ગુજરાત સરકાર મહિલાઓ અને બાળકીઓ વિરુદ્ધ બળાત્કારના કેસોમાં ‘ઝીરો-ટોલરન્સ’ નીતિ અપનાવી રહી છે. છેલ્લા પાંચ વર્ષમાં ગુજરાતમાં POCSO કેસોમાં ઐતિહાસિક ન્યાય આપવામાં આવ્યો છે. આ સમયગાળા દરમિયાન 1,785 ચુકાદા આપવામાં આવ્યા હતા, જેના પરિણામે 908 દોષિતોને આજીવન કેદ અને અન્ય 16ને મૃત્યુદંડની સજા ફટકારવામાં આવી હતી.
ગુજરાત સરકાર દ્વારા ‘ઝીરો-ટોલરન્સ’ નીતિનો અમલ
છોકરીઓની સુરક્ષા સુનિશ્ચિત કરવા અને જાતીય ગુનાઓ સામે કડક તથા ત્વરિત ન્યાયિક કાર્યવાહી કરવા માટે ગુજરાત સરકારે ‘ઝીરો-ટોલરન્સ’ નીતિ અમલમાં મૂકી છે. આ નીતિના પરિણામે POCSO (જાતીય ગુનાઓથી બાળકોનું રક્ષણ) અધિનિયમ હેઠળ નોંધાયેલા કેસોની ન્યાયિક પ્રક્રિયા અભૂતપૂર્વ ગતિએ આગળ વધી રહી છે.
POCSO કોર્ટ દ્વારા 72 કલાકમાં આજીવન કેદની સજા
પોલીસની તપાસ પદ્ધતિ જે સંવેદનશીલતા અને વૈજ્ઞાનિક પુરાવા એકત્રિત કરવા સહિતની ઝીણવટભરી તપાસ દ્વારા ચિહ્નિત થયેલ છે. તે ગુનેગારોને કડક સજા અપાવવામાં નિર્ણાયક સાબિત થઈ છે. તાજેતરમાં ગાંધીનગરના કલોલની POCSO કોર્ટે એક દાખલો બેસાડ્યો છે. કોર્ટે 15 વર્ષની સગીર બાળકી પર બળાત્કાર ગુજારનાર આરોપીને પોલીસે ચાર્જશીટ દાખલ કર્યાના માત્ર 72 કલાકમાં જ બાકીના કુદરતી જીવનકાળ સુધીની આજીવન કેદની સજા સંભળાવી હતી.
છેલ્લા 5 વર્ષમાં 1785 કેસોમાં ચુકાદા અપાયા
વર્ષ 2022 અને ઓગસ્ટ 2026ની વચ્ચે ગુજરાતની POCSO અદાલતોએ કુલ 1,785 ચુકાદા આપ્યા હતા. તેમાંથી 908 ગુનેગારોને આજીવન કેદની અને 16 જઘન્ય ગુનેગારોને મૃત્યુદંડની સજા ફટકારવામાં આવી હતી. અદાલતી ચુકાદાઓની સંખ્યામાં વર્ષ-દર-વર્ષે નોંધપાત્ર વધારો થયો છે. આમાં વર્ષ 2022માં 194 ચુકાદાઓ દ્વારા 107 આરોપીઓને વર્ષ 2025માં 499 ચુકાદાઓ દ્વારા 340 આરોપીઓને અને વર્ષ 2026માં (ઓગસ્ટ સુધી—એટલે કે ચાલુ વર્ષના પ્રથમ આઠ મહિનામાં) 346 ચુકાદાઓ દ્વારા ૨૪૧ આરોપીઓને આજીવન કેદની સજા સંભળાવવાનો સમાવેશ થાય છે. ઉલ્લેખનીય છે કે, માત્ર ઓગસ્ટ મહિનામાં જ POCSOના 48 કેસોમાં સજાના ચુકાદા સંભળાવવામાં આવ્યા હતા, જેમાં ૩૫ આરોપીઓને આજીવન કેદની સજા ફટકારવામાં આવી હતી.
આ પણ વાંચો: ગુજરાતે ખેતીની જમીન માટે લઘુત્તમ કદની જરૂરિયાત કેમ અડધી કરી દીધી છે? જાણો તેના ફાયદા છે. । EXPLAINED
15 દિવસમાં 140 POCSO કેસોમાં ચાર્જશીટ દાખલ
છેલ્લા પાંચ વર્ષોમાં પોલીસે 140 POCSO કેસોમાં 1 થી 15 દિવસના સમયગાળામાં ચાર્જશીટ દાખલ કરી છે. 16 થી 30 દિવસમાં તપાસ પૂર્ણ થયા બાદ 1,339 કેસોમાં ચાર્જશીટ દાખલ કરવામાં આવી છે. તેવી જ રીતે 31 થી 45 દિવસના સમયગાળામાં 5,463 કેસોમાં ચાર્જશીટ દાખલ કરવામાં આવી હતી. આ બાબત પોલીસ દ્વારા આવા કેસોને ગંભીરતાથી હાથ ધરવાની રીત અને તપાસની ગતિ દર્શાવે છે.
ગુજરાતમાં છોકરીઓની સુરક્ષામાં વધારો
રાજ્ય સરકારના મજબૂત કાનૂની માળખા અને પોલીસ તથા સરકારી વકીલ (પ્રોસિક્યુશન) વચ્ચેના સંકલનને કારણે ગુજરાતમાં છોકરીઓની સુરક્ષા નોંધપાત્ર રીતે મજબૂત બની છે અને ગુનેગારોમાં કાયદાનો ડર પેદા થયો છે. અગાઉ હર્ષ સંઘવીએ જણાવ્યું હતું કે પ્રેમમાં પડવું એ ગુનો નથી પરંતુ જે કોઈ વ્યક્તિ પ્રેમની આડમાં પોતાની સાચી ઓળખ છુપાવીને અન્યને છેતરશે તેની સામે કડક કાર્યવાહી કરવામાં આવશે.
