શનિવાર અને રવિવારની રજાની સાથે 2 ઓક્ટોબરે ગાંધી જયંતિને પણ રજા મળી તો લોકોએ વીકેન્ડ પહાડો પર વિતાવવાની યોજના બનાવી હતી. મોટી સંખ્યામાં લોકો દિલ્હી-એનસીઆર અને તેની આસપાસના વિસ્તારો છોડીને હિમાચલ પ્રદેશ અને ઉત્તરાખંડના પર્યટન સ્થળોએ પહોંચ્યા હતા. લોકોને લાગ્યું કે પહાડોમાં તેમનું વીકેન્ડ ખૂબ જ સારું રહેશે, પરંતુ હોટલ પહોંચ્યા ત્યાં સુધીમાં તેમને પરસેવો છુટી ગયો હતો.
લોકોને રસ્તા પર લાંબા ટ્રાફિક જામનો સામનો કરવો પડ્યો હતો. તેના વીડિયો સોશિયલ મીડિયા પર વાયરલ થયા છે. વાયરલ વીડિયોમાં જોઈ શકાય છે કે રસ્તાઓ પર વાહનોની લાંબી કતાર છે. આવા અનેક વીડિયો ઉત્તરાખંડ અને હિમાચલ પ્રદેશથી સામે આવ્યા છે.
કાલકા-શિમલા રોડ પર ટ્રાફિક જામ
હિમાચલ પ્રદેશમાં ચંદીગઢ-શિમલા નેશનલ હાઈવે-5 અને કાલકા-શિમલા રોડ પર શુક્રવાર અને શનિવારે ભારે ટ્રાફિક હતો. ઘણી જગ્યાએ વાહનોની ગતિ ખૂબ ધીમી હતી. ટ્રાફિકને કંટ્રોલ કરવા માટે વિવિધ સ્થળોએ પોલીસકર્મીઓ પણ તૈનાત કરવામાં આવ્યા હતા, પરંતુ ટ્રાફિક સામાન્ય થવામાં ઘણો સમય લાગ્યો હતો. વીકેન્ડમાં મોટી સંખ્યામાં પ્રવાસીઓ શિમલા, મનાલી અને અન્ય ઘણા સ્થળોએ આવ્યા હતા.
બીજી તરફ ઉત્તરાખંડમાં ચોમાસાની વિદાય સાથે જ ચારધામ યાત્રાએ ફરી એક વાર વેગ પકડ્યો છે. સપ્તાહના અંતે પર્યટન સ્થળોએ ઉમટી પડેલી ભારે ભીડને કારણે રસ્તાઓ પર ટ્રાફિક જામ થયો છે.
#WATCH | Manali, Himachal Pradesh: An enormous crowd of vacationers has flocked to Manali as a result of lengthy weekend. Visitors congestion can also be being witnessed within the space. (02.10) pic.twitter.com/nZfINsOwKK
— ANI (@ANI) October 2, 2026
આંકડા અનુસાર, શુક્રવારે 39,567 યાત્રાળુઓ ચારધામ અને હેમકુંડ સાહિબ પહોંચ્યા હતા, જે અગાઉના કેટલાક દિવસોમાં દરરોજ સરેરાશ 13,000 હતા. આંકડા અનુસાર શુક્રવારે સૌથી વધુ 12,844 યાત્રાળુઓ કેદારનાથ પહોંચ્યા હતા. આ પછી 10,708 શ્રદ્ધાળુઓએ ગંગોત્રી, 7,582 ભક્તોએ બદ્રીનાથ અને 6,121 શ્રદ્ધાળુઓએ યમુનોત્રી ધામની મુલાકાત લીધી હતી.
મસૂરી, હરિદ્વાર, ઋષિકેશ અને નૈનીતાલમાં ટ્રાફિક જામ
ગાંધી જયંતી નિમિત્તે શુક્રવારે રજા હોવાને કારણે વીકેન્ડમાં રાજ્યના અન્ય ધાર્મિક અને પર્યટન સ્થળોએ ભારે ભીડ જોવા મળી રહી છે, જેના કારણે ટ્રાફિક સિસ્ટમ પર અસર પડી છે. ચાર ધામ સાથે દહેરાદૂન, મસૂરી, હરિદ્વાર, ઋષિકેશ અને નૈનિતાલ જિલ્લાના કૈન્ચીધામ, મુક્તેશ્વર અને ભીમતાલ ઉપરાંત અનેક સ્થળોએ ભક્તો અને પ્રવાસીઓના આગમનને કારણે ભારે ટ્રાફિક જામ થયો હતો. ઘણા રૂટ પર વાહનોની લાંબી કતારો જોવા મળી હતી અને લોકો કલાકો સુધી ટ્રાફિક જામમાં અટવાઈ ગયા હતા.
લક્ષદ્વીપમાં પસાર કરો યાદગાર 4 દિવસ, પ્રાકૃતિક સૌંદર્યથી લઇને સમુદ્રનો સુંદર નજારો જોવા મળશે
અનેક સ્થળોએ શ્રદ્ધાળુઓ અને મુસાફરોને ચારથી પાંચ કલાક ટ્રાફિક જામનો સામનો કરવો પડ્યો હતો. નૈનીતાલ જિલ્લાના મુખ્ય રસ્તાઓ પર ટ્રાફિકનું દબાણ વધ્યું હતું કારણ કે વીકેન્ડમાં નૈનીતાલ, કૈંચીધામ, ભીમતાલ અને મુક્તેશ્વરમાં પ્રવાસીઓ અને ભક્તો ઉમટી પડ્યા હતા. ઘણા સ્થળોએ વાહનોની લાંબી કતારોને ધ્યાનમાં રાખીને ટ્રાફિકનું સંચાલન કરવા માટે વધારાના પોલીસ દળ તૈનાત કરવામાં આવ્યા હતા.
ટ્રાફિક ડાયવર્ટ કરવો પડ્યો
નૈનીતાલના વરિષ્ઠ પોલીસ અધિક્ષક (એસએસપી) ડો.મંજુનાથ ટીસીએ જણાવ્યું હતું કે ટ્રાફિકને નિયંત્રિત કરવા માટે પૂરતી સંખ્યામાં પોલીસ કર્મચારીઓ તૈનાત કરવામાં આવ્યા છે અને ઘણા સ્થળોએ ટ્રાફિકને ડાયવર્ટ કરવામાં આવ્યો છે. તેમણે જણાવ્યું હતું કે, મોટી સંખ્યામાં શ્રદ્ધાળુઓ કૈંચીધામ પહોંચતા પોલીસે ટ્રાફિક રૂટ બદલ્યો છે.
શ્રદ્ધાળુઓને શટલ વાહનો દ્વારા કૈંચી ધામ લઈ જવામાં આવી રહ્યા છે અને કતારમાં ઉભા રહેવા અને દર્શન કરવાની વ્યવસ્થા કરવામાં આવી છે. દહેરાદૂન અને મસૂરીમાં પણ પ્રવાસીઓની ભારે ભીડનો સામનો કરવો પડી રહ્યો છે, જેના કારણે લોકોને કલાકો સુધી ટ્રાફિક જામનો સામનો કરવો પડે છે. દહેરાદૂનથી મસૂરી સુધીની એકથી દોઢ કલાકની સફર પુરી કરવામાં ત્રણથી ચાર કલાકનો સમય લાગે છે. દહેરાદૂન પોલીસે વીકેન્ડમાં અપેક્ષિત ભીડને ધ્યાનમાં રાખીને દહેરાદૂન, મસૂરી અને ઋષિકેશ માટે વિશેષ ટ્રાફિક પ્લાન લાગુ કર્યો છે.
