BMC election outcomes 2026 : બીએમસી ચૂંટણીમાં વિજયી મહાયુતિ ગઠબંધનનો ભાગ હોવા છતાં એકનાથ શિંદેની આગેવાની હેઠળની શિવસેનાએ શનિવારે મુંબઈમાં તેના નવા ચૂંટાયેલા કોર્પોરેટરોને ફાઇવ સ્ટાર હોટલમાં ખસેડવાનું શરૂ કર્યું છે. જે ભારતીય જનતા પાર્ટી સાથે ચાલી રહેલી સત્તા વાટાઘાટો વચ્ચે અસ્વસ્થતાનો સંકેત આપે છે.
સાંજે 6 વાગ્યા સુધીમાં શિવસેનાના 29 કોર્પોરેટરો અને પાર્ટીના કેટલાક નેતાઓ બાંદ્રા સ્થિત તાજ લેન્ડ્સ એન્ડ હોટલમાં પહોંચી ગયા હતા, જ્યાં તેઓ આગામી થોડા દિવસો માટે રોકાવાના છે. મોડી સાંજ સુધી બેઠકો ચાલુ રહી હતી.
સૂત્રોએ જણાવ્યું હતું કે શરૂઆતમાં કોર્પોરેટરોને કહેવામાં આવ્યું હતું કે તેમને મીટિંગ માટે બોલાવવામાં આવી રહ્યા છે. જોકે આ ઘટનાક્રમથી વાકેફ લોકોએ જણાવ્યું હતું કે ભાજપ સાથે બેકચેનલ વાટાઘાટો ચાલી રહી છે ત્યારે તેમને ત્રણ દિવસ માટે હોટલમાં રાખવાની યોજના છે. ચર્ચાઓ બૃહન્મુંબઈ મ્યુનિસિપલ કોર્પોરેશન (BMC) તેમજ રાજ્ય સ્તરે સત્તા-વહેંચણી વ્યવસ્થા પર કેન્દ્રિત છે.
નામ ન આપવાની શરતે પાર્ટીના એક વરિષ્ઠ કાર્યકર્તાએ જણાવ્યું હતું કે બાળ ઠાકરેની જન્મજયંતિ નજીક આવી રહી છે અને કોર્પોરેટરો પક્ષના સ્થાપકને શ્રદ્ધાંજલિ આપવા માટે બીએમસીમાં શિવસેના મેયર પદ મેળવવા માંગે છે. આના કારણે વર્તમાન કવાયત જરૂરી બની ગઈ છે.
બીએમસીમાં ભાજપ 89 બેઠકો સાથે સૌથી મોટા પક્ષ
બૃહન્મુંબઈ મ્યુનિસિપલ કોર્પોરેશનમાં 227 સભ્યોના ગૃહમાં ભાજપ 89 બેઠકો સાથે સૌથી મોટા પક્ષ તરીકે ઉભરી આવ્યો છે, પરંતુ તે નગર સરકાર બનાવવા માટે જરૂરી 114 ના બહુમતી આંકડોથી દૂર છે. નાયબ મુખ્યમંત્રી એકનાથ શિંદેના નેતૃત્વમાં શિવસેનાએ 29 બેઠકો જીતી છે, જેના કારણે ભાજપ માટે પ્રતિષ્ઠિત નગર સંસ્થાનું શાસન કરવા માટે તેનો ટેકો મહત્વપૂર્ણ બની ગયો છે.
આ પણ વાંચો – મહારાષ્ટ્રની રાજનીતિનું કિંગ બન્યું ભાજપ, વિપક્ષે જ નહીં સહયોગી દળોને પણ માનવો પડશે દબદબો
શિવસેનાના વરિષ્ઠ નેતાઓએ જણાવ્યું હતું કે ચર્ચામાં સત્તા વહેંચણીના મુદ્દાઓનો સમાવેશ થશે, જેમાં મેયરનું પદ અને સ્થાયી સમિતિનું નિયંત્રણ સામેલ છે, જે સંસ્થાના નાણાકીય બાબતોનું સંચાલન કરે છે. કોર્પોરેટરોને હોટલમાં ખસેડવાના નિર્ણયને સમજાવતા સેનાના એક નેતાએ જણાવ્યું હતું કે ગઠબંધન ભાગીદારો સાથે વાતચીત ચાલુ રહે ત્યારે જૂથને એકસાથે રાખવા માટે આ એક સાવચેતીભર્યું પગલું હતું.
ભાજપે કહ્યું – આ તેમનો આંતરિક મામલો છે
બીજી તરફ આ મામલે ભાજપે કહ્યું કે કોર્પોરેટરોને હોટલમાં લઇ જવા શિવસેનાનો આંતરિક મામલો છે. મહારાષ્ટ્રના મુખ્યમંત્રી દેવેન્દ્ર ફડણવીસે જણાવ્યું હતું કે હોર્સ ટ્રેડિંગનો કોઈ પ્રશ્ન જ નથી. મને લાગે છે કે તેમણે (શિંદે) બધા કોર્પોરેટરોને હોટલમાં બોલાવ્યા હશે કારણ કે અમે બધા કોર્પોરેટરોને મીટિંગ માટે બોલાવ્યા છે.
શિંદેની આગેવાની હેઠળની સેના બૃહન્મુંબઈ મ્યુનિસિપલ કોર્પોરેશનમાં મુખ્ય હોદ્દાઓ માટે સખત સોદાબાજી કરે તેવી અપેક્ષા છે, ત્યારે ભાજપ પણ દબાણ વધારી રહ્યું છે. જે સંકેત આપે છે કે તે થાણે અને કલ્યાણ-ડોમ્બિવલી મ્યુનિસિપલ કોર્પોરેશનોમાં વિરોધ પક્ષમાં બેસી શકે છે. અથવા પોતાના દમ પર સરકારો બનાવવાનો પ્રયાસ કરી શકે છે.
ઉદાહરણ તરીકે થાણેમાં જે એકનાથ શિંદેનો ગઢ છે, તેમની પાર્ટીએ 131 માંથી 75 બેઠકો જીતી છે, જેનો અર્થ એ છે કે તેને શાસન કરવા માટે ભાજપના ટેકાની જરૂર નથી. આ છતાં 28 બેઠકો જીતી ચૂકેલા ભાજપે કહ્યું છે કે જો તેમને વહીવટમાં અર્થપૂર્ણ ભૂમિકા આપવામાં નહીં આવે તો તે વિપક્ષમાં બેસવાનું પસંદ કરી શકે છે.
