સુરેન્દ્રનગર જિલ્લામાં ‘શુદ્ધિકરણ’ વિધિના બહાને એક પરિણીત મહિલાને શારીરિક સંબંધ બાંધવા માટે મજબૂર કરવાના આરોપસર પોલીસે નવ વ્યક્તિઓની ધરપકડ કરી છે. પોલીસે જણાવ્યું હતું કે તમામ નવ આરોપીઓ દુધરેજ ગામના રહેવાસી છે. મંગળવારે પોલીસે ખુલાસો કર્યો હતો કે આરોપીઓએ પીડિતાને તેના કથિત પ્રેમી સાથે પકડી પાડી હતી. ત્યારબાદ ‘શુદ્ધિકરણ’ વિધિના ભાગરૂપે મહિલાને શારીરિક સંબંધ બાંધવા માટે મજબૂર કરવામાં આવી હતી. આરોપીઓએ આ શરમજનક ઘટનાનો વીડિયો મોબાઈલ ફોનમાં રેકોર્ડ કર્યો હતો, જે બાદમાં ઈન્સ્ટાગ્રામ પર અપલોડ કરવામાં આવ્યો હતો.
આ કલમો હેઠળ FIR નોંધાઈ
આ ઘટનાના સંદર્ભમાં પોલીસે સુરેન્દ્રનગર સિટી ‘એ’ ડિવિઝન પોલીસ સ્ટેશનમાં BNSની કલમ 70(1) (ગેંગ રેપ/સામૂહિક બળાત્કાર), કલમ 115(2) (સ્વેચ્છાએ ગંભીર ઈજા પહોંચાડવી) અને ઇન્ફોર્મેશન ટેક્નોલોજી એક્ટની કલમ 67(A) (ઈલેક્ટ્રોનિક સ્વરૂપમાં જાતીય સ્પષ્ટ સામગ્રી પ્રકાશિત કરવી અથવા પ્રસારિત કરવી) હેઠળ કેસ નોંધ્યો છે.
મહિલા તેના પ્રેમી સાથે ભાગી ગઈ હતી
એચટીના અહેવાલ મુજબ, સુરેન્દ્રનગરના એસપી પ્રેમસુખ ડેલુએ જણાવ્યું હતું કે પીડિતા વાપીની રહેવાસી છે અને અગાઉ તે તે જ વ્યક્તિ સાથે ચોટીલા ભાગી ગઈ હતી. જોકે બાદમાં પરિવાર અને સમાજના સભ્યો વચ્ચે સમાધાન થયું હતું અને તે તેના પતિ પાસે પાછી ફરી હતી. પોલીસે જણાવ્યું હતું કે તેનો પતિ તેને બાંધીને રાખતો હતો, જેના કારણે તે ફરીથી તે જ વ્યક્તિ સાથે ભાગી ગઈ હતી.
પ્રેમી અને મહિલાને બાંધીને માર મારવામાં આવ્યો
એસપીએ જણાવ્યું હતું કે તેઓ ભાગી ગયાના થોડા દિવસો બાદ તેના પરિવાર અને સમાજના સભ્યોએ મહિલા અને તેના પ્રેમીને પકડી પાડ્યા હતા. ત્યારબાદ તેમને સુરેન્દ્રનગરના એક સ્થળે લઈ જવામાં આવ્યા હતા, જ્યાં મહિલાને કથિત રીતે ‘શુદ્ધિકરણ’ પ્રક્રિયામાંથી પસાર થવું પડ્યું હતું. પોલીસના જણાવ્યા અનુસાર, આરોપીઓમાં તેના પોતાના પરિવાર અને સમાજના સભ્યોનો સમાવેશ થતો હતો. તેમણે કથિત રીતે મહિલાને કપડાં ઉતારવા મજબૂર કરી અને તેને બાંધી દીધી, ત્યારબાદ તેના પ્રેમીને તેની સાથે શારીરિક સંબંધ બાંધવા માટે મજબૂર કર્યો. ત્યારબાદ પ્રેમીને મહિલાનો પેશાબ પીવા માટે મજબૂર કરવામાં આવ્યો હતો.
આ પણ વાંચો: આદિવાસી યુગલે આપઘાત કર્યો, ઈન્સ્ટાગ્રામ પર 57 લોકોએ લાઈવ જોયું; પોલીસ બચાવવા દોડી પણ મોડું થઈ ગયું
આરોપીઓએ મહિલા અને તેના પ્રેમી બંનેને લાકડીઓ વડે માર માર્યો હતો. તેઓએ યુવકને દોરડા વડે ઝાડ સાથે બાંધી દીધો અને મહિલાને એક રૂમમાં પૂરી દીધી. પોલીસે જણાવ્યું હતું કે જાતીય હુમલાની ઘટના મોબાઈલ ફોનમાં રેકોર્ડ કરવામાં આવી હતી અને ત્યારબાદ તે વીડિયો ઈન્સ્ટાગ્રામ પર અપલોડ કરવામાં આવ્યો હતો.
સોશિયલ મીડિયા પર વીડિયો વાયરલ થયો
એસપી ડેલુએ જણાવ્યું હતું કે સોમવારે વીડિયો જોયા બાદ સમુદાયના એક સભ્યએ પોલીસને જાણ કરી હતી. શરૂઆતમાં પોલીસ પાસે મહિલાની ઓળખ અંગે કોઈ માહિતી નહોતી. ત્યારબાદ આસિસ્ટન્ટ સુપરિન્ટેન્ડેન્ટ ઓફ પોલીસ (ASP) વેદિકા દિહાની અને તેમની ટીમે તેને શોધવા માટે વિસ્તારમાં તપાસ અને પૂછપરછ હાથ ધરી હતી અને આખરે તેના ઘરની ઓળખ કરી હતી. ડેલુએ ઉલ્લેખ કર્યો કે જ્યારે પોલીસ તેના ઘરે પહોંચી ત્યારે તે રસોઈ બનાવી રહી હતી. પોલીસને જોઈને તે રડી પડી અને તેણે પોતાની સાથે બનેલી સમગ્ર ઘટના વર્ણવી.
