લાંબા સમય સુધી મોબાઇલ ચલાવનાર માટે ગરદનની કસરતો, જાણો યોગ્ય રીત અને સાવચેતી

Greatest workouts for tech neck : સવારે ઉઠવાથી લઇને રાત્રે ઉંઘવા સુધી મોટાભાગના લોકોના હાથમાં મોબાઇલ ફોન હોય છે. આજના સમયમાં કલાકો સુધી સ્ક્રીનનો ઉપયોગ કરવો, લેપટોપ પર કામ કરવું અને સતત નીચે જોઇને સ્ક્રિન નો ઉપયોગ કરવો સામાન્ય વાત થઇ ગઇ છે. 

જે લોકો વધુ ફોનનો ઉપયોગ કરે છે તેમની ગરદનમાં અકડ, દુખાવો, ભારેપણું અને ઘણીવાર માથાનો દુખાવો જેવી સમસ્યાઓ પણ શરૂ થાય છે. લાંબા સમય સુધી ખોટી મુદ્રામાં બેસવાથી ગરદનના સ્નાયુઓ પર દબાણ વધે છે. અહીં કેટલીક કસરતો બતાવી છે જે ગરદનને રિલેક્સ કરવા, સ્ટ્રેચ આપવા અને જડતાને ઘટાડવામાં મદદ કરી શકે છે. જોકે તેમને યોગ્ય રીતે અને સાવધાની સાથે કરવું મહત્વપૂર્ણ છે.

નેક ટિલ્ટ કસરત

આ કરવા માટે સૌ પહેલા સીધા બેસો અને કરોડરજ્જુને સીધી રાખો. હવે ધીમે ધીમે ગરદનને જમણી બાજુ વાળો. આ સમય દરમિયાન કાનને ખભાની નજીક લાવવાનો પ્રયાસ કરો. આ સ્થિતિને 10-15 સેકન્ડ સુધી રાખો. ત્યારબાદ ગરદનને સામાન્ય સ્થિતિમાં લાવો અને બીજી બાજુ પુનરાવર્તન કરો. તમે આ 4-5 વખત કરી શકો છો. તે કરતી વખતે તમારે કેટલીક સાવધાની પણ રાખવી પડશે. ગરદનને ઝટકાથી વાળશો નહીં. ખભા ઊંચા ન કરો. જો તમને તીવ્ર દુખાવો થાય છે તો તરત જ બંધ કરો. સૌથી અગત્યનું છે કે સર્વાઇકલ સમસ્યાવાળા લોકો વધારે સ્ટ્રેચ ના કરે.

ચિન ટક કસરત

આ કરવા માટે ખુરશી પર સીધા બેસો. હવે હડપચીને ધીમે ધીમે અંદરની તરફ ખેંચો. એવું અનુભવો કે ડબલ હડપચી બની રહી છે. તેને 5-10 સેકન્ડ સુધી રાખો. પછી સામાન્ય સ્થિતિમાં પાછા ફરો. તમે આને 8-10 વખત પુનરાવર્તન કરી શકો છો. ગરદન નીચે વાળવાની ભૂલ ન કરો. કસરત કરતી વખતે પીઠને સીધી રાખો. હડપચીને વધુ પડતા બળથી અંદર દબાવશો નહીં. જો તમને ચક્કર આવે તો તરત જ બંધ કરો.

શું દૂધ સાથે કેળા ખાવાથી સ્વાસ્થ્યને નુકસાન થાય છે? એક્સપર્ટ પાસેથી જાણો

નેક રોટેશન કસરત

આ કરવા માટે સૌ પ્રથમ આરામથી બેસો. પછી હવે ધીમે ધીમે ગરદનને જમણી બાજુ ફેરવો. તમે આરામથી કરી શકો તેટલું ફેરવો. એક વાત ધ્યાનમાં રાખો કે 10 સેકન્ડ રાહ જુઓ અને પછી બીજી બાજુ કરો. આવું 5-6 વખત કરો. આ સમય દરમિયાન ગરદનને ઝડપથી ગોળ-ગોળ ના ફેરવો. જ્યારે દુખાવો થાય ત્યારે ગરદન પર દબાણ ન કરો. કસરત કરતી વખતે તમારા શ્વાસને સામાન્ય રાખો. સ્પોન્ડિલાઇટિસ કે ગરદનની ઇજાવાળા લોકોએ ડોક્ટરની સલાહનું પાલન કરવું જોઈએ.

ડિસ્ક્લેમર : આ લેખ સામાન્ય માહિતી માટે તૈયાર કરવામાં આવ્યો છે. ગરદનમાં દુખાવો, સર્વાઇકલ, સ્પોન્ડિલાઇટિસ, ચક્કર અથવા કોઈ જૂની ઇજાથી પીડાતા લોકોએ કોઈપણ કસરત શરૂ કરતા પહેલા ડોક્ટર અથવા ફિઝિયોથેરાપિસ્ટની સલાહ લેવી આવશ્યક છે. જો તમને કસરત દરમિયાન તીવ્ર પીડા, ચક્કર અથવા અગવડતા લાગે તો તરત જ બંધ કરો.