ઇમરાન ખાનને ભારતીય પાસપોર્ટ મેળવવામાં મુશ્કેલી

બોલિવૂડ અભિનેતા ઈમરાન ખાન હાલમાં પોતાની નાગરિકતાને લઈને ચર્ચામાં છે. મુંબઈમાં મુખ્ય ચૂંટણી કમિશનર જ્ઞાનેશ કુમાર વિરુદ્ધના વિરોધ પ્રદર્શનમાં ભાગ લીધા બાદ તેને 28 ઓક્ટોબર સુધીમાં ભારત છોડી દેવા માટેની નોટિસ આપવામાં આવી છે. હવે અભિનેતા આ આદેશને પડકારવા માટે બોમ્બે હાઈકોર્ટમાં જવાની તૈયારી કરી રહ્યો છે.

ઈમરાન અમેરિકન નાગરિક છે તેનો જન્મ 13 જાન્યુઆરી, 1983ના રોજ અમેરિકાના વિસ્કોન્સિન રાજ્યના મેડિસન શહેરમાં થયો હતો. તેની પાસે ‘ઓવરસીઝ સિટિઝન ઓફ ઈન્ડિયા’ (OCI) કાર્ડ છે. તાજેતરમાં ભારતમાં એક વિરોધ પ્રદર્શન દરમિયાન તેને અટકાયતમાં લેવામાં આવ્યા હતા અને હવે તેમને દેશ છોડવાની નોટિસ મળી છે. રસપ્રદ વાત એ છે કે આ અભિનેતાએ વર્ષો પહેલા ભારતીય પાસપોર્ટ મેળવવાની ઈચ્છા વ્યક્ત કરી હતી અને એક મુલાકાતમાં જણાવ્યું હતું કે તેઓ તે મેળવવા માટેની સત્તાવાર પ્રક્રિયામાં જોડાયેલા છે.

ભારતીય પાસપોર્ટ વિશે ઈમરાન ખાને શું કહ્યું હતું?

વર્ષ 2011ની એક મુલાકાતમાં ઈમરાન ખાને ભારતીય પાસપોર્ટ મેળવવાના પોતાના પ્રયાસો વિશે વાત કરી હતી. તેણે કહ્યું હતું, “હું ભારતીય પાસપોર્ટ મેળવવાનો પ્રયાસ કરી રહ્યો છું. સત્તાવાર પ્રક્રિયા ચાલી રહી છે. મને આશા છે કે તે જલ્દી મળી જશે, કારણ કે કેટલીક મહત્વપૂર્ણ બાબતો થવાની સંભાવના છે.”

મત ન આપી શકવા બદલ નિરાશા વ્યક્ત કરી

આ ઉપરાંત 2013માં ઈમરાને ભારતમાં મતદાન ન કરી શકવા બદલ પોતાની નિરાશા વ્યક્ત કરી હતી. તેમણે ઉલ્લેખ કર્યો હતો કે તેઓ લોકોમાં મતદાનના મહત્વ વિશે જાગૃતિ લાવીને પોતાનું યોગદાન આપવાનો પ્રયાસ કરે છે.

આ પહેલા જાન્યુઆરી 2009માં ‘ધ ટાઈમ્સ ઓફ ઈન્ડિયા’ સાથેની એક મુલાકાતમાં ઈમરાને પોતાની અમેરિકન નાગરિકતા વિશે વાત કરી હતી. 26/11ના મુંબઈ આતંકવાદી હુમલા બાદ મતદાનના મહત્વ પર ચર્ચા કરતી વખતે તેમણે કહ્યું હતું, “ખૂબ ઓછા લોકો જાણે છે કે હું અમેરિકન નાગરિક છું. મેં ચાર વર્ષ પહેલા બરાક ઓબામા માટે મતદાન પણ કર્યું હતું.”

દેશ છોડી દેવાની નોટિસ કેમ આપવામાં આવી?

10 ઓક્ટોબરના રોજ ઈમરાન ખાને મુંબઈના ઓગસ્ટ ક્રાંતિ મેદાનમાં યોજાયેલા એક વિરોધ પ્રદર્શનમાં ભાગ લીધો હતો. આ પ્રદર્શનમાં મુખ્ય ચૂંટણી કમિશનર જ્ઞાનેશ કુમારના રાજીનામાની માંગ કરવામાં આવી હતી. આ ઘટના દરમિયાન પોલીસે ઈમરાન સહિત કેટલાક લોકોને કસ્ટડીમાં લીધો હતા.

વિરોધ સ્થળે મીડિયા સાથે વાત કરતા ઈમરાને કહ્યું, “મારી કોઈ માંગણીઓ નથી. હું અહીં એક નાગરિક તરીકે આવ્યો છું એક એવી વ્યક્તિ તરીકે જે આ શહેરમાં રહે છે. હું અહીં એ જાણવા આવ્યો છું કે હરવા-ફરવાની સ્વતંત્રતા પર પ્રતિબંધ કેમ મૂકવામાં આવી રહ્યો છે અને લોકોના અવાજને કેમ દબાવવામાં આવી રહ્યો છે.”

આ પણ વાંચો: ‘મને બાળકો જોઈએ છે પણ પત્ની નહીં’; લગ્ન અને બાળકોના પ્લાનિંગ પર સલમાન ખાનનો મોટો વિસ્ફોટ

ત્યારબાદ ભાજપના નેતા કિરીટ સોમૈયાએ તેમની સામે ફરિયાદ નોંધાવી. આ ફરિયાદના આધારે ફોરેનર્સ રિજનલ રજિસ્ટ્રેશન ઓફિસ (FRRO) એ ઈમરાનને એક નોટિસ જારી કરી, જેમાં તેમને 28 ઓક્ટોબર સુધીમાં ભારત છોડી દેવાનો આદેશ આપવામાં આવ્યો છે. નોટિસમાં આરોપ લગાવવામાં આવ્યો છે કે વિરોધ પ્રદર્શનમાં ભાગ લઈને તેમણે વિદેશી નાગરિકોને લાગુ પડતા નિયમોનું ઉલ્લંઘન કર્યું છે.

ઈમરાન ખાનનો જન્મ યુનાઇટેડ સ્ટેટ્સમાં થયો હતો.

ઈમરાન ખાનની માતા નુઝહત ખાન અભિનેતા આમિર ખાનની બહેન છે, જ્યારે તેમના પિતાનું નામ અનિલ પાલ છે. ઈમરાનના જન્મ સમયે તેમના માતા-પિતા યુનાઇટેડ સ્ટેટ્સમાં અભ્યાસ કરી રહ્યા હતા. જ્યારે તેઓ લગભગ બે વર્ષના હતા, ત્યારે તેમના માતા-પિતા અલગ થઈ ગયા. ત્યારબાદ ત્રણ વર્ષની ઉંમરે ઈમરાન તેમની માતા સાથે મુંબઈ આવી ગયા, જ્યાં તેમણે તેમનું બાળપણ વિતાવ્યું.