‘ગ્રો મોર, અચીવ મોર’, પીએમ મોદીએ મેલબોર્નમાં ભારતીયોને સંબોધિત કર્યા, જણાવ્યા ભારતના એજન્ડા

PM Modi Australia Go to : વડાપ્રધાન નરેન્દ્ર મોદી ઓસ્ટ્રેલિયાના પ્રવાસે છે. ગુરુવારે તેમણે મેલબોર્નમાં એક કાર્યક્રમ દરમિયાન ઓસ્ટ્રેલિયામાં રહેતા 30,000 થી વધુ ભારતીય મૂળના લોકોને સંબોધિત કર્યા હતા. તેમની સાથે ઓસ્ટ્રેલિયન પ્રધાનમંત્રી એન્થોની અલ્બેનીઝ પણ હતા. ઓસ્ટ્રેલિયન વડા પ્રધાને પીએમ મોદીની નીતિઓની પ્રશંસા કરી હતી અને ભારત સાથે ઓસ્ટ્રેલિયાના ફૂટનીતિક સંબંધોનો પણ ઉલ્લેખ કર્યો હતો.

પીએમ મોદીએ ઓસ્ટ્રેલિયામાં ઉપસ્થિત ભારતીયોને ભારતના બદલાતા વૈશ્વિક સ્વરૂપ અને વિકસિત રાષ્ટ્ર બનવાના સંકલ્પથી વાત કરી હતી. તેમણે પોતાના ભાષણની શરુઆત હળવા અંદાજમાં કરી હતી અને કહ્યું હતું કે તે 12 વર્ષમાં ત્રીજી વખત ઓસ્ટ્રેલિયા પ્રવાસે છે અને ક્રિકેટની ભાષાની દ્રષ્ટિએ આ તેમની હેટ્રિક છે.

વિકસિત ભારતનું લક્ષ્ય

પોતાના ભાષણમાં વડા પ્રધાન નરેન્દ્ર મોદીએ એન્થોની અલ્બેનીઝની હાજરીમાં ‘ગ્રો મોર, અચીવ મોર’ સૂત્ર આપ્યું હતું. તેમના ભાષણ દરમિયાન આખું સ્ટેડિયમ ‘મોદી-મોદી’ના નારા સાથે ગુંજી ઉઠ્યું હતું. તેમણે 21મી સદીના ભારતની મહત્વાકાંક્ષાઓ અને પ્રગતિ પર ભાર મૂક્યો હતો. તેમણે કહ્યું કે આજનું ભારત વિકસિત રાષ્ટ્ર બનવાના લક્ષ્ય પર ઝડપથી કામ કરી રહ્યું છે.

પ્રધાનમંત્રી મોદીએ જણાવ્યું હતું કે હવે ભારતમાં એક સ્વપ્નનો જન્મ થાય છે, પછી એક નવું અને મોટું સપનું જન્મે છે. પીએમ મોદીએ ‘ગ્રો મોર, અચીવ મોર’ સૂત્ર આપ્યું હતું અને તેને ઘણી વખત પુનરાવર્તિત કર્યું હતું. 

ચંદ્રયાન અને ગગનયાનનો ઉલ્લેખ

આ દરમિયાન પીએમ મોદીએ ચંદ્રયાન-3ની સફળતા, ગગનયાન મિશન અને સ્પેસ સ્ટેશનનો પણ ઉલ્લેખ કર્યો હતો. તેમણે કહ્યું હતું કે ભારતે ચંદ્રયાન-3 મારફતે ચંદ્રના દક્ષિણ ધ્રુવ પર સફળતાપૂર્વક લેન્ડીંગ કરીને ઇતિહાસ રચ્યો હતો, જે અન્ય કોઈ દેશ કરી શક્યો નહથી, પણ ભારતને તેનાથી સંતુષ્ટ રહ્યું નથી.

ગ્રો મોર, અચીવ મોરની ભાવના સાથે આગળ વધતાં હવે ભારત ગગનયાન મિશન હેઠળ પોતાનું પ્રથમ માનવયુક્ત અંતરિક્ષ યાન મોકલવાની તૈયારી કરી રહ્યું છે. ભારત પોતાનું સ્પેસ સ્ટેશન બનાવવાની દિશામાં પણ કામ કરી રહ્યું છે. 

સ્ટાર્ટ-અપ્સનો પણ ઉલ્લેખ કરવામાં આવ્યો

વડા પ્રધાન નરેન્દ્ર મોદીએ કહ્યું કે ભારત અને ઓસ્ટ્રેલિયા જે પણ કરે છે, તેનાથી બંને દેશોને ફાયદો થાય છે. ભારત-ઓસ્ટ્રેલિયા વેપાર કરાર આનું મુખ્ય ઉદાહરણ છે. તેમણે કહ્યું કે છેલ્લા બાર વર્ષોમાં ભારત વિશ્વની ત્રીજી સૌથી મોટી સ્ટાર્ટઅપ ઇકોસિસ્ટમ તરીકે ઉભરી આવ્યું છે અને હવે એક ભારતીય સ્પેસ સ્ટાર્ટઅપ પ્રથમ વખત તેના રોકેટનો ઉપયોગ કરીને ઉપગ્રહો લોન્ચ કરવા માટે તૈયાર છે. મને ખુશી છે કે શિક્ષણ, કૌશલ્ય અને નવીનતાના ક્ષેત્રોમાં ભારત અને ઓસ્ટ્રેલિયા વચ્ચેની ભાગીદારી વધુ ગાઢ અને મજબૂત થઈ રહી છે. 

રામ મંદિર દાન ચોરી વિવાદ : શું આ મામલો યુપીની રાજનીતિ બદલી નાખશે, ભાજપ માટે શું છે દાવ પર?

ડિફેન્સ સેન્ટર અને ઓપરેશન સિંદૂરની સફળતા

ભારતીય સમુદાયના એક કાર્યક્રમને સંબોધતા વડા પ્રધાન નરેન્દ્ર મોદીએ કહ્યું કે વિશ્વ ભારતના રક્ષા પ્લેટફોર્મની ક્ષમતા અને વિશ્વસનીયતા જોઈ રહી છે. તમે ઓપરેશન સિંદૂર દરમિયાન તેનું પ્રદર્શન જોયું જ હશે. વિસ્ફોટો આતંકીઓના અડ્ડાઓ પર થતા હતા પણ તેની ગુંજ આખી દુનિયામાં સંભળાતી હતી. 

પીએમ મોદીએ કહ્યું કે છેલ્લા 12 વર્ષોમાં, ‘મેક ઇન ઇન્ડિયા’ વૈશ્વિક બ્રાન્ડ બની ગઈ છે. આપણા મોબાઈલ ફોન, આપણા ઈલેક્ટ્રોનિક્સ દુનિયાના બજારોમાં પહોંચી ગયા છે. આપણા ઓટોમોબાઇલ અને ફાર્માસ્યુટિકલ ઉત્પાદનોએ વૈશ્વિક સ્તરે તેમની હાજરી વધારી છે.