મકાઈનો લોટ સ્વાસ્થ્ય માટે ફાયદાકારક છે પરંતુ દરેકને ‘મકાઈ ના રોટલા’ બનાવતા આવડતું નથી હોતું, તેથી ઘણા લોકો તેને બનાવવાનું ટાળે છે. તેથી પરંપરાગત રોટલાને બદલે, અહીં મકાઈના લોટમાંથી ‘ચીલા’ બનાવવાની રીત આપવામાં આવી છે. આ ‘ચીલા’ બનાવવા સરળ છે, તે એકદમ ગોળ બને છે અને તૂટતા કે ફાટતા નથી. તમે મકાઈના લોટના સ્વાસ્થ્યવર્ધક ગુણોનો લાભ લેવાની સાથે તમારા મનપસંદ શાક કે ચટણી સાથે તેનો આનંદ માણી શકો છો. ચાલો રેસીપી વિશે તમને જણાવીએ.
મકાઈના લોટના ચીલાની રેસીપી
મકાઈના લોટમાંથી ખૂબ જ ક્રિસ્પી અને સ્વાદિષ્ટ ‘ચીલા’ બને છે. શરૂઆત કરવા માટે એક મોટું વાસણ લો અને તેમાં એક નાની વાટકી ભરીને મકાઈનો લોટ ઉમેરો. મકાઈનો લોટ ગ્લુટેન-ફ્રી (gluten-free) હોવાથી તે એવા લોકો માટે યોગ્ય છે જેમને ગ્લુટેનની એલર્જી હોય અથવા જેઓ અન્ય કારણોસર તેનું સેવન ટાળતા હોય.
હવે લોટમાં મીઠું, લાલ મરચું, હળદર, ધાણાજીરું પાવડર, ગરમ મસાલો, હિંગ, થોડી આદુ-લસણની પેસ્ટ, ઝીણા સમારેલા લીલાં મરચાં, ઝીણી સમારેલી તાજી કોથમીર અને હથેળીઓ વચ્ચે મસળીને થોડો અજમો ઉમેરો. આ બધી સૂકી સામગ્રીને એકસાથે મિક્સ કરો.
ત્યારબાદ ખીરું (બેટર) તૈયાર કરવા માટે લોટમાં ગરમ પાણી ઉમેરો. પાણી ધીમે-ધીમે ઉમેરો કારણ કે મકાઈનો લોટ વધુ પ્રવાહી શોષી લે છે. પાણી ઉમેરતા રહો અને હલાવતા રહો જ્યાં સુધી ‘ચીલા’ બનાવવા માટે યોગ્ય એવું મુલાયમ ખીરું તૈયાર ન થઈ જાય. ધ્યાન રાખો કે ખીરામાં ગઠ્ઠા ના રહે.
આ પણ વાંચો: BRICS સંમેલનમાં વિદેશી મહેમાનોને પીરસવામાં આવશે ‘કાશ્મીરી શાહી પુલાવ’, જાણો તેની સરળ રેસીપી
તૈયાર કરેલા ખીરાને ઢાંકી દો અને 10 મિનિટ માટે રહેવા દો. જો ખીરું વધુ ઘટ્ટ લાગે તો રાંધતા પહેલા તેમાં થોડું વધુ પાણી ઉમેરો. ગેસ પર તવી ગરમ કરો અને તેને પહેલાં હળવું તેલ લગાવીને ગ્રીસ કરો. આનાથી ‘ચીલા’ ચોંટશે નહીં અને તેને પલટાવવામાં સરળતા રહેશે.
જ્યારે તવી ગરમ થઈ જાય ત્યારે ગેસની આંચ મધ્યમ કરી દો. તવા પર મકાઈના લોટનું તૈયાર કરેલું ખીરું 1-2 ચમચા જેટલું રેડો અને તેને ફેલાવો. તમે તમારી પસંદગી મુજબ ‘ચિલ્લા’ને નાનું કે મોટું બનાવી શકો છો. તેને ધીમી આંચ પર 4-5 મિનિટ સુધી ચઢવા દો. સરળતાથી પલટાવી શકાય તે માટે તેની કિનારીઓ પર થોડું તેલ રેડો.
એક બાજુ ચઢી જાય પછી ચિલા’ને પલટાવી લો તમે ઈચ્છો તો બીજી બાજુ પણ પકવી શકો છો અથવા માત્ર એક બાજુ પકવેલું પણ ખાઈ શકો છો. તે ખૂબ જ ક્રિસ્પી અને સ્વાદિષ્ટ બને છે. તમે તેને લીલી ચટણી, સોસ અથવા શાક સાથે પીરસી શકો છો.
