‘બધુ ખબર પડી જશે’,સુનેત્રા પવારના નિવેદન બાદ એનસીપીના વિલયની અટકળો તેજ બની

NCP : મહારાષ્ટ્રના નાયબ મુખ્યમંત્રી સુનેત્રા પવારે રાષ્ટ્રવાદી કોંગ્રેસ પાર્ટી (એનસીપી)ના બે જૂથોના વિલય અંગેની અટકળો પર આખરે મૌન તોડ્યું છે. જોકે તેમણે ન તો મર્જરની પુષ્ટિ કરી હતી અને ન તો બંધ બારણે ચાલી રહેલી વાટાઘાટોને નકારી હતી. મર્જર પર સીધો જવાબ આપવાનું ટાળતા તેમણે કહ્યું કે યોગ્ય સમય આવશે ત્યારે બધું જ કહેવામાં આવશે.

સુનેત્રા પવારે કહ્યું કે હું જાણું છું કે તમે એક અલગ મુદ્દા વિશે ઉત્સુક છો પરંતુ હું એટલું કહેવા માંગીશ કે સમય આવશે ત્યારે બધી ખબર પડી જશે. તેમના નિવેદન બાદ એનસીપીના બંને જૂથોના મર્જરની અટકળો ફરી એકવાર તીવ્ર બની છે.

આ પહેલા કેટલાક ધારાસભ્યોએ એનસીપી (શરદ જૂથ)ના પ્રમુખ શરદ પવારને મળવા માટે સમય માંગ્યો હતો. જોકે એનસીપીના મુખ્ય પ્રવક્તા ઉમેશ પાટિલે સ્પષ્ટ કર્યું છે કે પાર્ટીના બંને જૂથો વચ્ચે મર્જરની કોઈ વાતચીત ચાલી રહી નથી.

ભાજપને જાણકારી નથી

સુનેત્રા પવારનું આ નિવેદન મુખ્યમંત્રી દેવેન્દ્ર ફડણવીસના તે નિવેદન પછી આવ્યું છે જેમાં તેમણે કહ્યું હતું કે જો બંને જૂથોના વિલય અંગે નિર્ણય લેવામાં આવે તો ભારતીય જનતા પાર્ટીની તેની જાણ કરવામાં આવશે.

દેવેન્દ્ર ફડણવીસે કહ્યું હતું કે સંભવિત મર્જર પર માત્ર શરદ પવાર અને સુનેત્રા પવાર જ સત્તાવાર રીતે બોલી શકે છે. તેમણે એમ પણ કહ્યું હતું કે બન્નેમાંથી કોઈએ પણ ભાજપને આવા પ્રસ્તાવ વિશે જાણ આપી નથી.

એનસીપીના વિલિનીકરણની અટકળો પર પ્રતિક્રિયા આપતા દેવેન્દ્ર ફડણવીસે કહ્યું કે આ વિશે માત્ર શરદ પવાર અને સુનેત્રા પવાર જ કહી શકે છે. જો કોઈ નિર્ણય લેવામાં આવશે તો અમને જાણ કરવામાં આવશે. અમારી જાણકારી  વિલય થઈ શકે નહીં. અત્યાર સુધી બંનેમાંથી કોઈએ અમને આ વિશે કંઇ કહ્યું નથી. 

અયોધ્યા જવાના સવાલ પર અખિલેશ યાદવે કહ્યું – ભગવાન બધાના છે, અમે મથુરા-વૃંદાવન પણ જઇશું

દેવેન્દ્ર ફડણવીસે કહ્યું કે અમારા વિના મર્જર નહીં થાય. બંને પક્ષો અમને આ વિશે જાણ કરશે. અત્યાર સુધી તેમાંથી કોઈએ અમને કંઇ કહ્યું નથી. સીએમ ફડણવીસે એમ પણ કહ્યું કે મહારાષ્ટ્રમાં એનસીપી મહાયુતી સરકારનો ભાગ છે અને કેન્દ્રમાં ભાજપની આગેવાની હેઠળની એનડીએ છે. આવી સ્થિતિમાં બંને જૂથોના મર્જર જેવો કોઈ રાજકીય નિર્ણય લેતા પહેલા શાસક ગઠબંધનને વિશ્વાસમાં લેવું જરૂરી રહેશે.

સુનેત્રા પવારની પાર્ટીના 20-22 ધારાસભ્યો પાર્ટી છોડી શકે છે

શિવસેના સાંસદ સંજય રાઉતે દાવો કર્યો છે કે સુનેત્રા પવારની આગેવાની હેઠળના એનસીપીના 20 થી 22 ધારાસભ્યો પાર્ટી છોડવા પર વિચાર કરી રહ્યા છે. સંજય રાઉતે મુંબઈમાં પત્રકારો સાથે વાત કરતા કહ્યું કે આ ધારાસભ્યો શરદ પવારને મળી રહ્યા છે. તેમણે આ બેઠકોને સામાન્ય અથવા અનૌપચારિક વાતચીત તરીકે ગણવાનો ઇનકાર કર્યો હતો. સંજય રાઉતના જણાવ્યા અનુસાર, આગામી ચૂંટણી પહેલા આ ધારાસભ્યો શરદ પવારના જૂથમાં પાછા ફરી શકે છે અથવા એક કે બે અન્ય પક્ષોમાં જોડાઈ શકે છે.