Brij Bhushan Sharan Singh Information : ભાજપના પૂર્વ સાંસદ અને રેસલિંગ ફેડરેશન ઓફ ઈન્ડિયા (ડબ્લ્યુએફઆઈ)ના પૂર્વ અધ્યક્ષ બ્રૃજભૂષણ શરણ સિંહને ભાજપની ઉત્તર પ્રદેશ રાજ્ય કાર્યકારિણીમાં સામેલ કરવામાં આવ્યા છે. લગભગ ત્રણ મહિના પહેલા બ્રૃજભૂષણ શરણ સિંહને મહિલા કુસ્તીબાજો દ્વારા લગાવવામાં આવેલા યૌન ઉત્પીડનના આરોપોના કેસમાં નિર્દોષ જાહેર કરવામાં આવ્યા હતા.
સૂત્રોના જણાવ્યા અનુસાર આ પહેલીવાર છે જ્યારે બ્રૃજભૂષણ શરણ સિંહને રાજ્યની કારોબારીમાં સ્થાન આપવામાં આવ્યું છે. બ્રૃજ ભૂષણ શરણ સિંહ સિવાય ગોંડા જિલ્લાના ભાજપના અન્ય છ નેતાઓને પણ રાજ્ય કારોબારીમાં સ્થાન મળ્યું છે.
યુપી ભાજપ અધ્યક્ષ પંકજ ચૌધરીએ 26 ઓક્ટોબરે રાજ્ય કારોબારી સમિતિની રચના કરી હતી. 2027 ની યુપી વિધાનસભાની ચૂંટણી માટે રોડમેપ તૈયાર કરવા માટે સમિતિ શુક્રવારે બેઠક કરશે. કેન્દ્રીય ગૃહમંત્રી અમિત શાહ લખનઉમાં એક દિવસ સુધી ચાલનારી બેઠકના ઉદ્ઘાટન સત્રને સંબોધિત કરશે, જ્યારે મુખ્યમંત્રી યોગી આદિત્યનાથ સમાપન સત્રને સંબોધિત કરશે. બેઠકનો એજન્ડા નક્કી કરવા માટે ગુરુવારે ભાજપના રાજ્ય પદાધિકારીઓની બેઠક યોજાઈ હતી.
બીજેપીના એક નેતાએ કહ્યું કે બ્રૃજભૂષણ શરણ સિંહ પૂર્વ સાંસદ છે અને તેમની ચાર દાયકાથી વધુ લાંબી રાજકીય કારકિર્દી છે. પરંતુ આ પહેલીવાર છે જ્યારે તેમને ભાજપની રાજ્ય કારોબારીના સભ્ય બનાવવામાં આવ્યા છે. સૂત્રોએ જણાવ્યું હતું કે છ વખત સાંસદ રહી ચૂક્યા હોવા છતાં તેમને અગાઉ ક્યારેય ભાજપના રાષ્ટ્રીય કે પ્રદેશ એકમમાં કોઈ પદ આપવામાં આવ્યું નથી.
2024 ની ચૂંટણીમાં ટિકિટ કાપી નાખવામાં આવી હતી
યૌન ઉત્પીડનના આરોપોને લઈને રાજકીય હંગામા વચ્ચે ભાજપે 2024ની લોકસભા ચૂંટણીમાં બ્રૃજ ભૂષણ શરણ સિંહને ટિકિટ આપી ન હતી. તેમની જગ્યાએ તેમના નાના પુત્ર કરણ ભૂષણ સિંહને કૈસરગંજ લોકસભા બેઠક પરથી મેદાનમાં ઉતારવામાં આવ્યા હતા. બ્રૃજ ભૂષણ શરણ સિંહ કૈસરગંજથી સાંસદ રહી ચૂક્યા છે.
લોકસભા ચૂંટણીમાં બ્રૃજ ભૂષણે કૈસરગંજની બહાર પ્રચાર કર્યો ન હતો. તેમણે મતદારોને કહ્યું હતું કે તેઓ મુશ્કેલીમાં છે અને કરણ ભૂષણ સિંહની જીત તેમની રાજકીય કારકિર્દીનો અંત લાવવા માંગતા લોકોના ચહેરા પર થપ્પડ સમાન હશે. કરણે પોતાની પહેલી ચૂંટણીમાં જીતી મેળવી હતી.
ભાજપના એક વરિષ્ઠ નેતાએ કહ્યું કે જાતીય સતામણીના આરોપોને કારણે તેમને 2024ની લોકસભા ચૂંટણીમાં ભાજપની ટિકિટ આપવામાં આવી ન હતી.
ભાજપના નેતાએ કહ્યું કે હવે જ્યારે કોર્ટે તેમને નિર્દોષ જાહેર કર્યા છે, ત્યારે તેમની સામે કાયદેસર રીતે કોઈ આરોપ નથી અને તેઓ ભાજપના કાર્યક્રમોમાં સક્રિયપણે ભાગ લઈ શકે છે. તેઓ 2029 ની લોકસભા ચૂંટણી માટે તેમના પુત્રની જગ્યાએ ભાજપ પાસેથી ટિકિટની માંગ પણ કરી શકે છે. પાર્ટીને તેમને ફરીથી મેદાનમાં ઉતારવામાં અથવા બીજે ક્યાંક પ્રચાર માટે મોકલવામાં પણ કોઈ ખચકાટ રહેશે નહીં.
બ્રૃજ ભૂષણ પૂર્વ યુપીના મોટો રાજકીય ચહેરો છે
બ્રૃજ ભૂષણ શરણ સિંહ પાંચ વખત ભાજપના સાંસદ રહી ચૂક્યા છે અને એક વખત સમાજવાદી પાર્ટીની ટિકિટ પર સાંસદ રહ્યા છે. તેઓ પૂર્વી યુપીના સૌથી પ્રભાવશાળી રાજકીય ચહેરાઓમાંથી એક છે.
3 ઓગસ્ટે દિલ્હીની એક કોર્ટે બ્રૃજ ભૂષણ શરણ સિંહને નિર્દોષ જાહેર કર્યા હતા. 6 મહિલા કુસ્તીબાજોએ તેમના પર યૌન ઉત્પીડનનો આરોપ લગાવ્યો હતો. આ આક્ષેપોને લઈને ઘણો હંગામો મચી ગયો હતો. જોકે ટ્રાયલ કોર્ટ દ્વારા તેમને નિર્દોષ જાહેર કરવાના નિર્ણયને પડકાર્યો છે. 28 ઓક્ટોબરે દિલ્હીની એક કોર્ટે બ્રૃજભૂષણને ચાર મહિલા મહિલા પહેલવાનોની અપીલ પર જવાબ આપવા માટે એક અઠવાડિયાનો સમય આપ્યો હતો.
‘લાઠીઓથી ડરશો નહીં, ભાજપ હિંમત નહીં કરે’, રાહુલ ગાંધીએ ચલો દિલ્હી રેલીમાં જોડાવાની અપીલ કરી
આરોપ રાજકીય ષડયંત્રનો ભાગ હતો – રાકેશ ત્રિપાઠી
યુપી ભાજપના પ્રવક્તા રાકેશ ત્રિપાઠીએ કહ્યું કે બ્રૃજભૂષણ શરણ સિંહ સામેના આરોપો રાજકીય ષડયંત્રનો ભાગ હતો અને કોર્ટે તેમને નિર્દોષ જાહેર કર્યા છે. સમાજવાદી પાર્ટીના પ્રમુખ અખિલેશ યાદવે આઝમ ખાનને પાર્ટીના જનરલ સેક્રેટરી અને સ્ટાર કેમ્પેનર તરીકે નિયુક્ત કર્યા છે, તે દોષિત છે અને જેલમાં છે. એ જ રીતે રાહુલ ગાંધી આરજેડી નેતા લાલુ પ્રસાદ યાદવને મળીને મટનની રેસીપી શીખ્યા છે, જ્યારે યાદવને પણ એક કેસમાં દોષી ઠેરવવામાં આવ્યા છે.
આ મામલે બ્રૃજ ભૂષણનો સંપર્ક થઇ શખ્યો નથી. તેમના પ્રતિનિધિ સોનુ સિંહે કહ્યું કે પૂર્વ સાંસદ હાલમાં પંજાબમાં છે.
રાજ્ય કારોબારીનું વિસ્તરણ
યુપી ભાજપની વેબસાઈટ પર ઉપલબ્ધ યાદી મુજબ અગાઉની રાજ્ય કારોબારી સમિતિમાં 184 સભ્યો હતા, જ્યારે નવી સમિતિમાં 712 સભ્યો છે. જેમાં 134 વિશેષ આમંત્રિતો અને 30 કાયમી આમંત્રિતોનો સમાવેશ થાય છે. વડા પ્રધાન નરેન્દ્ર મોદી કાયમી આમંત્રિત છે. મુખ્યમંત્રી યોગી આદિત્યનાથ, કેન્દ્રીય મંત્રી હરદીપ સિંહ પુરી અને ભાજપના પૂર્વ રાષ્ટ્રીય અધ્યક્ષ મુરલી મનોહર જોશી પણ આ સમિતિમાં સામેલ છે. વારાણસી (વડા પ્રધાનના સંસદીય મતવિસ્તાર) અને ગોરખપુર (યોગી આદિત્યનાથના ગૃહ મતવિસ્તાર) રાજ્યની કારોબારીમાં સૌથી વધુ પ્રતિનિધિત્વ ધરાવે છે.
