ગુરુવારે બપોરે ક્રિપ્ટોકરન્સી માર્કેટમાં અચાનક મોટી વેચવાલી નીકળતા ગ્લોબલ માર્કેટ કેપ 2% જેટલું ઘટી ગયું હતું. બપોરે 2:30 વાગ્યા સુધીમાં માર્કેટ કેપ ઘટીને 2.40 ટ્રિલિયન ડોલર પર આવી ગયું હતું. આ ઘટાડાને કારણે વિશ્વભરના ક્રિપ્ટો રોકાણકારોએ માત્ર એક જ દિવસમાં અંદાજે ₹4.70 લાખ કરોડ ગુમાવ્યા છે, જેનાથી બજારમાં ગભરાટનો માહોલ છે.
દિગ્ગજ ક્રિપ્ટોકરન્સીની કિંમતો પાતાળમાં: આ કડાકાની સૌથી વધુ અસર વિશ્વની ટોચની ક્રિપ્ટોકરન્સી પર જોવા મળી છે. બિટકોઈન 1.80% ઘટીને $70,000 ની નીચે ટ્રેડ કરી રહ્યો હતો. ઈથેરિયમમાં 2.5% થી વધુનો ઘટાડો નોંધાયો અને તે $2116 પર પહોંચ્યું હતું. બાઈનાન્સ, રિપલ અને સોલાના જેવી જાણીતી કરન્સીમાં પણ 2% થી 4% સુધીનો મોટો ઘટાડો જોવા મળ્યો છે, જેના કારણે પોર્ટફોલિયો લાલ નિશાનમાં આવી ગયા છે.
કાઈટ' ક્રિપ્ટો પર સૌથી મોટો ફટકો: આ ગબડતા બજારમાં સૌથી વધુ નુકસાન 'કાઈટ' (Kite) ક્રિપ્ટોકરન્સીને થયું છે. ટોચના 100 ક્રિપ્ટોમાં સામેલ કાઈટમાં છેલ્લા 24 કલાકમાં 10% થી વધુનો મોટો ઘટાડો જોવા મળ્યો હતો. બપોરે તે $0.2097 પર ટ્રેડ કરી રહી હતી. આ ઉપરાંત ડોગકોઈન અને શિબા ઇનુ જેવી મીમ કોઈન્સમાં પણ 4% થી 5% નો ઘટાડો નોંધાયો છે.
મંદી વચ્ચે પણ આ કરન્સીમાં જોવા મળી તેજી: રસપ્રદ વાત એ છે કે આખા માર્કેટમાં ઘટાડો હોવા છતાં કેટલીક કરન્સીમાં જોરદાર ઉછાળો જોવા મળ્યો છે. 'મીમકોર' (Memecore) માં અંદાજે 40% નો આશ્ચર્યજનક ઉછાળો આવ્યો હતો. આ સિવાય ટ્રૉન (Tron) માં 2%, કેન્ટન કોઈનમાં 1% અને પાઈ નેટવર્ક કોઈનમાં પણ સામાન્ય તેજી જોવા મળી હતી, જે રોકાણકારો માટે આશ્ચર્યનો વિષય બન્યો છે.
કયા કારણોએ બગાડ્યો માર્કેટનો મૂડ?: ક્રિપ્ટો માર્કેટમાં આ કડાકા પાછળ બે મુખ્ય કારણો માનવામાં આવે છે. પ્રથમ, ઈરાન અને અમેરિકા વચ્ચે વધતો જતો તણાવ; ઈરાને અમેરિકાના યુદ્ધવિરામ પ્રસ્તાવ પર સીધી વાત કરવાનો ઇનકાર કરી દીધો છે. બીજું કારણ, અમેરિકાનું નવું ક્રિપ્ટો રેગ્યુલેટરી બિલ છે, જેણે રોકાણકારોમાં અનિશ્ચિતતા પેદા કરી છે. આ વૈશ્વિક અસ્થિરતાની સીધી અસર ડિજિટલ એસેટ્સ પર પડી રહી છે.
