જો તમારા વાળ સૂકા અને નિર્જીવ દેખાતા હોય અથવા તેનો વિકાસ સારો ન થતો હોય તો તમે અળસીમાંથી બનાવેલ હેર માસ્ક અજમાવી શકો છો. અળસીમાંથી મળતું જેલ વાળને નરમ બનાવવામાં અને ગૂંચ ઘટાડવામાં મદદ કરી શકે છે. આ ઉપરાંત તેને તમારી હેર કેર રૂટિનમાં સામેલ કરવાથી વાળ મજબૂત બને છે અને તેનો વિકાસ વધે છે. આ હેર માસ્ક ઘરે બનાવવો પણ સરળ છે.
સૌ પ્રથમ અળસીના હેર માસ્કનો ઉપયોગ કરવાના સંભવિત ફાયદાઓ
તે વાળને નરમ બનાવવામાં અને ગૂંચ ઘટાડવામાં મદદ કરે છે, જેનાથી વાળ તૂટવાનું પ્રમાણ ઘટે છે. તે વાળમાં ચમક પણ લાવે છે. તેનું જેલ વાળની ​​સપાટીને મુલાયમ બનાવે છે, જેથી વાળ ચમકદાર દેખાય છે. જોકે ધ્યાન રાખો કે તે નવા વાળ ઉગવાની કે વાળ ઝડપથી લાંબા થવાની ખાતરી આપતું નથી.
અળસીનો હેર માસ્ક કેવી રીતે બનાવવો
- 2 મોટી ચમચી અળસી
- 1 કપ પાણી
- 2-3 મીઠા લીમડાના પાન (કઢી પત્તા)
- 2-3 જાસૂદના પાન (વૈકલ્પિક)
- 1-2 નાની ચમચી એલોવેરા જેલ અથવા દહીં (વૈકલ્પિક)
હવે તેને કેવી રીતે તૈયાર કરવું અને લગાવવું તે જાણો:
સૌ પ્રથમ એક વાસણમાં પાણી અને અળસી ભેગા કરો અને તેને 5-7 મિનિટ સુધી ઉકાળો. જેવું પાણી ઘટ્ટ થઈને જેલ જેવું બને તરત જ ગેસ બંધ કરી દો. મિશ્રણને થોડું ઠંડું થવા દો અને પછી તેને ગાળી લો. વૈકલ્પિક રીતે તમે મીઠા લીમડાના પાન અને જાસૂદના પાનને થોડા પાણીમાં ઉકાળીને તેને પણ ઠંડા થવા દઈ શકો છો.
આ પણ વાંચો: 10 મિનિટમાં બનાવો ચટાકેદાર લસણિયા મમરા, સાંજના નાસ્તા માટે નોંધી લો પરફેક્ટ રેસીપી
આ પાણીને ગાળી લો અને અળસીના જેલમાં મિક્સ કરો. મિશ્રણમાં એલોવેરા જેલ અથવા થોડું દહીં ઉમેરો અને સારી રીતે હલાવીને મુલાયમ પેસ્ટ બનાવો. આ માસ્કને વાળની ​​લંબાઈ પર લગાવો. જો માથાની ચામડી (સ્કેલ્પ) પર ખંજવાળ કે બળતરા ન થતી હોય તો જ તેને ત્યાં લગાવો. તેને 20-30 મિનિટ સુધી રહેવા દો અને પછી હળવા શેમ્પૂથી સારી રીતે ધોઈ લો.
આ બાબતો ધ્યાનમાં રાખો
માસ્કને બહુ પાતળું ન બનાવો નહીં તો તે વાળમાંથી ટપકી શકે છે. પહેલીવાર ઉપયોગ કરતા પહેલા તેને ત્વચાના નાના ભાગ પર લગાવીને તપાસો. જો તમને ખંજવાળ, બળતરા કે લાલાશ અનુભવાય તો તેનો ઉપયોગ કરશો નહીં. ઘરે બનાવેલા મિશ્રણનો ઉપયોગ તે તાજું હોય ત્યારે જ કરવો શ્રેષ્ઠ છે.
ડિસ્ક્લેમર: આ માહિતી વાળની ​​સામાન્ય સંભાળના હેતુ માટે છે. એવો કોઈ વૈજ્ઞાનિક પુરાવો નથી કે અળસીના હેર માસ્ક વાળના વિકાસને વેગ આપે છે અથવા વાળ ખરતા અટકાવે છે.
