Vijay Rashmika Wedding ceremony: વિજય દેવરકોંડા અને રશ્મિકા મંદાના એ તેમના લગ્નની પુષ્ટિ કરી, આ ફિલ્મથી શરૂ થઇ હતી તેમની લવ સ્ટોરી

Vijay Deverakonda Rashmika Mandanna Wedding ceremony: સાઉથ સુપરસ્ટાર વિજય દેવરકોંડા અને અભિનેત્રી રશ્મિકા મંદાના તેમના લગ્નના સમાચારને લઈને ઘણા સમયથી ચર્ચામાં છે. ઘણી વખત સોશિયલ મીડિયા પર તેમના લગ્નની તારીખ જાહેર કરવામાં આવી હતી, પરંતુ બંનેના ચાહકો સત્તાવાર પુષ્ટિની રાહ જોતા હતા. હવે આ ઇન્તેજાર સમાપ્ત થયો છે. હકીકતમાં, આ કપલે સોશિયલ મીડિયા પર એક સ્ટોરી પોસ્ટ કરીને તેમના લગ્નના સમાચાર પર મહોર લગાવી છે.

આટલું જ નહીં, રશ્મિકા અને વિજય બંનેએ પોસ્ટમાં એમ પણ કહ્યું હતું કે તેમણે તેમના લગ્નનું નામ ‘ધ વેડિંગ ઓફ VIROSH’ રાખ્યું છે અને આ દંપતીએ આ નામ કેમ પસંદ કર્યું તેનું કારણ પણ આપ્યું છે. વાસ્તવમાં, આ નામ પાછળ કોઈ વેડિંગ પ્લાનર નથી અને કોઈ કૌટુંબિક પરંપરા નથી. વર્ષો પહેલા તેના ચાહકો દ્વારા આ નામ તેના નામ સાથે પ્રેમથી જોડાયેલું હતું.

ચાહકોની લાગણીઓનું ધ્યાન રાખ્યું

અગાઉ ચાહકોએ જે નામ આપ્યું હતું તે ધીમે ધીમે પ્રેમ અને લાગણીનું પ્રતીક બની ગયું હતું અને હવે તેના જીવનની સૌથી મોટી ક્ષણની ઓળખ બની ગયું છે. આવી સ્થિતિમાં તેમણે આ નામ પોતાના ચાહકોને સમર્પિત કરી દીધું છે. સોશિયલ મીડિયા હેન્ડલ ઇન્સ્ટાગ્રામ સ્ટોરી પર પોસ્ટ શેર કરતા તેણે લખ્યું, “અમારા સૌથી વધુ ચાહનાર પ્રિયજનો, જ્યારે અમે કોઈ યોજના બનાવી ન હતી, જ્યારે અમે અમારા માટે કંઇ નક્કી કર્યું ન હતું – ત્યારે તમે અમારી સાથે હતા. ”

તેની આગળ લખ્યું, ‘આટલા પ્રેમથી તમે અમને એક નામ આપ્યું. તમે અમને VIROSH કહ્યા હતા. આજે હૃદય પૂર્વક અમે અમારી શરૂઆત તમારા નામે કરીયે છીએ. અમે તેને નામ આપવા ઇચ્છીયે છીએ – ‘ધ વેડિંગ ઓફ VIROSH’. અમને આટલું પ્રેમપૂર્વક સાથ આપવા બદલ આભાર. તમે હંમેશા અમારો હિસ્સો રહેશો. ઘણો પ્રેમ અને આલિંગન. નોંધનીય છે કે, આ પોસ્ટમાં લગ્નની તારીખ અને સ્થળ જેવી વિગતો શામેલ નથી.

જો કે થોડા દિવસો પહેલા આ કપલનું વેડિંગ કાર્ડ સોશિયલ મીડિયા પર વાયરલ થયું હતું, જેમાં 26 ફેબ્રુઆરીએ લગ્ન સમારોહની જાહેરાત કરવામાં આવી હતી અને ત્યારબાદ 4 માર્ચે હૈદરાબાદમાં રિસેપ્શનની જાહેરાત કરવામાં આવી હતી.

વિજય દેવરકોંડા અને રશ્મિકા મંદાનાની લવ સ્ટોરી કેવી રીતે શરૂ થઈ?

વિજય દેવરકોંડા અને રશ્મિકા મંદાના એ 2018માં આવેલી ફિલ્મ ‘ગીતા ગોવિંદમ’માં સાથે સ્ક્રીન શેર કરી હતી. સાથોસાથ બંને વચ્ચેના સંબંધોની અફવાઓ પણ આવવા લાગી. બીજી તરફ ‘ગીતા ગોવિંદમ’ની રિલીઝના એક મહિના બાદ જ રશ્મિકાએ તેના સહકલાકાર રક્ષિત શેટ્ટી સાથેની સગાઈ તોડી નાખી. તેમની સગાઈની ખૂબ ચર્ચા થઈ હતી. પછી અભિનેત્રીએ ચૂપચાપ તેના જીવનનો એક નવો અધ્યાય શરૂ કર્યો.

આ પછી રશ્મિકાની કારકિર્દીમાં મોટો ફેરફાર આવ્યો હતો. તે ધીમે ધીમે કન્નડ ફિલ્મ ઉદ્યોગ (સેન્ડલવુડ) માંથી આગળ વધી અને તેલુગુ અને તમિલ સિનેમામાં પોતાની ઓળખ બનાવી, જ્યાં તેણે મહેશ બાબુ, અલ્લુ અર્જુન, કાર્તિ સહિત ઘણા સ્ટાર્સ સાથે કામ કર્યું અને આ રીતે તેની કારકિર્દીને નવી ઊંચાઈએ લઈ ગઈ. ત્યારબાદ વર્ષ 2019 માં, રશ્મિકા અને વિજયની જોડી ફિલ્મ ‘ડિયર કોમરેડ’માં ફરી સાથે જોવા મળી હતી, જ્યાં તેમની ઓન સ્ક્રીન કેમિસ્ટ્રી તેમજ રિયલ લાઇફ રોમાંસની અટકળો વહેતી થઇ હતી.

આટલું જ નહીં, બંને અનેક વખત ઇવેન્ટ્સમાં સાથે જોવા મળ્યા હતા. બંનેની ઘણી વાર વેકેશનની તારીખો સમાન હતી. ઇન્સ્ટાગ્રામ પર પોસ્ટ કરેલા ફોટાની બેકગ્રાઉન્ડ પણ આવી જ જોવા મળી હતી. જો કે, બંનેએ આ અંગે ક્યારેય ખુલીને વાત કરી ન હતી. ગયા વર્ષે ઓક્ટોબર સુધીમાં એવા અહેવાલો આવ્યા હતા કે રશ્મિકા અને વિજયે હૈદરાબાદમાં અભિનેતાના ઘરે એક ખાનગી સમારોહમાં સગાઈ કરી હતી.

સગાઈ બાદ રશ્મિકાની કેટલીક તસવીરોમાં તેના હાથમાં એક મોટી વીંટી જોવા મળી હતી, જેને ચાહકો સગાઈની વીંટી માનતા હતા. એક મહિના પછી, બંને ‘બિનસત્તાવાર’ રીતે સાથે દેખાયા. રશ્મિકાની ફિલ્મ ‘ધ ગર્લફ્રેન્ડ’ના પ્રમોશનલ ઇવેન્ટમાં વિજય તેના હાથને પ્રેમથી કિસ કરતો જોવા મળ્યો હતો. આ ક્ષણે ચાહકો ખૂબ જ ઉત્સાહિત કરી દીધા હતા અને સોશિયલ મીડિયા પર ભારે હલચલ મચી ગઈ હતી અને હવે લોકો તેમના લગ્નની આતુરતાથી રાહ જોઈ રહ્યા છે.