T20 World Cup: ફાઈનલ માટે અમદાવાદમાં કડક સુરક્ષા વ્યવસ્થા: સ્ટેડિયમ ખાતે 4500થી વધુ પોલીસ તૈનાત

સુરક્ષા વ્યવસ્થાના ભાગરૂપે સમગ્ર સ્ટેડિયમ અને આસપાસના વિસ્તારમાં કુલ અંદાજે 4500 જેટલા પોલીસકર્મીઓ તૈનાત કરવામાં આવશે. આ બંદોબસ્તમાં ઉચ્ચ અધિકારીઓથી લઈને મેદાન સ્તરના કર્મચારીઓ સુધીનો મોટો દળ સામેલ રહેશે. સુરક્ષા વ્યવસ્થામાં 1 જેસીપી, 8 ડીસીપી, 15 એસીપી, 30 પીઆઈ અને 91 પીએસઆઈ સહિત કુલ 121થી વધુ પોલીસ અધિકારીઓ ફરજ બજાવશે. તેમના ઉપરાંત 2200થી વધુ પોલીસકર્મીઓને સ્ટેડિયમ અને તેની આસપાસના વિસ્તારોમાં તૈનાત કરવામાં આવશે.

ફાઈનલ મેચને ધ્યાનમાં રાખીને બોમ્બ ડિટેક્શન એન્ડ ડિસ્પોઝલ સ્ક્વોડની વિશેષ વ્યવસ્થા પણ કરવામાં આવી છે. સ્ટેડિયમ અને આસપાસના વિસ્તારોમાં સુરક્ષા તપાસ માટે 6 BDDS ટીમોને તૈનાત કરવામાં આવશે, જે મેચ પહેલાં અને દરમિયાન સતત ચેકિંગ અને મોનિટરિંગ કરશે. કોઈપણ શંકાસ્પદ વસ્તુ અથવા પરિસ્થિતિ સામે તરત કાર્યવાહી કરી શકાય તે માટે ખાસ તૈયારી કરવામાં આવી છે.

આ ઉપરાંત ટ્રાફિક વ્યવસ્થા સુનિશ્ચિત કરવા માટે પણ ખાસ આયોજન કરવામાં આવ્યું છે. મેચના દિવસે સ્ટેડિયમ તરફ જતા માર્ગો પર ભારે ટ્રાફિક રહેવાની શક્યતા હોવાથી 1500 જેટલા ટ્રાફિક પોલીસકર્મીઓને તૈનાત કરવામાં આવશે. તેઓ સ્ટેડિયમ આસપાસના મુખ્ય માર્ગો, પાર્કિંગ વિસ્તારો અને શહેરના મહત્વના જંક્શનો પર ટ્રાફિક નિયંત્રણ માટે કામગીરી કરશે.

પોલીસ તંત્ર દ્વારા સ્ટેડિયમમાં પ્રવેશ માટે પણ ખાસ માર્ગદર્શિકા અમલમાં મૂકવામાં આવશે. દર્શકોને સુરક્ષા તપાસ બાદ જ સ્ટેડિયમમાં પ્રવેશ આપવામાં આવશે. સાથે જ CCTV કેમેરા, મોનિટરિંગ રૂમ અને કંટ્રોલ રૂમ દ્વારા સમગ્ર પરિસ્થિતિ પર સતત નજર રાખવામાં આવશે.

આ સમગ્ર આયોજનનો મુખ્ય હેતુ ક્રિકેટપ્રેમીઓને સુરક્ષિત અને વ્યવસ્થિત વાતાવરણમાં મેચનો આનંદ માણવાની તક આપવાનો છે. ભારત અને ન્યૂઝીલેન્ડ વચ્ચેની આ ફાઈનલ મેચને લઈને સમગ્ર અમદાવાદમાં ભારે ઉત્સાહ જોવા મળી રહ્યો છે અને શહેર હવે આ વૈશ્વિક ક્રિકેટ મહોત્સવ માટે સંપૂર્ણ રીતે તૈયાર થઈ ગયું છે.