Final Up to date:
આ સત્રમાં વિવિધ મુદ્દાઓ પર ચર્ચા અને મોટા બજેટ સહિતના કામકાજ પર ગરમાગરમ ચર્ચાઓ થશે. માન. રાજ્યપાલ, નાણામંત્રી અને વિવિધ સમિતિઓ દ્વારા સત્રના કામકાજનું વિસ્તૃત અને સુચિત આયોજન કરવામાં આવ્યું છે જેથી દરેક મુદ્દાઓ પર યોગ્ય ચર્ચા અને નિર્ણય લેવામાં આવે.
ગાંધીનગર : ગુજરાત રાજ્યના માન. રાજ્યપાલ આચાર્ય દેવવ્રતજી દ્વારા ભારતના બંધારણના અનુચ્છેદ-174(1) હેઠળ પંદરમી ગુજરાત વિધાનસભાનું આઠમું સત્ર તા. 16મી ફેબ્રુઆરી 2026 ના રોજ મળવા માટે આહવાન કરવામાં આવ્યું છે. આ સત્રની રૂપરેખા અને કામકાજ અંગેની મહત્વની વિગતો માનનીય અધ્યક્ષ શંકરભાઈ ચૌધરી દ્વારા જાહેર કરવામાં આવી છે.
સત્રનું મુખ્ય કામકાજ
- રાજ્યપાલનું સંબોધન: સત્રના પ્રથમ દિવસે, તા. 16મી ફેબ્રુઆરીએ રાજ્યપાલ ગૃહને સંબોધિત કરશે.
- અંદાજપત્રની રજૂઆત: નાણામંત્રી દ્વારા તા. ૧૭મી ફેબ્રુઆરી 2026 ના રોજ નાણાકીય વર્ષ 2026-27 નું અંદાજપત્ર (બજેટ) રજૂ કરવામાં આવશે.
- વધારાના ખર્ચના પત્રકો: અંદાજપત્રની સાથે વર્ષ 2011-12, 2014-15, 2015-16 અને 2018-19 ના વધારાના ખર્ચના પત્રકો તેમજ વર્ષ 2025-26 ના પૂરક પત્રકો પણ રજૂ કરવામાં આવશે.
આ સત્ર તા. 16/02/2026 થી તા. 25/03/2026 સુધી કામકાજના કુલ 23 દિવસ ચાલશે, જેમાં કુલ 26 બેઠકો યોજાશે. વિધાનસભાના કામકાજની વહેંચણી નીચે મુજબ કરવામાં આવી છે:
- રાજ્યપાલના સંબોધન પર ચર્ચા: 3 બેઠકો.
- સરકારી કામકાજ અને વિધેયકો: 4 બેઠકો.
- નાણાકીય કામકાજ: કુલ 18 બેઠકો રહેશે જેમાં અંદાજપત્ર પર સામાન્ય ચર્ચા માટે 4 બેઠકો, વિભાગવાર માંગણીઓ ઉપર ચર્ચા અને મતદાન માટે 12 બેઠકો અને પૂરક માંગણી પર ચર્ચા અને મતદાન માટે 2 બેઠકો રહેશે.
- બિનસરકારી કામકાજ: 6 બેઠકમાં બિનસરકારી કામકાજ નિયમો મુજબ હાથ ધરવામાં આવશે.
પ્રશ્નોત્તરી અને ટેકનોલોજીનો ઉપયોગ
- આ સત્ર દરમિયાન તારાંકિત પ્રશ્નોનું કામકાજ હાથ ધરવામાં આવશે, જેના માટે માન. અધ્યક્ષ દ્વારા મંત્રીઓના પાંચ જૂથોની રચના કરવામાં આવી છે અને તારાંકિત પ્રશ્નોની સૂચના માટે વિગતવાર કાર્યક્રમ જાહેર કરવામાં આવ્યો છે.
- માનનીય સભ્યઓની સુવિધા માટે પ્રશ્નોની સૂચના ઓનલાઈન અથવા ઓફલાઈન એમ બંને માધ્યમથી આપવાની વ્યવસ્થા કરવામાં આવી છે.
સત્રની શરૂઆત પહેલા માન. અધ્યક્ષ શંકરભાઈ ચૌધરીના પ્રમુખપદે કામકાજ સલાહકાર સમિતિની બેઠક યોજવામાં આવશે, જેમાં સત્ર દરમિયાન હાથ ધરવાના કામકાજની વિગતવાર ચર્ચા કરી તેની ભલામણો અનુસાર સભાગૃહમાં કામકાજ હાથ ધરવામાં આવશે. આ અંગેની વધુ વિગતો વિધાનસભાની નેવા વેબસાઈટ (www.gujarat.neva.gov.in) ઉપર ઉપલબ્ધ છે.
Gandhinagar,Gujarat
