રશિયન રાષ્ટ્રપતિ વ્લાદિમીર પુતિન 4-5 ડિસેમ્બરના રોજ ભારત આવી રહ્યા છે. આ દરમિયાન ભારતના વડાપ્રધાન નરેન્દ્ર મોદી અને પુતિનની મીટિંગ યોજાવાની છે. પુતિન પોતે એકદમ ટાઈટ સિક્યુરિટી સાથે ફરે છે તેમજ તેમના ખોરાક, તેમની કાર તેમજ તેમની સાથે જોડાયેલ ઘણી ચોંકાવનારી વાતોને લઈને ચર્ચા થતી રહે છે.
આવી જ એક વાત જે સોશિયલ મીડિયામાં ઘણી વખત સામે આવી છે તેમજ ઘણા મીડિયા પર પુષ્ટિ કરે છે કે પુતિન એક એવા વ્યક્તિ છે કે જેમના પર પોતે બોડી ડબલનો ઉપયોગ કરતા હોવાના આરોપો લાગ્યા છે, એટલે કે પુતિન પોતે તેમના હમશકલ રાખે છે અને જરુર પડે તે હમશકલનો તેઓ ઉપયોગ કરે છે.
યુક્રેનની લશ્કરી ગુપ્તચર એજન્સીએ અગાઉ દાવો કર્યો હતો કે પુતિન ઓછામાં ઓછા ત્રણ હમશકલનો ઉપયોગ કરે છે. આ વ્યક્તિઓ જ્યાં સુધી પુતિનની સેવા કરશે ત્યાં સુધી તેમને જીવંત રાખવામાં આવશે.
યુક્રેનિયન લશ્કરી પ્રવક્તા એન્ડ્રી યુસોવે દાવો કર્યો હતો કે પુતિન જેવા હમશકલનો ઉપયોગ રશિયન ગુપ્તચર સેવાઓ દ્વારા કડક દેખરેખ હેઠળ થાય છે. આ ત્રણ વ્યક્તિઓ મુક્તપણે જીવી શકતા નથી.
રશિયન રાષ્ટ્રપતિ વ્લાદિમીર પુતિન જેવી ઘણી વિશ્વ-પ્રસિદ્ધ વ્યક્તિઓ ઘણીવાર બોડી ડબલનો ઉપયોગ કરતી હોવાનું કહેવાય છે. બોડી ડબલ બનાવવી એ એક જટિલ અને ગુપ્ત પ્રક્રિયા છે, મુખ્યત્વે સુરક્ષા અને ગોપનીયતા માટે કરવામાં આવે છે.
કેટલીકવાર, ચહેરા અને શારીરિક દેખાવને વધુ સુંદર બનાવવા માટે કોસ્મેટિક સર્જરી અથવા પ્રોસ્થેટિક મેકઅપનો ઉપયોગ કરવામાં આવે છે. આધુનિક ટેકનોલોજી, જેમ કે હાઇપરરિયાલિસ્ટિક સિલિકોન માસ્કનો પણ ઉપયોગ કરવામાં આવે છે, જે એટલી વાસ્તવિક લાગે છે કે નજીકથી પણ તેમની વચ્ચે તફાવત કરવો મુશ્કેલ બને છે. વધુમાં, બોડી ડબલને મૂળ વ્યક્તિના રોજિંદા જીવન, વાણી પેટર્ન અને નાની આદતો વિશે જાણવા માટે તાલીમ આપવામાં આવે છે.
ખાસ કરીને જો બોડી ડબલનો ઉપયોગ જાહેર કાર્યક્રમો માટે થઈ રહ્યો હોય, તો તેમની તાલીમમાં મહિનાઓ લાગી શકે છે. ઉદાહરણ તરીકે, કેટલાક અહેવાલો દાવો કરે છે કે પુતિન જેવા નેતાઓના બોડી ડબલ્સને તેમની બોલવાની શૈલી, હાવભાવ અને તેમના હસ્તાક્ષરોનો પણ અભ્યાસ કરાવવામાં આવે છે.
