અંબાજી મેળામાં આધુનિક વોશરૂમ સુવિધા, જાણો વિગત

ઉત્તર ગુજરાતના સુપ્રસિદ્ધ યાત્રાધામ અંબાજી ખાતે દર વર્ષે યોજાતા ભાદરવી પૂનમના પવિત્ર મેળામાં લાખોની સંખ્યામાં પદયાત્રાળુઓ અને પ્રવાસીઓ મા અંબાના દર્શનાર્થે આવતા હોય છે. આ દર્શનાર્થીઓની આરોગ્ય, સ્વચ્છતા અને પ્રાથમિક સુવિધાઓને ધ્યાનમાં રાખીને દાંતા-અંબાજી રોડ પર એક વિશેષ અને આધુનિક વોશરૂમ વ્યવસ્થા ઉભી કરવામાં આવી છે. ‘જય અંબે સેવા કેન્દ્ર – યુ.એસ.એ.’ દ્વારા ઉપલબ્ધ કરાવવામાં આવેલી આ સુવિધામાં નવી પેઢીની વેક્યૂમ સેનિટેશન ટેક્નોલોજીનો ઉપયોગ કરવામાં આવ્યો છે.

શું છે આ આધુનિક વેક્યૂમ સેનિટેશન ટેક્નોલોજી?

પરંપરાગત ગ્રેવિટી આધારિત શૌચાલય સિસ્ટમની સરખામણીએ આ આધુનિક સિસ્ટમમાં ગંદા પાણીના પરિવહન માટે હવાના દબાણ (Air Strain) નો ઉપયોગ કરવામાં આવે છે.

પાણીની મોટી બચત: ઉપલબ્ધ ટેક્નોલોજી દસ્તાવેજ મુજબ, આ વેક્યૂમ સિસ્ટમમાં પ્રતિ ફ્લશ આશરે માત્ર 0.5 લિટર (0.5 Liter) પાણીનો જ ઉપયોગ થાય છે, જે પાણીની વિપુલ બચત કરે છે.

દુર્ગંધ મુક્ત વાતાવરણ: વોશરૂમમાં ગંધ નિયંત્રણ માટે વિશેષ એરફ્લો સિસ્ટમનો ઉપયોગ કરવામાં આવ્યો છે, જેનાથી શૌચાલય પરિસરમાં દુર્ગંધ ફેલાતી નથી.

સીલ્ડ સ્ટોરેજ સુવિધા: આ સિસ્ટમમાં વેસ્ટને સીલ્ડ સ્ટોરેજમાં રાખવાની વ્યવસ્થા હોવાથી પરંપરાગત સોકેજ પિટની જરૂરિયાત રહેતી નથી, જેથી આસપાસનું વાતાવરણ એકદમ સ્વચ્છ રહે છે.

પદયાત્રાળુઓ માટે આશીર્વાદરૂપ પહેલ

ભાદરવી પૂનમના મેળા દરમિયાન દાંતા-અંબાજી માર્ગ પર અવિરતપણે પદયાત્રાળુઓનો પ્રવાહ ચાલુ રહેતો હોય છે. આવા સમયે પીક અવર્સ દરમિયાન પણ સતત કામગીરી જાળવી શકે તેવી સ્વચ્છ અને વ્યવસ્થિત શૌચાલય સુવિધા અત્યંત મહત્વપૂર્ણ બની રહે છે.

આ પણ વાંચો: અંબાજી ભાદરવી પૂનમ મેળો, બોલ માડી અંબે નાદ સાથે ભક્તિમય વાતાવરણ

આ નવી વ્યવસ્થામાં પાણી અને વેસ્ટ માટે અલગ સ્ટોરેજ કેપેસિટી રાખવામાં આવી છે. ‘સ્વચ્છતા ત્યાં જ પ્રભુતા’ ના પવિત્ર સંદેશ સાથે યાત્રાળુઓની નિઃસ્વાર્થ સેવા અને સ્વચ્છતા અભિયાનને જોડવાનો આ એક સરાહનીય પ્રયાસ છે, જે પદયાત્રાળુઓને વધુ સુવિધાજનક અને સ્વચ્છ વોશરૂમનો અનુભવ પૂરો પાડશે.