એસઆઈઆર દરમિયાન મતદાર યાદીમાંથી કાઢી નાખવાનો સામનો કરનારા લોકોને પણ બોલવા માટે બોલાવવામાં આવશે.
રામલીલા મેદાનમાં રેલી માટે કોંગ્રેસે લક્ષ્ય નક્કી કર્યું
કોંગ્રેસના વરિષ્ઠ નેતાઓ 1 નવેમ્બરે યોજાનારી રેલી માટે મહત્તમ લોકોને એકત્ર કરવા માટે રાજ્ય એકમો સાથે બેઠકો કરી રહ્યા છે. જેમાં સાંસદ પ્રિયંકા ગાંધી વાડ્રા અને કેસી વેણુગોપાલનો સમાવેશ થાય છે.
ઉત્તર પ્રદેશ કોંગ્રેસના એક વરિષ્ઠ નેતાએ જણાવ્યું હતું કે પશ્ચિમ ઉત્તર પ્રદેશ એકમને રેલીમાં ઓછામાં ઓછા 25,000 લોકોને લાવવાનો લક્ષ્યાંક આપવામાં આવ્યો છે. દિલ્હીની આસપાસના રાજ્યોના સાંસદો અને નેતાઓને પણ મોટી સંખ્યામાં લોકોને એકત્ર કરવાની જવાબદારી સોંપવામાં આવી છે.
