Who’s Ajinkya Shinde : દિલ્હીમાં કોકરોચ જનતા પાર્ટીના પ્રદર્શનને લઇને દિલ્હી પોલીસે સીજેપીના સંસ્થાપક અભિજીત દીપકે, પ્રવક્તા સૌરવ દાસ અને આશુતોષ રાંકાની અટકાયત કરી છે. આ પછી સીજેપીના રાષ્ટ્રીય સંગઠન પ્રભારી અજિંક્ય શિંદે દિલ્હીમાં વિરોધ પ્રદર્શનનું નેતૃત્વ કરી રહ્યા છે.
શનિવારે સવારે ઈન્દિરા ગાંધી ઈન્ટરનેશનલ એરપોર્ટ પર ફ્લાઈટ લેન્ડ થયાના થોડા સમય બાદ અભિજીત દીપકે, સૌરવ દાસ અને આશુતોષ રાંકાની ફ્લાઈટમાં જ અટકાયત કરવામાં આવી હતી. દિલ્હી પોલીસની એક ટીમ ત્રણેયને એરપોર્ટથી અજાણ્યા સ્થળે લઈ ગઈ હતી. પોલીસ સૂત્રોએ જણાવ્યું હતું કે ત્રણેયને અલગ-અલગ રાખવામાં આવી રહ્યા છે.
અભિજીત દીપકેએ વીડિયો જાહેર કર્યો
સીજેપી પ્રમુખ અભિજીત દીપકેએ તેમની અટકાયત દરમિયાન કથિત રીતે જાહેર કરેલા 20 સેકન્ડના વીડિયોમાં તેમણે કહ્યું હતું કે તે, સૌરવ દાસ અને આશુતોષ રાંકાની ધરપકડ કરવામાં આવી છે અને હવેથી અજિંક્ય આંદોલનનું નેતૃત્વ કરશે. સૂત્રો કહે છે કે આ વીડિયો પ્રી-રેકોર્ડેડ હતો. આ મામલે પાર્ટીના જવાબની રાહ જોવાઈ રહી છે.
કોણ છે અજિંક્ય શિંદે?
અજિંક્ય શિંદે મહારાષ્ટ્રના અલીગબાગની રહેવાસી છે. આ સાથે જ તેઓ આમ આદમી પાર્ટી (આપ)ના પૂર્વ કાર્યકર્તા છે. તેમણે 2016ની ગોવાની ચૂંટણી દરમિયાન આમ આદમી પાર્ટી માટે પ્રચાર કર્યો હતો અને બાદમાં મહારાષ્ટ્રમાં પાર્ટી માટે કામ કર્યું હતું.
ભ્રષ્ટાચાર વિરોધી આંદોલન બાદ આમ આદમી પાર્ટીમાં જોડાતા પહેલા તેઓ આઈટી સેક્ટરમાં કામ કરતા હતા. પોતાની મોટી કમાણીની નોકરી છોડીને આપમાં જોડાયા હતા.
ભાજપના નેતા સંબિત પાત્રાએ કહ્યું – અરાજક તત્ત્વ ફેલ, ભીડતંત્ર પર લોકતંત્રની જીત
અજિંક્ય શિંદે કમ્પ્યુટર સાયન્સમાં સ્નાતક છે અને પૂણેની એક આઇટી કંપનીમાં ઘણા વર્ષો સુધી કામ કર્યું હતું. જ્યારે સીજેપી અસ્તિત્વમાં આવ્યું ત્યારે તેમાં જોડાયા હતા અને નીટ પરીક્ષાના પેપર લીકને લઈને જૂન-જુલાઈમાં દિલ્હીમાં થયેલા વિરોધ પ્રદર્શનમાં પણ સામેલ હતા. આ પછી તેઓ પાર્ટીની કોર ટીમના સભ્ય બન્યા હતા અને હાલમાં તેના રાષ્ટ્રીય સંગઠન પ્રભારી તરીકે કામ કરી રહ્યા છે.
સીજેપીએ સ્પેશિયલ ઇન્ટેન્સિવ રિવિઝન (એસઆઈઆર) અને મુખ્ય ચૂંટણી કમિશનર જ્ઞાનેશ કુમાર વિરુદ્ધ 10 ઓક્ટોબરે જંતર-મંતર પર વિરોધ પ્રદર્શનનું આહ્વાન કર્યું છે. અહેવાલો અનુસાર મધ્ય દિલ્હીના જંતર-મંતર તરફ કૂચ કરવાનો પ્રયાસ કરી રહેલા બે હજારથી વધુ લોકોની સવારથી અટકાયત કરવામાં આવી છે.
