Indian Origin Politicians In Uk : હરિયાણાથી બ્રિટન પહોંચેલા એક ભારતીય પરિવારની કહાણી દુનિયાભરમાં ચર્ચાનો વિષય બની ગઈ છે. 23 વર્ષનો તુષાર કુમાર બ્રિટનમાં ભારતીય મૂળના સૌથી યુવા મેયર બન્યા છે, તો તેમની માતા પરવીન રાની પણ મેયર તરીકે ચૂંટાઈ આવી છે. પરિવારે તેે ગર્વની ક્ષણ ગણાવી છે. આ માહિતી સમાચાર એજન્સી પ્રેસ ટ્રસ્ટ ઓફ ઈન્ડિયા (પીટીઆઈ)ના અહેવાલમાં આપવામાં આવી છે.
તુષાર કુમારે 13 મેના રોજ એલ્સ્ટ્રી અને બોરહામવુડ ટાઉન કાઉન્સિલના મેયર તરીકેનો કાર્યભાર સંભાળ્યો હતો. આ સાથે, તેઓ યુકેમાં ભારતીય મૂળના સૌથી યુવા મેયર બન્યા હતા. એક અઠવાડિયા પછી, તેમની માતા પરવીન રાની હર્ટસમેર બરો કાઉન્સિલના મેયર તરીકે ચૂંટાયા હતા.
આ પરિવાર 2013 માં હરિયાણાથી યુનાઇટેડ કિંગડમ ગયો હતો. સુનીલ દહિયાએ પીટીઆઈને જણાવ્યું હતું કે તે સમયે તેમની પાસે કોઈ સ્પષ્ટ યોજના નહોતી. “જ્યારે અમે 2013 માં યુકે આવ્યા હતા, ત્યારે અમારી પાસે કોઈ ખાસ પ્લાન ન હતો. તે સમયે, તુષાર માત્ર 10 વર્ષનો હતો. ”
તેમણે કહ્યું કે આ ખૂબ જ ગર્વની વાત છે કે હવે માતા અને પુત્ર બંને મેયર પદ પર છે. પીટીઆઈના જણાવ્યા અનુસાર, તુષાર કુમારે નાની ઉંમરે જાહેર જીવનમાં પગ મૂક્યો હતો. લંડનમાં અભ્યાસ દરમિયાન, તેઓ 20 વર્ષની ઉંમરે કાઉન્સિલર તરીકે ચૂંટાયા હતા અને બાદમાં ડેપ્યુટી મેયર બન્યા પછી મેયર બન્યા હતા.
તેના પિતાએ કહ્યું કે, તુષાર માને છે કે જાહેર અથવા સમાજ સેવામાં જોડાવા માટે ઉંમર ક્યારેય અવરોધ ન હોવી જોઈએ.
તુષાર અને તેમની માતા પરવીન રાની બંને સામાજિક કાર્યોમાં સક્રિય રહ્યા છે. તે મફતમાં હિન્દી શીખવે છે તેમજ સામાજિક સંસ્થાઓ સાથે કામ કરે છે.
પરિવારનું પૈતૃક ગામ હરિયાણાના સોનીપત જિલ્લાનું રોહના ગામ છે અને તેઓ વિદેશ જતા પહેલા રોહતકમાં રહેતા હતા.
સુનીલ દહિયાએ કહ્યું કે, અમે હંમેશા અમારા મૂળ સાથે જોડાયેલા છીએ. તેઓ દર વર્ષે તેમના ગામ અને શહેર જાય છે. તેમણે કહ્યું કે તુષાર અને તેમની માતા બંને યુકેમાં જન સમુદાય સેવા અને જનસંપર્ક માટે સંપૂર્ણ રીતે સમર્પિત છે. ”
