BMC Outcomes: ભાજપની પ્રચંડ જીત બાદ સોશિયલ મીડિયા પર કેમ ટ્રેન્ડ થઈ ‘Rasmalai’? જાણો શું છે મામલો

મુંબઈમાં BMC ચૂંટણીના પ્રચાર દરમિયાન તમિલનાડુના ભાજપ નેતા અન્નામલાઈએ કહ્યું હતું, મુંબઈ માત્ર મહારાષ્ટ્રનું શહેર નથી, પરંતુ તે આંતરરાષ્ટ્રીય શહેર છે. આ વાત પર રાજ ઠાકરેએ અન્નામલાઈની ‘રસમલાઈ’ કહીને મજાક ઉડાવી હતી. MNSના ચીફ રાજ ઠાકરેએ કહ્યું હતું, ‘તમિલનાડુથી એક રસમલાઈ મુંબઈ આવી છે.’ રાજ ઠાકરેએ અન્નામલાઈ પર પણ પ્રહાર કરતા પૂછ્યું, “તમારું અહીં શું કામ છે કે તમે અહીં આવ્યા છો?” રાજ ઠાકરે આટલેથી જ અટક્યા નહીં. તેમણે “લુંગી હટાઓ, બજાઓ…”ના નારા પણ લગાવ્યા. મનસે વડાના આ નિવેદન અને નારાથી રાજકીય હોબાળો મચી ગયો હતો.

અન્નામલાઈ પર રાજ ઠાકરેની ટિપ્પણી બાદ, મહારાષ્ટ્ર નવનિર્માણ સેના (MNS)ના ઘણા કાર્યકરોએ મુંબઈ આવ્યા તો પગ કાપી નાખવા સુધીની ધમકીઓ આપી હતી. આ વાતને અન્નામલાઈએ તમિલ લોકોનું અપમાન ગણાવ્યું અને તેમણે ધણકીનો જવાબ આપતા કહ્યું હતું કે, ‘હું મુંબઈ આવીશ અને જો તમારામાં હિંમત હોય તો મારા પગ કાપીને બતાવો.’

હવે મહારાષ્ટ્રની મ્યુનિસિપલ કોર્પોરેશનની ચૂંટણીઓમાં ભારતીય જનતા પાર્ટી (ભાજપ) અને તેના ગઠબંધનને મોટી સફળતા મળી છે. મહારાષ્ટ્રની મહાનગરપાલિકા ચૂંટણી 2026ના પરિણામોમાં ભાજપના ભવ્ય વિજય બાદ હવે સોશિયલ મીડિયા પ્લેટફોર્મ એક્સ પર અચાનક જ #Rasmalai ટોપ ટ્રેન્ડમાં છે. ભાજપ નેતાઓ સોશિયલ મીડિયા પર રસમલાઈના ફોટા શેર કરીને મહારાષ્ટ્ર નવનિર્માણ સેના (MNS)ના પ્રમુખ રાજ ઠાકરેને ટ્રોલ કરી રહ્યા છે.