Jantar Mantar protest: શુક્રવારે દિલ્હીમાં જંતર-મંતર ખાતે મુખ્ય ચૂંટણી કમિશનર જ્ઞાનેશ કુમાર વિરુદ્ધ વિરોધ પ્રદર્શન કરવા માટે એકઠા થવાનો પ્રયાસ કરી રહેલા લગભગ 500 લોકોની દિલ્હી પોલીસે અટકાયત કરી અને તેમને બસોમાં બેસાડીને પોલીસ સ્ટેશનોમાં લઈ જવાયા છે.
અટકાયત કરાયેલા લોકોમાં ‘ઓલ ઈન્ડિયા સ્ટુડન્ટ્સ એસોસિએશન’ (AISA)ના રાષ્ટ્રીય અધ્યક્ષ નેહા બોરા અને આમ આદમી પાર્ટી (AAP)ના દિલ્હીના નેતા સૌરભ ભારદ્વાજ સહિત નેતાઓનો સમાવેશ થાય છે. આ ઉપરાંત કોંગ્રેસના કાર્યકરો અને AISAના કાર્યકરોની પણ અટકાયત કરવામાં આવી હતી.
પોલીસ એવા લોકોને ઉઠાવતી જોવા મળી હતી જેઓ એક જ સ્થળે 10 કે તેથી વધુના જૂથમાં એકઠા થયા હતા અને તેમને વિરોધ પ્રદર્શનના સ્થળોથી દૂર લઈ જવામાં આવ્યા હતા. તેમને બદારપુર પોલીસ સ્ટેશન અને આઉટર નોર્થ દિલ્હીના પોલીસ સ્ટેશનો સહિત અન્ય સ્થળોએ લઈ જવામાં આવ્યા હતા.
હવે વિરોધ પ્રદર્શનનું મુખ્ય કેન્દ્ર જનપથ વિસ્તારની આસપાસ છે, જ્યાં હજુ પણ લગભગ 50-60 લોકો એકઠા થઈને વિરોધ કરી રહ્યા છે. પોલીસ પ્રદર્શનકારીઓને સંસદ સ્ટ્રીટ અને જંતર-મંતર વિસ્તાર તરફ આગળ વધતા અટકાવી રહી છે.
ગુરુવારે, પોલીસે મતદાર યાદીઓની ‘સ્પેશિયલ ઇન્ટેન્સિવ રિવિઝન’ (SIR) પ્રક્રિયામાં કથિત અનિયમિતતાઓને લઈને યોજાનારા દેખાવ માટે મંજૂરી આપવાનો ઇનકાર કર્યો હતો અને મધ્ય દિલ્હીમાં સુરક્ષા વ્યવસ્થા સઘન બનાવી હતી.
