સાધ્વી પ્રેમ બાઈસાનું રહસ્યમય મોતઃ આશ્રમથી હોસ્પિટલ સુધી અનેક સવાલો, પોસ્ટમોર્ટમથી ખુલશે રહસ્ય

રાજસ્થાનના જોધપુરમાં સાધ્વી પ્રેમ બાઈસાના નિધન સંબંધિત કેસમાં પોલીસે તપાસ તેજ કરી દીધી છે. પોલીસ કમિશનર ઓમપ્રકાશના નિર્દેશન હેઠળ આ કેસની ઊંડાણપૂર્વક તપાસ ચાલી રહી છે. પોલીસે ઝડપથી કાર્યવાહી કરતાં સાધ્વીને ઈન્જેક્શન લગાવનાર કમ્પાઉન્ડરને કસ્ટડીમાં લીધો છે. પોલીસ હાલ કમ્પાઉન્ડરની પૂછપરછ કરી રહી છે અને કેટલાક મહત્વના પુરાવા મળી આવ્યાની વાત પણ સામે આવી રહી છે. પૂછપરછ બાદ પોલીસે ઈન્જેક્શન સહિત સંબંધિત તમામ મેડિકલ સામગ્રી કબજે લઈ લીધી છે. આ ઉપરાંત પુરાવાઓ સાથે છેડછાડ ન થાય તે માટે આશ્રમને સીલ કરી દેવામાં આવ્યું છે.

મહાત્મા ગાંધી હોસ્પિટલમાં મોટી સંખ્યામાં પોલીસ અધિકારીઓ જોવા મળ્યા, જ્યાં સાધ્વી પ્રેમ બાઈસાનું પોસ્ટમોર્ટમ કરવામાં આવ્યું હતું. હોસ્પિટલ ખાતે મીડિયા સાથે વાત કરતાં સાધ્વીના પિતા બ્રહ્મનાથે અનેક મહત્વના તથ્યો સામે રાખ્યા છે. તેમણે જણાવ્યું કે, ઉધરસ-શરદીની ફરિયાદને કારણે આશ્રમમાં કમ્પાઉન્ડરને બોલાવવામાં આવ્યો હતો. ઈન્જેક્શન લાગ્યા પછી માત્ર પાંચ મિનિટમાં જ પ્રેમ બાઈસાએ દમ તોડ્યો હતો.

પિતાએ એ સ્વીકાર્યું કે, સાધ્વીના મોબાઈલ ફોનમાંથી મેસેજ મોકલવામાં આવ્યો હતો. તેમણે જણાવ્યું કે, સાધ્વીના કહેવા પર જ કોઈ સાથી ગુરુ મહારાજ દ્વારા તેમના મોબાઈલમાંથી મેસેજ લખવામાં આવ્યો હતો. પિતા બ્રહ્મનાથે આખા મામલાની નિષ્પક્ષ તપાસની માંગ કરી છે. બીજી તરફ પોલીસનું કહેવું છે કે, કમ્પાઉન્ડરને હિરાસતમાં લઈને પૂછપરછ કરવામાં આવી રહી છે અને તમામ પાસાઓ પર ગંભીરતાથી તપાસ ચાલુ છે.