હવાઈ મુસાફરો માટે મહત્વના સમાચાર છે. એર ઈન્ડિયા અને એર ઈન્ડિયા એક્સપ્રેસે ફ્યુઅલ સરચાર્જ (ઈંધણ પરનો વધારાનો ચાર્જ) વધારવાનો નિર્ણય લીધો છે. નવા દરો 9 ઓક્ટોબરથી અમલમાં આવશે. આ વધારો સ્થાનિક અને આંતરરાષ્ટ્રીય એમ બંને પ્રકારની ફ્લાઈટ્સને લાગુ પડશે.
એરલાઈન્સે એવિએશન ટર્બાઈન ફ્યુઅલ (ATF)ના વધતા ભાવોને ધ્યાનમાં રાખીને આ ફેરફાર અમલમાં મૂક્યો છે. જેના કારણે 9 ઓક્ટોબર કે તે પછીની ફ્લાઈટ્સ બુક કરાવતા મુસાફરોએ ફ્યુઅલ સરચાર્જ તરીકે વધુ રકમ ચૂકવવી પડશે.
ATFના વધતા ભાવો વચ્ચે લેવાયેલો નિર્ણય
સમાચાર એજન્સી PTI અનુસાર, એર ઈન્ડિયા અને એર ઈન્ડિયા એક્સપ્રેસે ગુરુવારે ફ્યુઅલ સરચાર્જમાં વધારાની જાહેરાત કરી હતી. એરલાઈન્સે નોંધ્યું હતું કે તાજેતરના મહિનાઓમાં ATFના ભાવોમાં નોંધપાત્ર અસ્થિરતા જોવા મળી છે, જે મુખ્યત્વે ભૌગોલિક-રાજકીય ઘટનાક્રમ અને વૈશ્વિક ઊર્જા બજાર પરના દબાણને કારણે છે.
એક નિવેદનમાં જણાવાયું છે કે, “ઈંધણના ભાવોમાં તાજેતરના વધારાને કારણે એરલાઈન્સના સંચાલન ખર્ચમાં વધુ વધારો થયો છે, જ્યારે કુલ ખર્ચમાં ઈંધણનો હિસ્સો નોંધપાત્ર રહે છે.”
ફ્યુઅલ સરચાર્જમાં કેટલો વધારો થશે?
PTI અનુસાર, એરલાઈનના સંચાલન ખર્ચમાં ATFનો હિસ્સો લગભગ 40 ટકા હોય છે. સ્થાનિક ફ્લાઈટ્સ માટે અંતરના આધારે નવો ફ્યુઅલ સરચાર્જ ₹400 થી ₹1,200 ની વચ્ચે રહેશે.
આંતરરાષ્ટ્રીય ફ્લાઈટ્સ માટે પ્રદેશ અને દેશના આધારે ફ્યુઅલ સરચાર્જ USD 55 થી USD 215 ની વચ્ચે રહેશે. આ ફેરફાર દેશની સૌથી મોટી એરલાઈન, ઈન્ડિગો (IndiGo) દ્વારા તેના સરચાર્જમાં વધારો કરવાના સમાન પગલાને ફોલો કરે છે.
આકાસા એર (Akasa Air) એ પણ ફ્યુઅલ સરચાર્જ વધાર્યો
આકાસા એરે પણ 9 ઓક્ટોબરથી સ્થાનિક ફ્લાઈટ્સ પર ફ્યુઅલ સરચાર્જ ફરીથી લાગુ કરવાનો નિર્ણય લીધો છે. આ ઉપરાંત એરલાઈને આંતરરાષ્ટ્રીય ફ્લાઈટ્સ માટે પણ સરચાર્જમાં વધારો કર્યો છે. પશ્ચિમ એશિયામાં ચાલી રહેલા ભૌગોલિક-રાજકીય ઘટનાક્રમ વચ્ચે ઈંધણના ભાવોમાં થયેલા વધારાને પગલે આ પગલું લેવામાં આવ્યું છે.
આકાસા એરે અગાઉ માર્ચમાં સ્થાનિક અને આંતરરાષ્ટ્રીય ફ્લાઈટ્સ પર ફ્યુઅલ સરચાર્જ લાદ્યો હતો, પરંતુ બાદમાં સ્થાનિક ફ્લાઈટ્સ માટે તેને પાછો ખેંચી લીધો હતો. હવે તેને ફરીથી લાગુ કરવામાં આવી રહ્યો છે. અંતરના આધારે સ્થાનિક ફ્લાઈટ્સ માટે સરચાર્જ ₹375 થી ₹1,150 ની વચ્ચે રહેશે, જ્યારે આંતરરાષ્ટ્રીય ફ્લાઈટ્સ માટે તે ₹2,500 રહેશે.
