Raviraj UPSC Topper Success Tales: યુપીએસસી સિવિલ સર્વિસીસ પરીક્ષા 2025 નું અંતિમ પરિણામ શુક્રવારે (6 માર્ચ 2026) જાહેર કરવામાં આવ્યું હતું. આયોગે પરિણામની સાથે ટોપર્સની યાદી પણ જાહેર કરી હતી. આ યાદીમાં એવા કેટલાય નામ છે જેમની સફળતાની કહાણી કોઈપણ વ્યક્તિને પ્રેરણા આપી શકે છે. UPSC ટોપર્સની આ યાદીમાં આવું જ એક નામ છે બિહારના નવાદા જિલ્લાના રહેવાસી રવિરાજ, જેમણે ઓલ ઈન્ડિયા લેવલમાં 20મો રેન્ક મેળવ્યો છે. રવિરાજની કહાણી ખરેખર આ પરીક્ષાની તૈયારી કરી રહેલા લોકો માટે પ્રેરણાદાયી છે.
ખેડૂતનો દિકરો છે રવિરાજ
બિહારના નવાદા જિલ્લાનાના અકબરપુર ક્ષેત્રના માહુલી ગામના રહેવાસી રવિરાજે પોતાની દૃઢ ઇચ્છાશક્તિ અને મહેનતથી સાબિત કરી દીધું છે કે સખત મહેનતથી કોઈ પણ અવરોધ પાર કરી સફળતા મેળવી શકાય છે. તેમની સફળતાએ માત્ર નવાદા જિલ્લાનું જ નહીં પરંતુ સમગ્ર દેશનું નામ રોશન કર્યું છે. રવિરાજ એક ખેડૂતનો પુત્ર છે અને બિહાર પબ્લિક સર્વિસ કમિશનમાં મહેસૂલ અધિકારી તરીકે ચૂંટાયા બાદ અગાઉ ડિસ્ટ્રિક્ટ ટોપર રહી ચૂક્યા છે.
રવિરાજ આંખથી બરાબર જોઈ શકતો નથી
રવિરાજની આ સિદ્ધિ એટલા માટે પણ ખાસ બની જાય છે કારણ કે તે દૃષ્ટિ બાધિત છે અને આંખથી બરાબર જોઈ શકતા નથી. રવિરાજે પ્રારંભિક શિક્ષણ નવાદાની દયાળ પબ્લિક સ્કૂલમાંથી મેળવ્યું હતું. તેમણે સત્યેન્દ્ર નારાયણ સિંહ ઇન્ટર સ્કૂલમાંથી ઇન્ટરમિડિયેટ શિક્ષણ પૂર્ણ કર્યું અને સીતારામ સાહુ કોલેજમાંથી પોલિટિકલ સાયન્સમાં સ્નાતકની ડિગ્રી મેળવી હતી.
આ પણ વાંચો | રાજસ્થાનના અનુજ અગ્નિહોત્રી બન્યા UPSC ટોપર, અહીં જુઓ Top 10 લીસ્ટ
કોચિંગ વગર પાસ કરી UPSC પરીક્ષા
રવિરાજે પોતાની તૈયારી વિશે જણાવ્યું હતું કે, તેમણે આ પરીક્ષા કોચિંગ વગર પાસ કરી છે. તેમણે કહ્યું કે, તેઓ દરરોજ 8 થી 10 કલાક અભ્યાસ કરતા હતા. આ પહેલી ઘટના છે જ્યારે તેમના વિસ્તાર માંથી કોઈએ યુપીએસસીમાં આટલો સારો રેન્ક મેળવ્યો છે. રવિરાજની માતા વિભા સિંહા અને પિતા રંજન કુમાર સિંહા દિકરાની સફળતાથી ખૂબ જ ખુશ છે. તેની માતાએ તેના પુત્રના સંઘર્ષ અને સફળતાની કહાણી મીડિયાને જણાવી હતી.
