Riyan Parag Vaping Video : આઈપીએલ 2026માં વધુ એક વિવાદ સામે આવ્યો છે. મંગળવારે ન્યૂ ચંદીગઢમાં પંજાબ કિંગ્સ સામેની મેચ દરમિયાન રાજસ્થાન રોયલ્સના ડ્રેસિંગ રૂમમાં ટીમના કેપ્ટન રિયાન પરાગનો વેપિંગ (ઇ-સિગારેટનો ઉપયોગ કરતા) કરતો વીડિયો વાયરલ થયો છે.
આ ઘટના બીજી ઈનિંગ્સની 16મી ઓવરમાં બની હતી. જ્યારે એક બ્રોડકાસ્ટ કેમેરાએ રિયાન પરાગને એવી વસ્તુ સાથે કેદ કર્યો હતો જે વેપ (ઈ-સિગારેટ) જેવી લાગતી હતી. આ ફૂટેજ ઝડપથી વાયરલ થયું હતું. આ પછી ઘણા ચાહકોએ ચિંતા વ્યક્ત કરી હતી અને કાર્યવાહીની માંગ કરી હતી.
આ ક્ષણે વધારે ધ્યાન એટલા માટે ખેંચ્યું કારણ કે ત્યારે રિયાન પરાગ 16 બોલમાં 29 રન બનાવીને આઉટ થયો હતો અને ટાર્ગેટનો પીછો કરતી વખતે નિર્ણાયક ક્ષણે ટીમને ફાયદો પહોંચાડી શક્યો ન હતો. ત્યારબાદથી આ વીડિયો વાયરલ થયો છે. આનાથી સંભવિત શિસ્તબદ્ધ કાર્યવાહી અંગે પ્રશ્નો ઉભા થયા છે.
આ ઘટના એટલા માટે ચોંકાવનારી છે કારણ કે ડ્રેસિંગ રૂમ અને સ્ટેડિયમ પરિસરમાં ધૂમ્રપાન પર સંપૂર્ણ પ્રતિબંધ છે (સિવાય કે તેના માટે નિર્ધારિત જગ્યા). આ ઘટના ગંભીર ચિંતાઓ ઉભી કરે છે કારણ કે દેશમાં વેપિંગ કાયદેસર નથી.
રિયાન પરાગ પાસેથી ખુલાસો માંગવામાં આવશે
રિયાન પરાગના સોશિયલ મીડિયા પર ફરતા વીડિયો પર BCCI એ પ્રતિક્રિયા આપી છે. બોર્ડના એક અધિકારીએ પુષ્ટિ આપી છે કે આગળની કોઈપણ કાર્યવાહી પર વિચાર કરતા પહેલા પરાગનો ખુલાસો માંગવામાં આવશે. BCCI ના એક અધિકારીએ ધ ઇન્ડિયન એક્સપ્રેસને જણાવ્યું કે અમે આ મુદ્દા પર રિયાન પાસેથી સ્પષ્ટતા માંગીશું, કારણ કે વેપિંગની મંજૂરી નથી. તેના સ્પષ્ટતાના આધારે આગળની કાર્યવાહી કરાશે.
ભારતમાં વેપિંગ પર પ્રતિબંધ છે
ભારત સરકારે પ્રોહિબિશન એક્ટ (પીઇસીએ) 2019 હેઠળ ઇલેક્ટ્રોનિક સિગારેટ પર પ્રતિબંધ મૂક્યો છે. આ અધિનિયમ ભારતમાં ઈ-સિગારેટ/વેપ્સના ઉત્પાદન, વેચાણ, ખરીદી, આયાત, નિકાસ, નિકાસ અને જાહેરાત પર પ્રતિબંધ મૂકે છે અને તેનું ઉલ્લંઘન કેદ અને ભારે દંડની સજાને પાત્ર છે.
આઈપીએલમાં સૌથી ઓછી ઇનિંગ્સમાં 2 સદી ફટકારનાર ટોપ 9 પ્લેયર, લિસ્ટમાં 4 ભારતીય
ભારતીય ક્રિકેટ કંટ્રોલ બોર્ડ સ્ટેડિયમની અંદર ખેલાડીઓના વર્તન અંગે કડક માર્ગદર્શિકા ધરાવે છે. આરોગ્ય અને સલામતી પ્રોટોકોલ હેઠળ, ડ્રેસિંગ રૂમ અથવા ડગઆઉટમાં તમાકુ અથવા સંબંધિત ઉત્પાદનોનો ઉપયોગ સામાન્ય રીતે પ્રતિબંધિત છે. આ જ કારણ છે કે રિયાન પરાગને સજા થાય તેવી સંભાવના છે.
રોમી ભિંડર ડગઆઉટમાં ફોનનો ઉપયોગ કરતા જોવા મળ્યા હતા
રાજસ્થાન રોયલ્સ વર્તમાન સિઝનમાં વિવાદમાં સપડાઈ હોય તેવી આ પહેલી ઘટના નથી. અગાઉ તેમના મેનેજરે ડગઆઉટમાં પોતાના ફોનનો ઉપયોગ કરીને પીએમઓએ પ્રોટોકોલનું ઉલ્લંઘન કર્યું હતું. આ ઘટના પણ બ્રોડકાસ્ટ દરમિયાન કેમેરામાં કેદ થઈ હતી અને સંપૂર્ણ તપાસ બાદ બીસીસીઆઇએ રોમી ભિંડર પર દંડ અને ચેતાવણી આપી હતી.
