‘હું નહોતી ઈચ્છતી કે તે આ દેશમાં રહે,’ અકસ્માતમાં એકના એક દીકરાને ગુમાવનાર માતાની વાત સાંભળી તમારું હૈયું પણ ભરાઈ આવશે

ઇન્ના માકને વધુમાં કહ્યું કે, તેમણે સિંગલ મધર તરીકે 23 વર્ષ સુધી તેમના દીકરાને એકલા ઉછેર્યો હતો. તેણે કહ્યું કે, “હું હંમેશા ઇચ્છતી હતી કે તે આ દેશમાં ન રહે. અહીંની પરિસ્થિતિ અને ત્રાસ જોઈને હું શરૂઆતથી જ તેને કહેતી હતી કે બેટા, ક્યાંક બીજે જતો રહે.” તેમણે કહ્યું કે, “આ અકસ્માતમાં સાહિલની બાઇકને જે એસયુવીએ ટક્કર મારી હતી, તેના પર પહેલેથી જ 13 ચલણ હતા અને તે તમામ ઓવર સ્પીડના હતા.” ઇન્નાએ કહ્યું કે, “આરોપીને અંતરિમ જામીન મળી ગયા છે. હું પોલીસને મળી તો તેઓએ કહ્યું કે અમારા તરફથી નિષ્પક્ષ તપાસ કરવામાં આવશે.”

નોંધનીય છે કે, આ અકસ્માત 3 ફેબ્રુઆરીના રોજ દક્ષિણ-પશ્ચિમ દિલ્હીના દ્વારકા વિસ્તારમાં સર્જાયો હતો. અહીં બે કાર અને એક બાઇક વચ્ચે ટક્કર થઈ હતી, જેમાં બાઇક સવાર સાહિલનું મોત થયું હતું અને અન્ય એક વ્યક્તિ ઘાયલ થયો હતો. દ્વારકા સાઉથ પોલીસ સ્ટેશનને સવારે 11.57 વાગ્યે આ અકસ્માતની જાણ કરવામાં આવી હતી. પોલીસની ટીમ ઘટનાસ્થળે પહોંચી તો ત્યાં એક પ્રાઇવેટ એસયુવી, એક ટેક્સી અને એક મોટરસાઇકલ વચ્ચે અકસ્માત થયો હતો. અધિકારીના જણાવ્યા અનુસાર, બાઇક સવાર ગંભીર રીતે ઘાયલ થયો હતો અને પોલીસ પહોંચે તે પહેલાં જ તેનું મોત થઈ ગયું હતું.

અકસ્માતમાં ઈજાગ્રસ્ત થયેલા કેબ ડ્રાઇવર અજીત સિંહને ઇન્દિરા ગાંધી આંતરરાષ્ટ્રીય હોસ્પિટલમાં સારવાર માટે લઈ જવામાં આવ્યો હતો. પોલીસના જણાવ્યા અનુસાર, તેની હાલત સ્થિર છે. તપાસમાં જાણવા મળ્યું કે, SUVના ડ્રાઇવરનું નામ અક્ષત્રા સિંહ (19 વર્ષ) છે અને તેની પાસે માન્ય ડ્રાઇવિંગ લાઇસન્સ નહોતું. તેને ઘટનાસ્થળેથી જ અટકાયતમાં લેવામાં આવ્યો હતો, પરંતુ હવે તેને જામીન મળી ગયા છે. જાણવા મળ્યું છે કે આરોપીને બોર્ડ પરીક્ષા માટે વચગાળાના જામીન આપવામાં આવ્યા છે.

આ અકસ્માત અને તે પછીની ઘટનાઓ વ્યવસ્થા પર મોટા સવાલો ઉઠાવી રહી છે. સાહિલની માતાની ચીસો અને તેની વેદના સમાજને વિચારવા મજબૂર કરે છે કે આપણી વ્યવસ્થા ક્યારે સુધરશે? આવા અકસ્માતોમાં થતા મોત ક્યારે અટકશે? અને ક્યારે એક માતાને કહેવું નહીં પડે કે બેટા, તું ભારત છોડીને ક્યાંક બીજે જતો રહે.