ખાટું દહીં ફેંકશો નહીં, રસોઈ અને સ્કીન માટે ઉપયોગી

કોઈને પણ ખાટું દહીં ખાવાનું ગમતું નથી અને તેને ફેંકી દેવું એ જ સૌથી સરળ ઉપાય લાગે છે. ભલે તે બજારમાંથી લાવેલું હોય કે ઘરે બનાવેલું હોય. જો તમે સામાન્ય રીતે ખાટું દહીં ફેંકી દેતા હોવ તો હવે આ ભૂલ કરવાનું બંધ કરો. ભલે તે સીધું ખાવામાં સ્વાદિષ્ટ ન લાગે પરંતુ ખાટું દહીં ઘરના વિવિધ કામોમાં ખૂબ જ ઉપયોગી થઈ શકે છે. અહીં ખાટા થઈ ગયેલા દહીંનો ઉપયોગ કરવાની કેટલીક સરળ રીતો આપવામાં આવી છે.

ખાટા દહીંનો ઉપયોગ કેવી રીતે કરવો

દહીં લાંબા સમય સુધી રાખવામાં આવે તો તે ઘણીવાર ખાટું થઈ જાય છે પછી ભલે તે પેકેજ્ડ દહીં હોય. પેકેજ્ડ દહીંની એક ‘એક્સપાયરી ડેટ’ હોય છે, જેના પછી તે ખાટું થઈ જાય છે (જોકે પરંપરાગત અર્થમાં દહીં બગડી જતું નથી). એક્સપાયરી ડેટ વીતી ગયા પછી આપણે ઘણીવાર તેને ફેંકી દઈએ છીએ પરંતુ ખરેખરમાં તમે તેનો ઘણી રીતે સારો ઉપયોગ કરી શકો છો.

1. ઈડલી અને ઢોસાનું ખીરું બનાવવા માટે

ઈડલી અને ઢોસાનું ખીરું બનાવતી વખતે દહીં એક મુખ્ય સામગ્રી છે. તેમાં રહેલી ખટાશ ખીરાને આથો લાવવામાં અને યોગ્ય રીતે ફૂલવામાં મદદ કરે છે, જેનાથી સ્વાદિષ્ટ પરિણામ મળે છે. જો તમારું દહીં ખાટું થઈ ગયું હોય તો તેને ઈડલી કે ઢોસાના ખીરામાં ભેળવવા માટે સાચવી રાખો.

2. પનીર, મેરિનેડ અને ગ્રેવીનો સ્વાદ વધારવા માટે

જો તમે ઘરે પનીર બનાવતા હોવ તો તે પ્રક્રિયામાં ખાટા દહીંનો ઉપયોગ કરી શકો છો, તે પનીરની વાનગીઓ અથવા અન્ય શાકભાજીની ગ્રેવીને વધુ સ્વાદિષ્ટ બનાવવા માટે પણ ઉત્તમ છે.

3. સ્વાદિષ્ટ કઢી બનાવવા માટે

ઘણા લોકો કઢીમાં ખાટો સ્વાદ લાવવા માટે છાશ ઉમેરે છે પરંતુ તમે તેના બદલે ખાટા દહીંનો ઉપયોગ કરી શકો છો. ખાટા દહીંનો ઉપયોગ કરવાથી કઢી વધુ સ્વાદિષ્ટ અને લાજવાબ બને છે અને અલગથી છાશ ખરીદવાની જરૂર રહેતી નથી.

આ પણ વાંચો: ઘરે જ બનાવો રેસ્ટોરન્ટ અને લારી જેવી ચટાકેદાર વેજ ચાઉમીન, નોંધી લો આસાન રેસીપી

4. ઢોકળા બનાવવા માટે તેનો ઉપયોગ કરો

જો તમે ઇન્સ્ટન્ટ ઢોકળા બનાવવા માંગતા હોવ તો ખીરામાં ખાટા દહીંનો ઉપયોગ કરી શકો છો. દહીં જેટલું વધારે ખાટું હશે ખીરું તેટલું જ સારું બનશે અને ઢોકળા વધુ સ્વાદિષ્ટ બનશે. તેથી જો તમે ઘરે ઢોકળા બનાવતા હોવ તો ખાટું દહીં ચોક્કસપણે સાચવી રાખો. 

5. ત્વચા અને વાળ માટે

પાંચમો ઉપયોગ રસોડાને બદલે સૌંદર્ય સાથે સંબંધિત છે. દહીંને કુદરતી હેર કન્ડિશનર માનવામાં આવે છે અને તેનો ઉપયોગ ત્વચા પર ફેસ પેક તરીકે પણ કરી શકાય છે. વાળ માટે ખાટા દહીંમાં અડધા લીંબુનો રસ ભેળવીને તે મિશ્રણ લગાવો અને 15 મિનિટ સુધી રહેવા દો. ત્વચા પર ચમક લાવવા માટે ખાટા દહીંમાં ચણાનો લોટ ભેળવીને લગાવો. જોકે વાળ અને ત્વચાની સારવાર માટે ખૂબ જ વાસી કે જૂના થઈ ગયેલા દહીંનો ઉપયોગ કરવાનું ટાળો.