મણિપુરના પૂર્વ મુખ્યમંત્રી એન બિરેન સિંહનું છલકાયું દર્દ, કહ્યું – મારી વિરુદ્ધ ષડયંત્ર રચવામાં આવ્યું હતું

Manipur : મણિપુરના પૂર્વ મુખ્યમંત્રી એન બિરેન સિંહે તેમના કેટલાક સાથીઓ પર તેમને પદ પરથી હટાવવા માટે ષડયંત્ર રચવાનો આરોપ લગાવ્યો છે. બિરેન સિંહે કહ્યું છે કે ભાજપ સરકારે આવતા વર્ષની શરૂઆતમાં યોજાનારી વિધાનસભા ચૂંટણી પહેલા લોકોનો ખોવાયેલો વિશ્વાસ અને ભરોસો પાછો મેળવવો જોઈએ.

એન બિરેન સિંહે સવાલ કર્યો હતો કે ફેબ્રુઆરી 2025 માં મણિપુરના મુખ્યમંત્રી પદ પરથી હટાવવા છતાં હિંસા શા માટે ચાલુ રહી અને અન્ય સમુદાયોમાં કેમ ફેલાઈ ગઇ? તેમણે એમ પણ કહ્યું હતું કે તેમને મુખ્યમંત્રી પદ પર પાછા ફરવાની જનતા તરફથી જોરદાર માંગ છે. પૂર્વ મુખ્યમંત્રીએ પીટીઆઈને આપેલા એક વિશેષ ઇન્ટરવ્યુમાં આ વાત કહી હતી.

કોંગ્રેસ સાથે મળીને ષડયંત્ર રચવાનો આરોપ

એન બિરેન સિંહે કહ્યું કે 2017 થી મારી સાથે સારી રીતે વર્તન કરવામાં આવ્યું નથી. હું દિલ્હીના નેતૃત્વને દોષી ઠેરવી રહ્યો નથી, પરંતુ રાજ્યના કેટલાક નેતાઓને દોષી ઠેરવી રહ્યો છું જેમણે કોંગ્રેસ સાથે મળીને મારી વિરુદ્ધ ષડયંત્ર રચ્યું હતું. 

તેમણે કહ્યું કે કેટલાક ધારાસભ્યો એવા પણ છે જે ક્યારેય સ્વીકારી શકતા નથી કે કોંગ્રેસ છોડ્યા બાદ હું બે વાર મુખ્યમંત્રી કેવી રીતે બન્યો. તેઓ ભાજપને પોતાની અંગત સંપત્તિ માને છે. તેથી તેઓએ એક ષડયંત્ર રચ્યું અને મને રાજીનામું અપાવ્યું હતું.

હાલ વાય ખેમચંદ સિંહ ભાજપ સરકારનું નેતૃત્વ કરી રહ્યા છે. તેઓ પાર્ટીના વરિષ્ઠ નેતાઓમાંના એક છે જેમણે 2025 માં બિરેન સિંહને મુખ્યમંત્રી પદ પરથી હટાવવાની માંગ કરી હતી.

‘ખ્રિસ્તીઓ વિરુદ્ધ ખ્રિસ્તીઓની લડાઈ ‘

નાગા અને કુકી સમુદાયો વચ્ચે ચાલી રહેલી હિંસા તરફ ઇશારો કરતા બિરેન સિંહે આ દલીલ ઉપર પણ સવાલ ઉઠાવ્યા હતા કે તેમને હટાવવાથી મણિપુરમાં શાંતિ પુનઃસ્થાપિત કરવામાં મદદ મળશે. તેમણે આ વર્ષે ફેબ્રુઆરીમાં ખેમચંદ સરકારની રચના બાદ શરુ થયેલી હિંસાના સંદર્ભમાં પૂછ્યું કે હવે બિરેન હટી ગયા છે. તો હવે શું થયું? કેટલા નગા ભાઈઓ માર્યા ગયા છે? તેઓ મારા પર આરોપ લગાવી રહ્યા હતા. તેઓ કહેતા હતા કે હું બહુમતીની તરફેણ કરું છું. હવે તે ખ્રિસ્તી વિરુદ્ધ ખ્રિસ્તીની લડાઇ છે. યુરોપિયન યુનિયન ક્યાં ગયું?

હાલની સરકારની કામગીરીથી નાખુશ બિરેન સિંહે કહ્યું કે તેમને ચિંતા છે કે ભાજપ લોકોનો વિશ્વાસ ગુમાવી રહ્યું છે કારણ કે પાર્ટીના રાજકીય એજન્ડાના મુખ્ય મુદ્દાઓ પર કોઈ નક્કર કામ દેખાતું નથી. જ્યારે તેમને પૂછવામાં આવ્યું કે શું લોકોની વધતી બેચેની વિધાનસભા ચૂંટણીમાં ભાજપને નુકસાન પહોંચાડી શકે છે, તો તેમણે જવાબ આપ્યો કે, તે મારી મુખ્ય ચિંતા છે. 

લખનઉમાં અમિત શાહે કહ્યું – મોદી જી ત્રણ વખત પીએમ બન્યા છે અને ચોથી વખત પણ બનશે

જ્યારે તેમને પૂછવામાં આવ્યું કે શું ભાજપ પાસે વિધાનસભા ચૂંટણી પહેલા લોકોનો ખોવાયેલો વિશ્વાસ પાછો મેળવવા માટે પૂરતો સમય છે, તો પૂર્વ મુખ્યમંત્રીએ આશા વ્યક્ત કરી હતી કે ભાજપનું કેન્દ્રીય નેતૃત્વ પરિસ્થિતિને સંભાળવા માટે હસ્તક્ષેપ કરશે.

બિરેન સિંહે ફેબ્રુઆરી 2025માં રાજીનામું આપ્યું હતું

ભાજપમાં અસંતોષ વધી રહ્યો હોવાથી અને કોંગ્રેસ તરફથી અવિશ્વાસ પ્રસ્તાવની ધમકી પણ હોવાથી બિરેન સિંહે 9 ફેબ્રુઆરી 2025 ના રોજ મુખ્યમંત્રી પદેથી રાજીનામું આપ્યું હતું. તેમના મંત્રીમંડળના સભ્ય રહેલા ખેમચંદ તે ભાજપના વરિષ્ઠ નેતાઓમાં સામેલ હતા, જેમણે કેન્દ્રીય નેતૃત્વને ચેતવણી આપી હતી કે જો બિરેન સિંહને હટાવવામાં નહીં આવે તો સરકાર પડી શકે છે.