પંજાબના ફિરોઝપુર જિલ્લામાં આવેલું હુસૈનીવાલા રેલવે સ્ટેશન ભારતના સૌથી અનોખા સ્ટેશનોમાંનું એક છે. આ સ્ટેશન ભારત પાકિસ્તાન સરહદની અત્યંત નજીક આવેલું છે. આ સ્ટેશનની સૌથી ચોંકાવનારી વાત એ છે કે અહીં આખું વર્ષ કોઈ નિયમિત ટ્રેન આવતી નથી. વર્ષના 363 દિવસ આ સ્ટેશન ખાલીખમ અને સુમસામ જોવા મળે છે.
કેમ વર્ષમાં માત્ર બે જ વાર ચાલે છે ટ્રેન? આ સ્ટેશનનું મહત્વ ઐતિહાસિક અને ભાવનાત્મક છે. હુસૈનીવાલા એ જ પવિત્ર સ્થળ છે જ્યાં મહાન સ્વતંત્રતા સેનાની ભગત સિંહ, રાજગુરુ અને સુખદેવના અંતિમ સંસ્કાર કરવામાં આવ્યા હતા. આ શહીદોને શ્રદ્ધાંજલિ આપવા માટે દર વર્ષે મોટી સંખ્યામાં લોકો અહીં પહોંચે છે. ભીડને ધ્યાનમાં રાખીને રેલવે વિભાગ માત્ર બે ખાસ પ્રસંગોએ જ અહીં વિશેષ ટ્રેન સેવા શરૂ કરે છે. બાકીના દિવસોમાં મુસાફરોની સંખ્યા નહિવત હોવાથી અહીં ટ્રેન ઉભી રાખવી શક્ય હોતી નથી.
કયા બે દિવસે ચાલે છે ટ્રેન? 23 માર્ચ: આ દિવસે શહીદ ભગત સિંહ, રાજગુરુ અને સુખદેવનો શહીદ દિવસ મનાવવામાં આવે છે. દેશભરમાંથી લોકો અહીં નતમસ્તક થવા આવે છે.
વૈશાખી: એપ્રિલ મહિનામાં આવતા વૈશાખીના પર્વ પર પણ અહીં શ્રદ્ધાળુઓ અને પ્રવાસીઓ માટે ખાસ ટ્રેન દોડાવવામાં આવે છે.
સ્ટેશનનો ઇતિહાસ અને મહત્વ: આ સ્ટેશનનો ઇતિહાસ ભારત પાકિસ્તાનના ભાગલા સાથે જોડાયેલો છે. 1947 પહેલા આ રેલ માર્ગ બંને દેશોને જોડતો હતો અને અહીંથી નિયમિત ટ્રેનો દોડતી હતી. ભાગલા પછી આ રૂટ બંધ થઈ ગયો અને સ્ટેશનનું મહત્વ ઓછું થઈ ગયું. જોકે, પાછળથી આ સ્થળને શહીદ સ્મારક તરીકે વિકસાવવામાં આવ્યું. આજે પણ અહીં આવનારા લોકો માત્ર મુસાફરી માટે નહીં પણ દેશના વીર સપૂતોને નમન કરવા માટે આવે છે. ભારતભરમાં આવું બીજું કોઈ રેલવે સ્ટેશન નથી જે આટલું ઓછું ઉપયોગમાં લેવાતું હોવા છતાં આટલું સન્માન ધરાવતું હોય.
