Monsoon in India : દેશના દક્ષિણ ભાગોમાં ચોમાસું ટૂંક સમયમાં આવી શકે છે. હવામાન વિભાગે કેરળ અને લક્ષદ્વીપમાં વરસાદ અને કર્ણાટકમાં વાવાઝોડાની આગાહી કરી છે. ભારતીય હવામાન વિભાગ (આઇએમડી) એ આગામી બેથી ત્રણ દિવસ દરમિયાન અરબી સમુદ્ર, બંગાળની ખાડી અને આંદામાન સાગરના કેટલાક ભાગોમાં દક્ષિણ-પશ્ચિમ ચોમાસું આગળ વધવા માટે અનુકૂળ પરિસ્થિતિઓની આગાહી કરી છે.
હવામાન વિભાગે 26 થી 29 મે દરમિયાન કેરળ ને લક્ષદ્વીપમાં વાવાઝોડા, વીજળી અને જોરદાર પવન સાથે હળવાથી મધ્યમ વરસાદની આગાહી કરી છે. આ ઉપરાંત આ જ સમયગાળા દરમિયાન તામિલનાડુ, આંતરિક કર્ણાટક, ઉત્તર કર્ણાટક, તેલંગાણા અને તટીય આંધ્રપ્રદેશમાં કેટલાક સ્થળોએ વરસાદ પડવાની સંભાવના છે. આ સાથે જ ગર્જના અને જોરદાર પવન પણ ફૂંકાશે.
મહારાષ્ટ્રમાં વરસાદની આગાહી
મહારાષ્ટ્રના તટીય ક્ષેત્રો અને ગોવામાં પણ 26 થી 28 મે ની વચ્ચે કેટલાક સ્થળોએ હળવાથી મધ્યમ વરસાદની સંભાવના છે. 27 અને 28 મે ના રોજ મધ્ય મહારાષ્ટ્રમાં પણ આવી જ સ્થિતિ જોવા મળશે. ભારતીય હવામાન વિભાગે (આઇએમડી) આગાહી કરી છે કે કર્ણાટકમાં 50-70 કિમી પ્રતિ કલાકની ઝડપે પવન ફૂંકાશે. 26 થી 29 મે દરમિયાન દક્ષિણ કર્ણાટકમાં આવી સ્થિતિ રહેવાની સંભાવના છે.
પૂર્વોત્તરમાં પણ ભારે વરસાદ પડી શકે છે
હવામાન વિભાગે આસામ અને મેઘાલયમાં 26 થી 27 મે દરમિયાન કેટલાક અલગ અલગ સ્થળોએ ભારે વરસાદની આગાહી કરી છે. આ બંને રાજ્યો અને અરુણાચલ પ્રદેશમાં 28 થી 31 મે દરમિયાન ભારે વરસાદની સંભાવના છે. 26, 30 અને 31 મેના રોજ નાગાલેન્ડ, મણિપુર, મિઝોરમ અને ત્રિપુરામાં છૂટાછવાયા સ્થળોએ ભારે વરસાદની સંભાવના છે.
42 વરરાજા પરણવા આવ્યા પણ દૂલ્હનો આવી નહીં, મોડલોના ફોટા બતાવીને છેતરવામાં આવ્યા
ઉત્તર ભારતમાં ભીષણ ગરમીથી રાહત મળવાની સંભાવના
ઉત્તર ભારતમાં ઘણા દિવસોથી જોવા મળી રહેલી ભીષણ ગરમીથી થોડી રાહત મળવાની સંભાવના છે. હવામાન વિભાગે 27 મેના રોજ પંજાબ, હરિયાણા, ચંદીગઢ, દિલ્હી અને પૂર્વ ઉત્તર પ્રદેશમાં છૂટાછવાયા હળવાથી મધ્યમ વરસાદ અને ગાજવીજ સાથે વરસાદની આગાહી કરી છે. રાજસ્થાનમાં પણ 28 અને 29 મેના રોજ આવું જ હવામાન જોવા મળી શકે છે. 28 અને 29 મે ના રોજ પંજાબ, હરિયાણા, ચંદીગઢ અને દિલ્હીમાં વાવાઝોડું આવી શકે છે. 28 થી 31 મેની વચ્ચે થોડા દિવસોમાં પશ્ચિમ ઉત્તર પ્રદેશ અને પૂર્વ ઉત્તર પ્રદેશમાં પણ આવી જ સ્થિતિ જોવા મળી શકે છે.
